1 ᑲᕒᐃᑎᔭᓇᒃ 1 - Ojibwe Kihcimasina'ikan

¹ Niin Pwaal (Paul) o'o nintooshipii'ikan, niin kaa'onaapamitc Kishemanitoo e'inentank ciopapaamisiwiniyaan Christ Ciisahs ciotishinisha'waakanimitc. A'a tahsh kiwiiciotepwehtamoominaan Saastiniis (Sosthenes) kaawiiciiwak.

² Kitooshipii'amaakoom kiinawaa otanami'aak i'imaa Kwaarintink (Corinth) kaa‑ayaayek, Kishemanitoo kaatipeniminek kaamaawacianami'aayek. Kiinawaa kaa‑antominek Kishemanitoo okwayahkwaatisiima' citinowiyek, wiin ekii'onahsinek ci‑ishitipeniminek, e'wiiciiwimek Christ Ciisahsoon. Tako kaye kahkina nintooshipii'amawaanaanik pahkaan kaatanahkiiwaatc kaa‑anami'ehtawaawaatc Christ Ciisahsoon kaaTipeniminank. Mii 'awe kahkina peshikwan kaashitipeniminank. Kahkina o'o kaatinowiyek kitooshipii'amaakoom.

³ Maano kikashawenimikowaa, kikamaminohse'ikowaa Kishemanitoo Koohsinaan kaye kaaTipenciketc Ciisahs Christ.

I'iwe eshishaweniminek Christ Ciisahs

⁴ Mooshak nintooncinanaahkomaa ninKishemanitoom kiinawaa weti eyaayek ekii'onciihtamawinek oshawencikewin e'oncimiinikowisiyek Christ Ciisahs onci.

⁵ Wiin iko e'wiiciiwinek kikii'wenooci'ikowaa misiwe kipimaatisiwiniwaank tako kaye kahkina kitishikiikitowiniwaank kaye kahkina kikihkentamowiniwaank.

⁶ Ekii'ahpiihciaayiitentamek Christ otinaacimikoowin,

⁷ kaawiin awaac pankii kikii'noontehsehsiim kishawenimikoowiniwaa cimiinikoowisiyek, ehpii'ek Ciisahs Christ cipinaakositc weti ishpimink.

⁸ Wiin kika‑aayiici'ikowaa cimashkawisiiyek piinihsh iko ciwehkwaa‑ayaak, mii hsa 'iwe ekaa kekoon ci‑ishianaamentaakosihsiwek ahpii okiishikaamitc a'a kaaTipeniminank Ciisahs Christ.

⁹ Tepweyentaakosi hsa 'awe Kishemanitoo, mii 'awe kaakii'antominek ciwiiciiwimek ini oKosihsan Ciisahs Christan, miiwan ini kaaTipenimiminank.

Pahkewinitiwin ekii'ayaawaatc otepwehtamook

¹⁰ Niiciotepwehtamook! Kitishikanoonininim owiinsowinink kaaTipeniminank Ciisahs Christ. Kipakohsenimininim, peshikwan kahkina ci‑ihkitoyek, ekaa kekoon pahkewinitiwin ciayaamakahsinok i'imaa eshiayaayek, kwayahk hsa ko cinaapihsek kiwiici'itiwiniwaa, peshikwan ci‑inentamek, peshikwan kaye cikakweishihcikeyek.

¹¹ Aaniihsh, niiciotepwehtamook, kekoon nimpiwiintamaakook aanint weti pemionci‑ishaawaatc Kaloowi (Chloe) owaahkaa'ikanink. Kwayahk iko niwiintamaakook, aanwaapantiwin kiinawaa i'imaa e'ayaamakahk, ihkitowak.

¹² Mii 'owe kaaitamaan: kaatahsopeshikoyek pepahkaan e'ishiwiintamowaatc eshipiminisha'ikewaatc. Peshik ihkito: “Niin okihkino'amawaakan a'a Pwaal (Paul).” Kaye peshik, “Niin Ahpwaalahs (Apollos) okihkino'amawaakanan,” ishiwiinitiso. Peshik kaye, “Niin Piitar (Peter) okihkino'amawaakanan,” ihkito. Peshik itahsh kaye ihkito: “Niin Christ ehta nimpiminisha'waa.”

¹³ Na! Tapapiikihshipinaa na 'a Christ, pepahkaan ciayoohkweno'intc? Pwaal ina 'a kaakii'nipohtamawinek aashiteyaahtikonk? Kikii'ishisiika'antaakoom ina ciahpiwiinintc Pwaal cionciokihkino'amawaakaniminek? Kaawiin iitok!

¹⁴ Ninanaahkomaa Kishemanitoo ekaa ekiihsiika'antawaahsiwak awiya kaatahshiyek, mii ehta oko Karispahs (Crispus), Keyahs (Gaius) kaye.

¹⁵ Keko wiin awiya ninkaikohsii niin nintishinihkaasowinink ekiihsiika'antaakooyek ciokihkino'amawaakaniminakook.

¹⁶ A'awe tahsh kaye ninkiihsiika'antawaa Istehpanahs (Stephanas) kaye iniweniwa' owaahkaa'ikanink kaashitaanitc. Kaawiin miinawaa nimaamihkawihsii kotak awiya i'imaa cikiihsiika'antawaawakipanen.

¹⁷ Kaawiin wiin cipapaamisiika'antaakeyaan ninkiihpionci‑ishinisha'okohsii 'a Christ, i'ihsh wiin minwaacimowin ciwiintamaakeyaan, mii mayaa enanooshitc. Kaawiin wiin ninkiihkakweinihtaakosihsii e'okihkentaahsowiniyaan, aaniihsh kaawiin ninkii'antawentansiin cikipishkamowak Christ onipohtamaakewin aashiteyaahtikonk kaashimashkawisiimakaninik cianohkiimakahsininik.

