1 ᑲᕒᐃᑎᔭᓇᒃ 12 - Ojibwe Kihcimasina'ikan

Aaniin enentaakwahkin ahcaahkowi miinikoowinan

¹ Shikwa 'owe niwii'nahkwehtaan kaa'ishipii'amawiyek, aaniin enentaakwahk ahcaahkowi ishiayaawin. Niiciotepwehtamook, kinantawenimininim i'i cikihkentamek.

² Kikihkentaanaawaa cipwaa mahshi anami'aayek, inkoci 'imaa kikii'wawaanihshimikoom cipamiihtawekwaa manitoohkaanak kaapimaatisihsikwaa ehkiikitohsikwaa. Aanti hsa ko kikii'ishiwinikoom.

³ Mii 'iwe kaaoncinihsitohtamooninakook o'owe: awiya Kishemanitoo otAhcaahkonk e'ontinank ihkitowin, kaawiin “Tanihshiwanaatisi” okainaahsiin Ciisahsoon. Awiya tahsh “Mii 'awe Ciisahs kaaTipenciketc” ihkitotc, mii ehta Kishemanitoo otAhcaahkonk kaaoncikiikitotc.

⁴ Inashke pepahkaan tinowanoon ahcaahkowi miinikoowinan, miitahsh ehta Kishemanitoo otAhcaahkwan eshipeshikonitc kaaona'ooshiwenitc.

⁵ Pepahkaan kaye tinowanoon eshipamiihtaakewaatc awiyak, miihsh ehta kaaTipenciketc eshipeshikotc kaa‑anohkiihtawintc.

⁶ Shikwa pepahkaan tinowanoon eshikashkihtoowaatc awiyak otanohkiiwiniwaan, miitahsh ehta 'awe Kishemanitoo eshipeshikotc eshianohkiitc entahsopeshikonitc opimaatisiwininiink kahkina kekoon cikashkihtoonitc.

⁷ Entahsopeshikotc awiya ishimiinaa kekoon Kishemanitoo otAhcaahkwan e'naakohtoonitc otishiayaawinini. Miitahsh kahkina awiya cionciminohsewaatc.

⁸ A'a peshik omiinikoon Kishemanitoon otAhcaahkoni minokihkencikewinink ci‑ishikiishwetc. Miinawaa peshik payahtenihsitohtamowin omiinikoon ini peshikwan Ahcaahkwan ci‑ishikiishwetc.

⁹ Miinawaa peshik awiya kihcitepwehtamowin omiinikoon ono peshikwan Ahcaahkwan, shikwa pahkaan awiya minoayaa'iwewinan omiinikoon ono peshikwan Ahcaahkwan.

¹⁰ Miinawaa tahsh peshik cikashkihtootc maamahkaacihcikewinan ishimiinaa, miinawaa peshik Kishemanitoon cikanootamawaatc ishimiinaa. Miinawaa tahsh peshik cinihsitaaweyentank ehtinowaninikin ini miinikoowinan, kiishpin tepwe Kishemanitoon otAhcaahkoni e'onciimakaninikwen kemaa kaawiin. Shikwa miinawaa peshik pepahkaan ishikiishwewinan ishimiinaa, peshik itahsh kaye ishimiinaa ciaanihkanoohtank ini ishikiishwewinan.

¹¹ Miitahsh i'i kahkina ono enanohkiitc 'awe kaapeshikotc Ahcaahk maamiinaatc kahkina awiya', wiin iko enentank.

Peshikwan 'iwe wiiyawimaa, ehpaahtiinatinkin Ishinaakosiwinan

¹² Inashke mii 'owe enentaakositc a'a Christ taapishkoo awiya wiiyawink. Aana peshikwahk o'o wiiyaw, paahtiinatinoon itahsh pepahkaan eshinaakwahkin kaaishiaapatahkin. Kahkina tahsh wiin onoweniwan aanawiin aanapaahtiinatinkin, miihsh ehta eshipeshikwahk o'owe wiiyaw.

¹³ Mii hsa ko peshikwan kekiinawint minihk eshipepahkaanwewaanakisiyank, kemaa Coowak kemaa kaye kaaCoowiwihsikwaa, kaye tipenimaakanak kaye kaatatipenintisowaatc, kahkina kikii'ishisiika'antaakonaan ini peshikwan Kishemanitoo otAhcaahkwan i'imaa peshik wiiyawimaank cioncitipentaakosiyank. Shikwa peshikwan kikii'ishimina'ikoomin a'a peshikwan Ahcaahk ciminihkwaanank.

¹⁴ Inashke aaniihsh 'owe wiiyawimaa eshinaakwahk kaawiin mihcipeshikonaakwahsinoon, paahtiinatinoon ohsha 'omaa kaatahsoishinaakosink.

¹⁵ A'a tahsh ositimaa ihkitotc: “Niin e'oninciimaawihsiwaan, kaawiin i'imaa nintooncitipentaakosihsii wiiyawink,” o'o aanaihkitohpan, mashkawaac iko oncitipentaakwan i'imaa wiiyawink i'i ositimaa.

