1 ᑲᕒᐃᑎᔭᓇᒃ 11 - Ojibwe Kihcimasina'ikan

¹ Kiinawaa kaye kihkinawaapamihshik kaye niin e'ishikihkinawaapamak Christ.

Aaniin enentaakwahk ehkikaanohkwaanenk e'anami'aank

² Kinanaahkomininim mooshak e'mihkwenimiyek kaye ehkakwe mincimentamek minihk kekoon kaakii'aanihke wiintamawinakook.

³ O'owe tahsh kinantawenimininim cikihkentamek: a'awe Christ e'niikaanisiihkantawaatc kahkina ininiwan. Shikwa 'awe inini wiin oniikaanisiihkantawaan ini wiiwan, shikwa wiin a'awe Kishemanitoo oniikaanisiihkantawaan ini Christan.

⁴ Mii hsa 'iwe kiishpin kikaanohkwaanetc inini e'anami'aatc kaye ehkanootamawaatc Kishemanitoon, kaawiin okihci‑inentaako'aahsiin ini Christan kaaniikaanisiishkaakotc.

⁵ A'awe tahsh ihkwe kiishpin shaahshaakanihtikwaanetc e'anami'aatc kaye ehkanootamawaatc Kishemanitoon, kaye wiin kaawiin okihci‑inentaako'aahsiin ini onaapeman kaaniikaanisiishkaakotc. Kaawiin pahkaan taainentaakosihsii awiya ihkwe kaamihtaskihtikwaaneshontc.

⁶ Miitahsh i'i kiishpin wiihkikaanohkwaanehsik a'a ihkwe, intawaa piko cimashashkoshankipan wiinisihsan. Onci hsa ko e'menihshentaakwahk e'mihtaskihtikwaaneshontc kemaa ehkiishkishank wiinisihsan a'a ihkwe, mii hsa ko 'i cikikaanohkwaanetc.

⁷ A'awe tahsh inini kaawiin antawentaakosihsii cikikaanohkwaanetc, aaniihsh onci‑ishiayaa Kishemanitoon e'inaatisinitc kaye eshiahpiihci kihci‑inentaakosinitc. A'awe tahsh ihkwe onci‑ishiayaa kaashikihci‑inentaakosinitc ini ininiwan.

⁸ Kaawiin ohsha ihkwenk kii'oncioshi'aahsii 'awe inini; ininiink hsa wiin kii'oncioshi'aa a'a ihkwe.

⁹ Kaawiin aaniihsh ciwiici'aahpan ini ihkwewan kii'oncioshi'aahsii 'awe inini; a'ahsh wiin ihkwe kii'oncioshi'aa ciwiici'aatc ini ininiwan.

¹⁰ Mii 'iwe keonci⁠aakawa'ank ohtikwaan a'a ihkwe, e'ishinaakohtootc okihci‑inentaakosiwin. Mii 'iwe memintake taishihcike a'a ihkwe, ehkanawaapamikowaatc i'i encala'.

¹¹ I'imaa tahsh eshiwiiciiwinank kaaTipenciketc, kaawiin tapiniskwe⁠pimaatisihsii a'a ihkwe ininiwan iko ciwiici'ikohpan. A'awehsh kaye inini kaawiin kewiin tapiniskwe⁠pimaatisihsii ihkwewan iko ciwiici'ikohpan.

¹² Aaniihsh peshikwan a'a ihkwe i'imaa ininiink ekii'oncioshi'aakaniwitc, mii kaye wiin peshikwan a'a inini i'imaa ihkwenk ontaatisi. Kishemanitoonaank itahsh wiin onciimakanini kahkina kekoon.

¹³ Kiinawaa hsa ko kakwekwayahkonamok: Minonaakwan ina 'awe ihkwe ehshaahshaakanihtikwaanetc ehkanoonaatc Kishemanitoon?

¹⁴ Inashke eshi'ikoowisiyank kitaaoncikihkentaam e'menihshentaakositc kaatankaanihkwetc a'a inini.

¹⁵ A'a tahsh ihkwe kakaanwaanisihsetc, mii 'iweni okihci‑inentaakosiwin. Aaniihsh ishimiinikoowisi cikakaanwaanihkwetc ciakwana'ank ohtikwaan.

¹⁶ Kiishpin awiya ewii'aanwehtank o'o kihkino'amaakewin, kaawiin pahkaan nintayaahsiimin, kaawiin kaye aantiko i'imaa eshimaamaawaci'itiwaatc eshianami'ehtawaawaatc Kishemanitoon. Kaawiin kaye wiinawaa pahkaan ishihcikehsiiwak.

KaaTipenciketc otahshankewin keishinaakwaninik e'ishiwiihsinink

¹⁷ Ono tahsh kaawiihkihkino'amawinakook kaawiin kiwaawishenimihsinooninim. Kaawiin aahpici onishihshinsinoon eshipiintikanitiyek, nawac hsa ko maaninaakwan.

