1 ᑲᕒᐃᑎᔭᓇᒃ 10 - Ojibwe Kihcimasina'ikan

Ayaankwaamisiyohk ekaa manitoohkewinink ciwiici'iwehsiwek

¹ Niiciotepwehtamook! Mooshak kitaamaamihkawim ikiweniwak kaakiihpi inaatisiwaakopanen kikehteaya'aaminaapaniik kaakiihpiminisha'waawaatc ini Moosihsoon (Moses) shiipaa wahkwiink ekii'aniayaawaatc ekiihtapinawishkaakowaatc, kaye ekiinishaaposhkamowaatc i'i kihcikam.

² I'i wahkwi ekii'aakawakootenik kaye 'iwe kihcikam ekiihshaapooshkamowaatc, mii kaainentaakwahk ekiihsiika'antaasowaatc Moosihsink cionci tipentaakosiwaatc.

³ Shikwa kahkina peshikwan kaa‑ahcaahkowank miicim kii'ishiwiihsiniwak.

⁴ Kaye kahkina peshikwan kii'ishiminihkwewak e'ahcaahkowaninik minihkwewin. Kii'onciminihkwewak 'imaa e'ahcaahkwentaakositc kihtaapihkonk kaapimiwiiciiwikowaatc, amii 'awe kihtaapihk Christ e'aawitc.

⁵ Aanawiin iko i'iwe kaaishiwepisiwaatc, niipiwa' kaatahshiwaatc kaawiin okii'minonawe'aahsiwaawaan Kishemanitoon. Amii 'iwe kaa'onci paapiiwehsininikin wiiyawiwaan pikwatahkamikaank.

⁶ Kahkina tahsh onoweniwan kii'ishiwepisiwak kiinawint kihkinawaacihcikan keayaankwaamaapantamank, ekaa kekiinawint cimihsawentansiwank kaaonishihshinsinok wiinawaa aanint kaa'ishihcikewaatc;

⁷ ekaa kaye oshihcikanak cimanitoohkaakehsiwank, wiinawaa aanint kaa'ishihcikewaatc. Aaniihsh mii 'owe eshipii'ikaatek: “Kii'ohkwapiwak ekiihkihciwiihsiniwaatc kaye ekii'animinihkwewaatc piinihsh ekii'ani⁠ompweishiayaawaatc ekii'aniniimiwaatc,” ihkitoomakan.

⁸ Keko kiinawint kitaapihshikwaacihcikehsiimin taapishkoo wiinawaa aanint kaakiihtootamowaatc. Mii ahpii peshik ehkiishikahk niishtanahshinihsin tahso mitaahswaahk 23,000 kiihtahshiwak ekiih ketahtwaahpinewaatc ekii'nipowaatc.

⁹ Kaawiin kaye kika kakaanci'aahsiwaanaan a'awe kaaTipenciketc, aaniin minihk kepakitininank citootamowank, wiinawaa aanint kaakii'ishihcikewaatc. Kinepikoo' okii'nihsikowaa'.

¹⁰ Kaawiin kaye kikamintawimaahsiwaanaan, aanint wiinawaa kaakii'ishihcikewaatc. Okii'nihshiwanaaci'ikowaan itahsh ini nihshiwanaaci'iwewi encalan.

¹¹ Inashke kahkina onoweniwan kii'ishiwepisiwak, pahkaan awiyak keonciayaankwaamisiwaatc. Shikwa kiinawint kii'oshipii'ikaatewan ciayaankwaamimikoyank. Noonkom iko aaniihsh eshipimaatisiyank, piciinak wii'ani ishkwaahsewan ono kaapimihsekin o'omaa ahkiink.

¹² Ina tahsh, a'awe “ninsoonkikaapaw” kaainenintisotc, weweni taa‑ayaankwaamisi ekaa cipankihshinsik.

¹³ Kahkina koci'ikoowin aniwaapantamek, mii peshikwan kahkina awiya ciniotihtank. 'Awe tahsh Kishemanitoo kaawiin wiihkaa owii'aancihtoohsiin kaashiahshotamaaketc. Kaawiin awahshime kikapakitinamaakohsiiwaa cikakweci'ikooyek keshimashkawikaapawiyek. Ahpii tahsh ehkakweci'ikooyek, Kishemanitoo kikateahpiihcii'ikowaa citekashkihtooyek. Mii 'iwe kikaishimiinikowaa aaniin keshishaapooshkamek.

¹⁴ Haw itahsh kaasaaki'inakook! Keko awaac pankii wiicihtwaahkek i'i manitoohkewin.

¹⁵ Kitishikanoonininim ehkakiihtaawentamek. Kiinawaa ko cionentamek o'o kaaininakook.

¹⁶ I'iwe ohsha minihkwaakan kaanihtaa otaahpinamank ehtakomiikwehciwi'ank Kishemanitoo, ahpii onciminihkweyank, kaawiin ina kiwiitoohkamowaahsiimin Christ omiskwiim? A'awehsh kaye pahkweshikan kaanihtaa pahpahkwepinank, ahpii e'amwank, kaawiin ina kiwiitoohkamowaahsiimin Christ owiiyaw?

