रोमियां 10 - ओङ राजपूतइस्राएल नु उद्धार ची जरुरत 1 हे माये भऊ, माये मना ची इच्छा ते वांचे वास्ते नरीकारा कनु माई प्राथना छै, कि इस्राएली लौक उद्धार पाओ। 2 कांकि मैं वांची ग़वाही ङिये कि, वानु नरीकारा ची धोन्न लाग़ली रिहे, पर ब़ुध्दिमानी लारे कोनी। 3 कांकि वे नरीकारा ची धार्मिकता लारे अणजाण हुती कर, आपणी धार्मिकता स्थापित करने चा जत्तन करती कर, नरीकारा ची धार्मिकता चे अधीन कोनी हुले। 4 मसीह ने व्यवस्था चा अन्त करला ताकि हर-हेक जको विश्वास करे, नरीकारा चे वास्ते धार्मिक हो। उद्धार सब चे वास्ते 5 कांकि मूसा ने ईं लिखले कि, “जको इन्सान वे धार्मिकता उपर जको व्यवस्था चा पालन करी ओ विचे लारे जीता रिही।” 6 पर जको धार्मिकता विश्वासा लारे छै, वा यूं किहे कि, “तु आपणे मना मां ईं ना किहो कि, ‘स्वर्ग़ा उपर कूण चढ़ी?’ ” यानिकि, मसीह नु धरती उपर तले उतारने वास्ते। 7 “जा, ‘पताला मां कूण उतरी?’ ” यानिकि, मसीह नु मरले आला महु जिवाती कर उपर आणने वास्ते। 8 पर पवित्रशास्त्र का किहे? ईं कि, “वचन दुधे गोढु छै, दुधे मुँहा मां ते दुधे मना मां छै।” हा ओही विश्वास चा वचन छै, जको अम्ही प्रचार करु वी। 9 कि अगर तु आपणे मुँहा लारे ईशु नु प्रभु जाणती कर मनती गिही ते आपणे मना लारे विश्वास करी, कि नरीकारा ने ओनु मरले आला महु जीते करले, ते तु पक्का ही उद्धार पावे। 10 कांकि धार्मिकता वास्ते मना लारे विश्वास करला जाये, ते उद्धार वास्ते मुँहा लारे अंगीकार करला जाये। 11 कांकि पवित्रशास्त्र ईं किहे, “जको कुई ओचे उपर विश्वास करी, ऊं शर्मिन्दे नी हुवी।” 12 यहूदिया मां ते नेरीया जातिया मां कुई भेद कोनी, ऐवास्ते कि ओ सब चा प्रभु छै। ते ओची दया वा सब चे वास्ते छै, जको ओचे ना गिहे, अपरम्पार छै। 13 कांकि, “जको कुई प्रभु चे नाम गिही, ओ उद्धार पावी।” 14 बल्ति जाये उपर वाणे विश्वास कोनी करला, वे ओचे नां किवें गिहे? ते जाई कोनी सुणली ओचे उपर किवें विश्वास करो? ते प्रचारक चे बिना किवें सुणो? 15 ते अगर प्रचारक भेज़ले ना जाओ, तां प्रचार किवें करे? जिसड़े कि पवित्रशास्त्रा मां लिखले पले, “वांचे पग़्ग़ कितने सुहावने छी, जको सुसमाचार सुणावी।” 16 पर सब ने ओ सुसमाचार उपर कान कोनी लाले। यशायाह भविष्यवक्ता किहे, “हे प्रभु, केहणे अम्चे समाचारा उपर विश्वास करला?” 17 ऐवास्ते विश्वास सुणने लारे, ते सुणने मसीह चे वचन लारे हुवे। 18 पर मैं किहे कि, “का वाणे अम्चा प्रचार कोनी सुणले?” सुणले तां सही, कांकि पवित्रशास्त्रा मां लिखले आले छै, “वांचे शब्द सारी धरती चे उपर, ते वांचे वचन संसारा चे कूणे तक पुज़ती गेले।” 19 बल्ति मैं किहे कि, “का इस्राएली लौक ना जाणते?” पेहले तां मूसा किहे, “मैं वां जातिया चे जरिये जको जातिया छी ही कोनी, तम्चे मना मां जलन पैदा करी, मैं हेक मूर्ख जाति चे जरिये तम्हानु गुस्सा ङिवावी।” 20 यशायाह भविष्यवक्ता बङी हिम्मती लारे किहे, “जको मनु ना सोधते, वाणे मनु पाती गेले, ते जको मनु पूछते वी ना, वांचे उपर मैं प्रकट हुती गेला।” 21 पर नरीकार इस्राएलीया चे बारे मां किहे, “मैं हर ङिओ हेक आज्ञा ना मनणे आली हठीली, ते वाद-विवाद करने आली प्रजा नु स्वीकार करने वास्ते हाथ फैलाली रेहला।” |
CC BY-NC-ND 4.0