¹⁸ Niikaan iko kitinininim, ninkii'wiintamaakoo e'ayoohko⁠ ayaanontiyek e'maawaci'itiyek. Nawac iko nintepwehtaan.

¹⁹ Oncita ko tani‑ishihse pahkewinitiwinan ciayaamakahkin e'ayaayek, mii ehta 'imaa cipayahtenaakosiwaatc ikiweniwak kaakwayahkohcikewaatc.

²⁰ Ahpii ko e'maawaci'itiyek, kaawiin wiin kaaTipenciketc otahshankewin kitishinaakohcikehsiim kiiwiihsiniyek.

²¹ Aaniihsh kahkina ko pehpeshik onoonte otaahpinaanaawaa wiinawaa ko ewii'wiihsiniwaatc. Miihsh i'i aaninta awiyak keyaapi noonteskatewaatc, aasha aanint ehkiiwashkwepiiwaatc.

²² Kaawiin ina kitoowaahkaa'ikanihsiim citashiwiihsiniyek kaye citashiminihkweyek? Kemaa na nawac kiwii'maanenimimaawaa' Kishemanitoo omaawaci'aakana'? Kikamenihshi'aawaak ina tahsh iki ekaa kekoon kaa‑ayaahsikwaa? Aaniin keininakook? Kiminohcikem ina kikainininim? Kaawiin awaac kanake!

²³ Nashke aaniihsh kaaTipenciketc niin iko ninkii'wiintamaak, mii 'iwe aasha kekiinawaa kaakii'aanihke wiintamawinakook, i'iwe kaakii'ishihciketc kaaTipenciketc Ciisahs mii 'iwe ahpii ehtipihkaninik cipwaa otaahpinikaniwitc. Pahkweshikanan okii'otaahpinaan.

²⁴ Ekii'nanaahkomotc itahsh okiihpahpahkwepinaan, o'owe e'ihkitotc: “Mii hsa 'owe niiyaw, onci kiinawaa. Mii 'owe anioncitootamok amwek cimaamihkawinotawiyek.”

²⁵ Mii 'i peshikwan kaa'ishkwaawiihsiniwaatc okii'otaahpinaan i'i minihkwaakan, kaashimooshkinepiik shoominaapo, o'owe e'inaatc: “O'o minihkwaakan kaaishinaakohtootc Kishemanitoo otooshki⁠ahshotamaakewin, nimiskwiink keaayiicihtootc otahshotamaakewin. Ahpii piko minihkweyek o'o tootamok cimaamihkawinotawiyek.”

²⁶ Mii 'i enentaakwahk, tahsink iko amwek wa'a pahkweshikan kaye e'onciminihkweyek o'o minihkwaakanink, mooshak kikaishinaakohtamaakem kaakii'ishinipoohtamaaketc kaaTipenciketc, piinihsh iko citakwihshink.

²⁷ Mii 'iwe kiishpin awiya tepinaahk amwaatc kaaTipencikenitc opahkweshikanimini, kaye ishiminihkwetc ominihkwaakaniniink, ekaa kwayahk ehkihtenimaahsik kaaTipencikenitc, tainakimaa awiya ekiihpaahpinotamawaatc kaaTipencikenitc wiiyawini kaye omiskwiimini.

²⁸ Miitahsh i'i kahkina awiya ahkawe takakwe kwayahkwenintiso aaniin eshiayaatc, miitahsh i'i ciamwaatc ini pahkweshikanan kaye cionciminihkwetc i'i minihkwaakanini.

²⁹ Kiishpin itahsh kwayahk ishinansik aaniin enwaatenik kaaTipencikenitc wiiyawini ahpii e'amwaatc ini pahkweshikanan kaye onciminihkwetc i'i minihkwaakanini, taoncikashkihtamaaso citipaahkonikaniwitc mekwaa e'wiihsinitc kaye e'minihkwetc.

³⁰ Mii 'owe niipiwa' kaaonciaahkosiwaatc kaye e'onciniinamisiwaatc kiinawaa i'imaa kaatahshiyek, kaye teminihk ekii'nipowaatc awiyak.

³¹ Kiishpin itahsh ahkawe kakwekwayahkonaasoyank, kaawiin memwehc kitaa tipaahkonikoohsiimin.

³² KaaTipenciketc itahsh kikakwekwayahkonaakonaan kaye kikwayahkonikonaan, ekaa citakwaahkonikoohsiwank keinaahkonintwaa ikiweniwak ahkiink kaatipentaakosiwaatc.

³³ Ina tahsh, niiciotepwehtamook! Ahpii anta maawaciwiihsiniyek kaaTipenciketc otahshankewin, pii'itiyohk!

³⁴ Awiya tahsh noonteskatetc, ahkawe wiin otaawinink tatashiwiihsini. Mii 'iwe ishimaawaci'itiyohk, ekaa inaahkonikoowin ciotihsikohsiwek. Pahkaan itahsh kekoonan ninkanana'ihsitoonan paanimaa takohshinaan.