Christ e'aawitc omashkawisiiwinini Kishemanitoon kaye okakiihtaawisiwinini

¹⁸ I'iwe aaniihsh kaainaacimintc Christ ekii'nipotc aashiteyaahtikonk, o'owe otinihtaanaawaa ikiweniwak kaaniwanihshinowaatc, taapishkoo ehkakiipaataninik. Kiinawint itahsh wiin kaanipimaaci'ikooyank, mii 'imaa tipaacimowinink e'ahtenik omashkawisiiwin Kishemanitoo.

¹⁹ Ishipii'ikaate aaniihsh i'i Kihcimasina'ikan: “A'a kaakakiihtaawisitc ninkanihshiwanaacihtaawaan okakiihtaawisiwin, a'a tahsh kaaokakiihtaawentamowinitc ninka pahkaan ahtaawaan okihkentaahsowin,” ihkito Kishemanitoo.

²⁰ Aaniin kaye iki waa'inwaasowaatc kaakakiihtaawisiwaatc, kaye iki niyaakacihtoowaatc masina'ikanan, kaye ikiweniwak o'omaa ahkiink kaakakiihtaawihtaakosiwaatc? Aanakiihkakiihtaawisiwaatc iki noonkom pemaatisiwaatc ahkiink, Kishemanitoo otinakintaan ehkakiipaataninik okakiihtaawisiwinini.

²¹ Wiin aaniihsh Kishemanitoo maawac ehkakiihtaawentank, kaawiin okiihpakitinaahsii' o'o pemaatisinitc wiinawaa ko okakiihtaawisiwiniwaank cioncikihkenimikohpan. Kii'inentam itahsh ewiihpimaaci'aatc i'i ketepwehtaminitc. Okii'aapacihtoon o'o tipaacimowin kaawiintamaakeyaank, i'i ko e'inentamowaatc ehkakiipaataninik o'omaa ahkiink.

²² Coowak (Jews) aaniihsh owii'waapantaanaawaa maamahkaacihcikewinan, mii payesh citepakentamowaatc. Ikihsh kaye Kariihkak (Greeks) onantone'aanaawaa minihk hsa ko kaakakiihtaawaninik.

²³ Niinawint itahsh kaawiintamaakeyaank, nintashimaanaan a'a Christ kaakii'ishi akosaka'ikaniwitc aashiteyaahtikonk. O'owe tahsh ehtashintek oshiinkihtaanaawaa iki Coowak, oko tahsh kaye kaaCoowiwihsikwaa okakiipaasihtaanaawaa.

²⁴ Iki tahsh Kishemanitoon kaa‑antomikowaatc, kemaa Coowiwaatc kemaa Kariihkiwiwaatc, onihsitohtaanaawaa Christ wiin Kishemanitoon e'omashkawisiimimikotc, kaye Kishemanitoon e'okakiihtaawentamowinikotc.

²⁵ Inashke Kishemanitoonaank aanaishinaakwahkipan kekoon cikakiipatahk, awahshime taakakiihtaawan ahpiihc ininiinaank kaa‑ayaamakahk. I'iwehsh e'niinamahk aanaishinaakwahk kekoon Kishemanitoonaank, awahshime mashkawisiimakan ahpiihc ininiinaank keshimashkawisiimakahk kekoon.

²⁶ Niiciotepwehtamook! Maamihkawiyohk aaniin kaakii'inaatisiyek i'i ahpii e'antominek Kishemanitoo. Kaawiin kikiihpaahtiinohsiim kaakakiihtaawisiyek o'omaa ahkiink awiyak kaaishinaakosiwaatc, kaawiin kaye i'iwe kikii'ishiokimaawentaakosihsiim, kaawiin kaye niipiwa' i'iwe nahke kikii'ishi⁠kihci‑inentaakosihsiim.

²⁷ O'omaa tahsh awiyak ahkiink kaainentamowaatc kakiipaatan kaye niinaman, mii 'oweni Kishemanitoo kaakii'onaapantank cioncitapahsinaatc o'o kaakakiihtaawisinitc kaye kaamashkawaatisinitc.

²⁸ Kaye iniweniwan ahkiink kaatapahsentaakwahkin kaye kaa‑aanwaapancikaatekin, kaye kekoonan kaa‑ayaamakahsinokin, Kishemanitoo okiihkakiikinaanan, cipoonihsenik itahsh wekonen hsa ko ahkiink kaashikihci‑inentaakwaninik.

²⁹ Mii 'owe kaaoncitootank ekaa awiyan pemaatisinitc cimaamiihkwaanitisohsinik imaa Kishemanitoo enaahsamiitc.

³⁰ Mii 'awe Kishemanitoo kaaishihcike'inek cimaaciiwiiciiwek Christ Ciisahs. Okii'ishi'aan Christan mii 'imaa ciayaamakahk kikakiihtaawisiwininaan. Mii 'awe Christ eshicike'inank cikwayahkwakiminank Kishemanitoo, wiin okwayahkwaatisiima' citinowiyank, kaye mii 'awe Christ kaakiihpakitininank i'imaa kaakiihkihciwinikoyank macitootamowin.

³¹ Mii aaniihsh o'o ehkitoomakahk Kihcimasina'ikan: “Awenen hsa ko kekihci‑inentank kekoon, okakihci‑inentaan ehta kaatootaminitc kaaTipencikenitc.”