¹⁶ Kemaa kaye ohtawakaamaa aanaihkitohpan: “Niin aaniihsh e'oshkiinshikowihsiwaan, kaawiin niin i'imaa nintooncitipentaakosihsii wiiyawink,” o'owe aanaihkitotc, mashkawaac iko oncitipentaakwan i'imaa wiiyawink i'i ohtawakaamaa.

¹⁷ Inashke kiishpin misiwe oshkiinshikowankipan i'i wiiyawimaa, aaniinti keoncinoontamoomakahkipan? Misiwehsh kaye ohtawakaawankipan, aanti kekii'onci minaancikemakahkipan?

¹⁸ Wiin itahsh wiin a'a Kishemanitoo entahsopeshik okii'maamawihtoonan ini kaapepahkaanatininikin kaatahsoishinaakosink cipeshikwaninik i'i wiiyaw, wiin iko e'ishionentank.

¹⁹ Kiishpin ehta peshikoayaak 'iwe pahkesiwin kaawiin wiiyawimaa taishinaakwahsinoon.

²⁰ Paahtiinatinoon itahsh wiin ini ishinaakosiwinan, ehpeshikwahk itahsh i'i wiiyawimaa.

²¹ Miitahsh i'i oshkiinshikomaa kaawiin okakii'inaahsiin ini oninciimaan: “Kaawiin kekoon kitinaapaci'ihsinoon!” A'awehsh kaye ohtikwaanimaa kaawiin otaaninaahsii' osita': “Kaawiin kiinawaa kekoon kitinaapaci'ihsinooninim.”

²² Kaawiin i'i tainentaakwahsinoon. Nawac itahsh wiin kihtaapatanoon ini kekoonan wiiyawimaank kaawahkewinaakwahkin.

²³ Iniweniwan itahsh pankii kaa‑ahpiihtentamank, nawac iko ciminoahpiihtentaakwahkin kitishihtoomin. Iniwehsh kaye ekaa kaaminonaakwahsinokin, keyaapi weweni kitishikikishkikemin kwayahk ci‑ishinaakwahkin.

²⁴ Inihsh wiin kaaminonaakwahkin kaawiin memwehc ci‑ishi'oomakahsinokin. Wiin tahsh Kishemanitoo okii'ishimaamawihtoon i'i wiiyawimaa, onoweniwan inkotano kaainentaakwahsinokin, nawac ekii'ishihtootc cikihci‑inentaakwaninikin.

²⁵ Mii 'iwe enentaakwahk ekaa pahkewinitiwin ciayaamakahsinok wiiyawimaank, kahkina tahsh kaapepahkaanatinkin ishinaakosiwinan peshikwan iko ci‑ishinaakaci'itiimakahkin.

²⁶ Ahpii ko e'macihsek peshik pahkesiwin, mii peshikwan iko kahkina pahkesiwinan wiici inamanci'ontiimakanoon. Peshik itahsh kaye kihci‑inencikaatek pahkesiwin, mii peshikwan iko kahkina eshimaamawi ciihkentamoomakahkin.

²⁷ Kiinawaa kaatahshiyek mii 'iweni owiiyaw Christ. Entahsopeshikoyek kitooncitipentaakosim mii 'imaa Christ owiiyawink kaatahsoishinaakosiyek.

²⁸ I'imaa tahsh eshimaawaci'itiwaatc otepwehtamook kahkina awiya' Kishemanitoo okii'inahsaa' keoncitipentaakosinitc. Nihtam okii'inahsaa' ishinisha'waakana' ciniikaanentaakosinitc. Miinawaa tahsh otipaacimoo' kaakanoocikehtamaakotc okii'inahsaa' ciaanihke niikaanentaakosinitc. Miitahsh miinawaa okihkino'amaake' okii'inahsaa' ciani⁠aanihke⁠ niikaanentaakosinitc. Miitahsh 'imaa eniaanihkawishkaakewaatc kaamaamahkaacihcikewaatc, miinawaa tahsh iki kaashimiinikoowisiwaatc ciminoyayaa'iwewaatc kaye kaawiici'iwewaatc, miinawaa tahsh aaninta kaaniikaanisiihkantaakewaatc inahsaawak, kaye pepahkaan ishikiishwewinan kaamiinintwaa.

²⁹ Kaawiin kahkina awiya ishinisha'waakan tinowihsiiwak. Kaawiin kahkina ishimiinaahsiiwak cikanootamawaawaatc Kishemanitoon. Kaawiin kaye kahkina okihkino'amaakewihsiiwak, kaawiin kahkina maamahkaacihcikehsiiwak.

³⁰ Kaawiin kahkina miinikoowisihsiiwak ciminoyayaa'iwewaatc. Kaawiin kaye kahkina ishikiikitohsiiwak pepahkaan ayishikiishwewinan. Kaawiin kahkina awiya aanihkanoohtamaakehsiiwak.

³¹ Ini tahsh maawac kaaonishihshinkin miinikoowisiwinan, miiwan ini kakwe antawentamok. Peshik itahsh ishiayaawin kiwii'aniwaapanta'ininim maawac e'niikaanionishihshink.