प्रकाशितवाक्य 7 - ओङ राजपूत

इस्राएल चे एक लख चैवांलीस हजार लौक

¹ ऐचे बाद मैं धरती चे चाहरी कूणा उपर चार स्वर्ग़दूत भिले ङेखले, वे धरती चीया चाहरी हवाईया नु झड़ली भिलते कि धरती जा समुन्दर जा कुई दरख्ता उपर हवा ना चलो।

² बल्ति मैं हेक नेरे स्वर्ग़दूता नु जीते नरीकारा ची मौहर चले हुले उभरते कनु उपर आते ङेखले ओणे वां चाहरी स्वर्ग़दूता नु जानु धरती ते समुन्दर चे नुकसान करने चा अधिकार ङिला गेला हुता ऊंची अवाजी मां साङ मारती कर केहले,

³ “जब तक अम्ही आपणे नरीकारा चे दासा चे मत्थे उपर मौहर ना लाती गिहुं बल्ति तक धरती ते समुन्दर ते दरख्ता नु नुकसान ना पुचाजा।”

⁴ जाये उपर मौहर लाली गेली, मैं वांची गिणती सुणली यानि इस्राएल ची ऊलाद्धी चे सारे गोत्रा महु हेक लख चवालीस हजारा उपर मौहर लाली गेली।

⁵ यहूदा चे गोत्रा महु ब़ारहा हजारा उपर मौहर ङिली गेली, रुबेन चे गोत्रा महु ब़ारहा हजारा उपर, गाद चे गोत्रा महु ब़ारहा हजारा उपर।

⁶ अशोर चे गोत्रा महु ब़ारहा हजारा उपर, नप्ताली चे गोत्रा महु ब़ारहा हजारा उपर, मनश्शिह चे गोत्रा महु ब़ारहा हजारा उपर,

⁷ शमौन चे गोत्रा महु ब़ारहा हजारा उपर, लेवी चे गोत्रा महु ब़ारहा हजारा उपर, इस्साकार चे गोत्रा महु ब़ारहा हजारा उपर,

⁸ जबूलून चे गोत्रा महु ब़ारहा हजारा उपर, यूसुफ चे गोत्रा महु ब़ारहा हजार उपर, ते बिन्यामीन चे गोत्रा महु ब़ारहा हजारा उपर मौहर लाली गेली।

हेक बङी भीड़

⁹ ऐचे बाद मैं नजर करली, ते ङेखा, हर हेक जाति, ते कोल्‍ल, ते लौक ते भाषा महु हेक इसड़ी बङी भीड़, जानु कुई गेण ना सग़ते। चिट्टी ओढ़णी घाली आले ते आपणे हाथा मां खज्जी चा लड़ीया चले हुले सिंहासना चे सामणे ते मैमणे चे सामणे भिली।

¹⁰ ते बङी अवाजी लारे साङ मारती किहे, “उद्धार वास्ते अम्चे नरीकारा ची जको, सिंहासना उपर ब़ेहला ते मैमणे ची जय-जयकार हो।”

¹¹ ते सारे स्वर्ग़दूत, ओ सिंहासन ते प्राचीना ते चाहरी जीते जींया चे चुधारु भिले ले। बल्ति वे सिंहासना चे सामणे मत्थे टेकले ते नरीकारा नु ङण्डवत करती कर केहले,

¹² “इसड़े ही हो! अम्चे नरीकारा ची स्तुति ते महिमा ते ज्ञान ते धन्यवाद ते आदर ते सामर्थ ते ताकत युगानयुग बणली रिहो। आमीन!”

¹³ ऐचे उपर प्राचीना महु हेके ने मनु केहले “ये चिट्टी ओढ़णी घाली आले कूण छै? ते किठु आले?”

¹⁴ मैं ओनु केहले, “हे मालिक, तु ही जाणी।” ओणे मनु केहले, “ये वे छी जको बङे क्लेशा महु निकलती कर आले। यांणे आपणी-आपणी ओढ़णी मैमणे चे लुहींया लारे धोती कर चिट्टी करली।

¹⁵ येही वजह कनु वे नरीकारा चे सिंहासना चे सामणे छी ते ओचे मन्दरा मां रात-ङिओ ओची सेवा करी ते जको सिंहासना उपर ब़ेहला ओ वांचे उपर आपणा तम्बू तांणी।

¹⁶ वे बल्ति भुक्‍के ते तरसेले नी रिहे ते ना वांचे उपर चिटका, ना कुई गरमेस पड़ी।

¹⁷ कांकि मैमणे जको सिंहासना चे आधे मां छै वांची ङेखभाल करी, ते जीवन रूपी पाणीया चे सौत्ते चे गोढु गेहती गेले करी, ते नरीकार वांचीया आँखीया महु सारी हींजवे लूहती नाखी।”