तीतुस 1 - ओङ राजपूतनमस्कार 1 हा चिठ्ठी पौलुस चे तरफु जको नरीकारा चा दास ते मसीह ईशु चा प्रेरित छै, नरीकारा चे चुणले आले लौक चा विश्वास ते वे सच्चाई ची पिछाण चे अनुसार जको भग़ती चे अनुसार छै, 2 ओ अनन्त जीवन ची आस उपर, जको वायदा नरीकारा ने, जको कूड़ मार ना सग़ी शुरु कनु करला। 3 नरीकारा ने सही समय उपर ओ वचना नु जको ओ प्रचार चे लारे उजागर करला, जको अम्चे मुक्तिदाता नरीकारा ची आज्ञा चे अनुसार मनु सोंपला गेला। 4 तीतुस चे नांवे, जको विश्वास ची भईवाली चे विचारा लारे माया सच्चा पूत छै। नरीकार ब़ा ते अम्चे उद्धारकर्ता मसीह ईशु ची ओर कनु तनु अनुग्रह ते शान्ति मिलती रिहो। तीतुस ची क्रेते इलाके मां कामे 5 मैं ऐवास्ते तनु क्रेते मां छोड़ली आलता, कि तु बाकि रेहले आले कामा नु सुधार, ते माई आज्ञा चे अनुसार शहरा शहरा मां अग़ुवा नु नियुक्त कर। 6 जको बेकसूर ते हेक ही घराआली चा मोणस हो, जाई ब़ाले-ब़च्ची विश्वास करने आली हो, ते जानु लोचपण ते निरंकुशता चा दोष ना हो। 7 कांकि मुखिया नु नरीकारा चा भण्डारी हुवणे चे वजह निर्दोष हुवणे चाही छै, ना हठी, ना क्रोधी, ना पियक्कड़, ना मार कुटाई करने आला, ते ना नीच कमाई चा लोभी। 8 पर मेहमानी करने आला, भलाई नु चाहणे आला, संयमी, न्यांयी, पवित्र ते आपणे शरीरा चे अंगा नु बसा मां करने आला हो। 9 ते विश्वास चे लायक वचना उपर जको धर्मउपदेश चे अनुसार छै, मजबूत रिहो, कि खरी शिक्षा लारे उपदेश ङे सग़ो ते विवाद करने आला चे मुँह बन्द कर सग़ो। 10 कांकि घणी बन्दी सच्चे उपदेश चा विरोध करने आली ते निरंकुश बैफालतु चा बाता करने आली ते धोक्का ङेणे आली छी, खास करती खतने आला महु। 11 यांचे मुँह बन्द करने चाही छै, ईं लौक नीच कमाई वास्ते नाजायज बाता सिखाती कर, सच्चे विश्वास करने आला लौका चे घरा ची घरे बिगाड़ती नाखी। 12 क्रेते लौका महु हेक जणे ने जको वांचा भविष्यवक्ता छै, केहले, “क्रेती बन्दी सदा कूड़े, ते ढौरा जिसड़े दुष्ट ते आलसी ढिडल छी।” 13 हा ग़वाही सच्च छै, ऐवास्ते वानु सख्ताई लारे चिताती ङिले कर, कि वे सच्चे विश्वास मां पक्के हुती जाओ। 14 वानु आज्ञा ङे कि वे यहूदिया ची मनघड़न्त किसे कहाणीया उपर मन ना लाओ, जको सच्चाई कनु भटकती जई। 15 शोद्ध लौका वास्ते सारीया बाता शोद्ध छी, पर अशुद्ध ते अविश्वास वास्ते कोच्छ वी शोद्ध कोनी, बल्कि वांचा दिमाक ते विवेक ङोनी अशुद्ध छी। 16 वे किही, कि अम्ही नरीकारा नु जाणु, पर आपणे कामा लारे ओचा इन्कार करी, कांकि वे किज़ड़े ते आज्ञा ना मनणे आले छी, ते कुई आच्छे कामा चे लायक कोनी। |
CC BY-NC-ND 4.0