¹⁷ Peshik ehta aapatisi 'awe pahkweshikan. Miitahsh 'iwe aana paahtiinoyank, kahkina kimaamawihtoomin i'i peshik wiiyawimaa, aaniihsh peshik a'a pahkweshikan kitoontamaanaan.

¹⁸ Ina 'iwe kaaishihcikewaatc Isriyal (Israel) ininiwak: ikiweniwak kaaontantamowaatc i'i kaapakitinaahswaaniwaninik, owiitoohkaanaawaa 'iwe ehpakitinaahsohkantawintc Kishemanitoo.

¹⁹ Aaniin tahsh ehkitoyaan? A'awe oshihcikan kaamanitoohkaakaaniwitc, tepwe na pimaatisi? Kaawiin ohsha kekoon inaapatisihsii. I'iwe tahsh kaye miicim kaapakitinaahsohkantawintc oshihcikan, kekoon ina inaapatan?

²⁰ Kaawiin kekoon! Inashke hsa i'iwe kaapakitinaahsowaatc omanitoohkek entashipakitinikewaatc, maciahcaahkwa' mayaa kaamiinimintc. Kaawiin tashimiinaahsii Kishemanitoo. Shikwaa kaawiin kinantawenimihsinooninim maciahcaahkwak ciwiitoohkawekwaa.

²¹ Kaawiin wiin kitaakashkihtoohsiim cionciminihkweyekipan minciniish kaaTipenciketc ominihkwaakanink kaye maciahcaahkwak ominihkwaakaniwaank. Kaawiin kitaakashkihtoohsiim minciniish kaaTipenciketc owiihsiniwinaahtikonk cionciwiihsiniyekipan kaye maciahcaahkwak owiihsiniwinaahtikowaank.

²² Kemaa, kitaakakaanci'aanaan kaaTipenciketc ciontentank? Nawac ina kimashkawisiimin ahpiihc wiin kaaTipenciketc kitaainentaamin?

²³ Maakishaa awiya ihkitotc: “Kahkina kekoon nimpakitinamaakoomin citootamaank.” “Tepwe,” nintaainaa, “kaawiin itahsh kahkina kekoon onishihshinsinoon citootamaan.” Aanawiin e'ihkitonk kahkina kekoon ehpakitinamaakooyank, kaawiin tahsh kahkina kekoon ehtootamank okawiici'ikohsiin pahkaan awiya.

²⁴ Kaawiin aaniihsh kitaa‑antawentansiimin ehta cipeshikominohseyank, pahkaan itahsh awiyak kaye wiinawaa ciminohsewaatc.

²⁵ Piko kekoon kikamiicim kaatanataawaakenk i'imaa miicimikamikonk. Keko memwehc kakwetwehkek aanti kaaontinikaatek, mii 'i ekaa cioncimaanentansiwek.

²⁶ “Aaniihsh kahkina otipentaan kaaTipenciketc o'o ahki, kahkina kaye kekoon wakitahkamik kaa‑ayaanik,” ishipii'ikaate.

²⁷ Awiya tahsh kaatepwehtansik antominek ciwiiciwiihsiniiminek, inentamek itahsh ci‑ishaayek, pisaan iko miiciyohk i'i kaa ahshamikooyek. Keko kakwetwehkek kaamiiciyek, maakishaa kitaaoncimaanentaam noontamek.

²⁸ Maakishaahsh awiya kikaikowaa: “Mii 'owe miicim manitoohkaanink kaakii'ishi pakitinikaakaaniwank.” Kiishpin o'o ininek, kaawiin kitaamiicihsiim, ekaa kekoon ci‑inentansik a'awe kaawiintamawinek, kaye ekaa maanenintisowin cionciimakahsinok.

²⁹ Kaawiin kaaitamaan kiinawaa i'iwe cimaanentamek kiishpin miiciyek, a'awe hsa kaakii'wiintamawinek maakishaa taoncimikoshkaatentam waapaminek. Maakishaa taihkito awiya: “Niin kekoon ehpakitinamawaatamaan, aaniihshwiin keoncikipishkawihpan pahkaan awiya e'maanaasinank cimanaamaanentami'ak?

³⁰ Kiishpin miikwehc ekii'inak Kishemanitoo i'iwe kaawii'miiciyaan, aaniihshwiin awiya kekoon keonci'ihshihpan aasha ekii'oncinanaahkomoyaan i'i miicim?”

³¹ Mii 'i ehkitoyaan, wekonen hsa ko eshihcikeyek, maakishaa wiihsiniyek, maakishaa minihkweyek, kahkina ko ishihcikeyohk Kishemanitoo cikihtentaako'intc.

³² Mii 'iwe inaatisik, ekaa kekoon ci‑inenimihsinowekwaa Coowak kaye kaaCoowiwihsikwaa, kaye Kishemanitoo omaawaci'aakana'.

³³ Niin eshihcikeyaan, mii 'iwe tootamok. Kahkina awiya ninkakwe nana'entami'aa aaniiniko eshihcikeyaan, kaawiin ehta cikakwe⁠peshiko⁠minohsa'itisoyaan, ikihsh wiin kahkina ciminohsa'intwaa cipimaaci'intwaa.