रोमियां 9 - ओङ राजपूत

नरीकार ते यहूदी लौक

¹ मैं मसीह मां सच्‍च किहे, कूड़ ना मारी, ते माया विवेक वी पवित्र आत्मा मां ग़वाही ङिये,

² कि मनु बङी उदासी छै, ते माये मन हमेशा ङुखते रिहे।

³ कांकि माई हा मनसा हुती कि, आपणे यहूदी भावां वास्ते ते आपणे देशा चे लौका वास्ते आप श्रापित हुती मसीह कनु अंज हुती जईया।

⁴ जको सब इस्राएली छी, वानु नरीकारा ची ऊलाद्ध हुवणे चा अधिकार हुता, महिमा, ते वाचा, ते व्यवस्था चा उपहार, ते नरीकारा ची उपासना, ते वायदा वांचीया ही छी।

⁵ पुरखे वी वांचे ही छी, ते मसीह वी शरीरा चे भाव लारे वांचे महु ही हुला, जको सब चे उपर परम नरीकार युगानयुग धन्‍न छै। आमीन।

⁶ पर हा कोनी कि, नरीकारा चा वचन टलती गेला, ऐवास्ते कि जको इस्राएल चे वंश छी, वे सारे इस्राएली कोनी।

⁷ ते ना अब्राहम चे वंश हुवणे ची वजह लारे सब ओची ऊलाद्ध ठहरली, पर लिखले आले छै, “इसहाक कनु दुधा वंश किहवाला जई।”

⁸ यानिकि शरीरा चे अनुसार जमले आले नरीकारा ची ऊलाद्ध कोनी, पर वायदे चे अनुसार जमले आले नरीकारा चे वंश गिणले जई।

⁹ कांकि वायदे चा वचन हा छै, “मैं तय करले आले समय उपर बल्ति पुठा आवी, ओ बेले सारा हेक पूता नु जनम ङी।”

¹⁰ ते सेर्फ ईं ही कोनी, पर जिसे बेले रिबका वी हेक कनु यानिकि अम्चे पुरखे इसहाक कनु गर्भवती हुली हुती।

¹¹ ते हमा तक ना तां ब़ाले जमली हुती, ते ना ही वाणे कोच्छ भले जा बुरे करले हुते, ऐवास्ते कि नरीकार ची मनसा जको ओचे चुणती गेहणे चे अनुसार छै, कामा ची वजह कोनी, पर हकारने आला उपर बणली रिहो,

¹² ऐवास्ते नरीकारा ने रिबका नु केहले, “जेठा छोटे चा दास हुवी।”

¹³ जिसड़े कि पवित्रशास्त्रा मां लिखले पले, “मैं याकूब लारे प्रेम करला, पर एसाव नु ठुकराती ङिले।”

¹⁴ तां अम्ही का किहुं? का नरीकारा चे इठे अन्याय छै? कङी वी कोनी!

¹⁵ कांकि ओ मूसा नु किहे कि, “मैं जाये उपर दया करने चाहवे, ओचे उपर दया करी, ते जाये उपर मैं कृपा करने चाहवे ओचे उपर कृपा करी।”

¹⁶ ऐवास्ते हा बात ना तां काई इच्छा लारे हुवे, ना ही द्रोक-भज करने लारे, पर दया करने आले नरीकारा ची इच्छा लारे हुवे।

¹⁷ कांकि पवित्रशास्त्र मां फिरौन चे बारे मां केहले गेले कि, “मैं तनु ऐवास्ते खड़े करले कि, दुधे मां हुती कर मैं सामर्थ ङिखाणे। ते माये नांवा चा प्रचार पुरी धरती उपर हो।”

¹⁸ ते बल्ति, नरीकार जाये उपर चाहे, ओचे उपर दया करे, ते जानु चाहवे, ओनु कठोर करती नाखे।

¹⁹ तु मनु किहे, “बल्ति नरीकार कां दोष लावे? कूण ओची इच्छा चा सामना कर सग़े?”

²⁰ हे इन्सान, भला तु कूण छी, जको नरीकारा चा सामना करी? का घड़ली आली चीज घड़ले आले नु केह सग़े, “तु मनु इसड़े कां बणाले?”

²¹ का कुम्भारा नु माटी उपर अधिकार कोनी, कि माटी चे हेक ही लोत्थे महु, हेक ठांवा नु आदर चे वास्ते, ते ङुजे ठांवा नु अनादर चे वास्ते बणाओ?

²² का हुले अगर नरीकारा ने आपणा क्रोध ङिखाणने ते आपणी सामर्थ प्रकट करने ची इच्छा लारे क्रोध चे ठांवा ची, जको विनाश वास्ते तियार करली गेली हुती, बङे सब्रा लारे सहन करती गेले,

²³ जाये कनु जको दया चे ठां छै जानु ओणे आपणी महिमा वास्ते पेहले कनु तियार करले हुते, वांचे उपर आपणी महिमा चे धन्‍न नु प्रकट करो?

²⁴ यानिकि अम्चे उपर जानु ओणे ना सेर्फ यहूदिया महु बल्कि नेरीया जातिया महु वी हकारले।

²⁵ जिसड़े कि भविष्यवक्‍ता होशे ची किताबे मां वी लिखले पले, “जको लौक माये कोनी हुते, मैं वानु आपणे लौक किही, जको माई प्रजा प्यारी कोनी हुती, वानु मैं आपणी प्यारी प्रजा किही।”

²⁶ ते, “इसड़े हुवी कि जिसी जग़हा मां वानु केहले गेले हुते, कि ‘तम्ही माई प्रजा कोनी छिवा,’ वेही जग़हा मां वे जीते नरीकारा ची ऊलाद्ध किहवावे।”

²⁷ ते यशायाह भविष्यवक्‍ता इस्राएल चे बारे मां हकारती कर किहे, “चाहे इस्राएल ची ऊलाद्ध ची गिणती समुन्दरा ची रेत चे बराबर हो, तांवी वांचे महु थोड़े ही बचे।

²⁸ कांकि प्रभु आपणा वचन धरती उपर पूरा करती कर, धार्मिकता लारे जल्दी ओनु सेद्ध करी।”

²⁹ जिसड़े कि यशायाह भविष्यवक्‍ता ने पेहले कनु ही भविष्यवाणी करली हुती, “अगर सैना चा प्रभु अम्चे वास्ते कोच्छ वंश ना छोड़े हा, तां अम्ची हालत सदोम ते अमोरा शहरा आलीकर हुती जईया।”

इस्राएल ते सुसमाचार

³⁰ तां अम्ही का किहुं? ईं कि नेरीया जातिया ने जको धार्मिकता ची खोज ना करी, धार्मिकता हांसिल करली यानिकि वे धार्मिकता नु जको विश्‍वास लारे छै।

³¹ पर इस्राएली लौक जको धार्मिकता ची व्यवस्था ची खोज करते हुले वे व्यवस्था तक कोनी पुज़ले।

³² ऐवास्ते नी पोज़ सग़ले, कांकि वे विश्‍वासा लारे कोनी, पर कर्मा लारे ओची खोज करते रेहते, वाणे ओ ठोकर चे पत्थरा उपर ठोकर खाली।

³³ जिसड़े कि पवित्रशास्त्रा मां लिखले पले, “ङेखा, मैं सिय्योन मां ठोकर खाणे चा पत्थर, जको ठोकर खाणे ची चट्टान छै मेहले पला। ते जको ओचे उपर विश्‍वास करी, ऊं शर्मिन्दे नी हुवी।”