प्रकाशितवाक्य 2 - ओङ राजपूतइफिसुस ची कलीसिया नु मसीह चा सनेसा 1 “इफिसुस ची कलीसिया चे दूता नु ईं लेख, “जको सात तारे आपणे सज़्ज़े हाथा मां गेहली फिरे ते सोने चे सात ङीवा चे जाला चे आधे मां फिरता रिहे, ओ ईं किहे पला कि, 2 मैं दुधे काम, ते दुधी मेहनत, ते दुधे सब्रा नु जाणे। ते ईं वी कि तु बुरे लौका नु ङेख ना सग़ी, ते जको आपणे आप नु प्रेरित किही, ते छी कोनी, वानु तु परखती कर कूड़े ङेखले। 3 तु सब्र करी ते माये नांवा वास्ते ङोख चते-चते थाकला कोनी। 4 पर मनु दुधे विरोध मां ईं केहणे कि तु आपणा पेहले जिसड़ा प्रेम छोड़ती ङिला छै। 5 ऐवास्ते चैता कर कि तु किठु ढेला आला छी, ते मन फिरा ते पेहले जिसड़े काम कर। अगर तु मन नी फिरावे, तां मैं दुधे गोढु आती कर दुधे जाला नु ओची जग़हा कनु हटाती नाखी। 6 पर हां दुधे मां हा बात तां छै, कि तु निकुलइयां चे कामा कनु खार करी, जाकनु मैं वी खार करे। 7 “जाये कान हो वे सुणती गिहो, कि आत्मा कलीसिया नु का किहे पला। “जको जीतती जई, मैं ओनु ओ जीवन चे दरख्ता कनु जको नरीकारा चे स्वर्ग़ लौक मां छै, फल खाणे नु ङी। स्मुरना ची कलीसिया नु मसीह चा सनेसा 8 “स्मुरना ची कलीसिया चे दूता नु ईं लेख, “जको पेहला ते आखरी छै, जको मरती गेलता, ते हमा जीता हुती गेला, ओ ईं किहे पला कि, 9 मैं दुधे क्लेश ते लाचारी नु जाणे, पर तु अमीर छी, ते जको लौक आपणे आप नु यहूदी किही ते छी कोनी, पर शैताना ची सभा छी, ते वांची निन्दा नु वी जाणे। 10 जको ङोख तनु भोग़णे हुवे वाकनु ना ङर। कांकि ङेखा, शैतान तम्हा महु कईयां नु कैदखाने मां नाखणे उपर छै, कि तम्ही परखले जावा ते तम्हानु ङस ङिहां तक क्लेश चवणे पड़े। मरणे तक विश्वासी बणले रिहा तां मैं तम्हानु जीवन चा मुग़ट ङी। 11 “जाये कान हो वे सुणती गिहो, कि आत्मा कलीसिया नु का किहे पला। “जको जीतती जई ओनु ङुजी मौत कनु नुकसान नी पुज़ी। पिरगमुन ची कलीसिया नु मसीह चा सनेसा 12 “पिरगमुन ची कलीसिया चे दूता नु ईं लेख, “जाये कनु ङुंहु धारी ते तेज तलवार छै, ओ ईं किहे कि, 13 मैं ईं जाणे कि तु ओठे रिही जिठे शैताना चा सिंहासन छै, तु माये नांवा उपर मजबूत रिही, ते माये उपर विश्वास करने मां वां ङिहां मां वी भांसु कोनी हटला जाये मां माया विश्वास लायक ग़वाह अन्तिपास, तम्चे आधे मां वे जग़हा उपर मारला गेला जिठे शैतान रिहे। 14 पर मनु दुधे विरोध मां कोच्छ बाता केहणीया, कांकि दुधे इठे कोच्छ इसड़े छी, जको बिलाम ची शिक्षा नु मनी, जेह्णे बालाक नु इस्राएलीया चे आग़ु ठोकर ची वजह राखणे सिखाले कि वे मूर्तिया उपर चढ़ालीया गेलीया चीजा खाओ, ते व्यभिचार करो। 15 यूंही दुधे इठे कोच्छ तां इसड़े छी, जको निकुलइयां ची शिक्षा नु मनी। 16 यानि मन फिरा, ना तां मैं दुधे गोढु जल्दी ही आती कर आपणे मुँहा ची तलवारी लारे वांचे लारे भीड़ी। 17 “जाये कान हो वे सुणती गिहो कि आत्मा कलीसिया नु का किहे पला। “जको जीतती जई, ओनु मैं लुकले आले मन्ने महु ङी, ते ओनु हेक चिट्टा पत्थर वी ङी, ते ओ पत्थरा उपर हेक नां लिखले आले हुवी, जानु ओचे गेहणे आले चे सिवाय नेरे कुई नी जाणी। थुआतीरा ची कलीसिया नु मसीह चा सनेसा 18 “थुआतीरा ची कलीसिया चे दूता नु ईं लेख, “नरीकारा चा पूत जाया आँख जाखते चे ज्वाला आलीकर छी, ते जाये पग़्ग़ उत्तम पित्तला आलीकर छी, ओ ईं किहे कि, 19 मैं दुधे काम, दुधा प्रेम ते विश्वास ते सेवा ते सब्रा नु जाणे ते ईं वी कि दुधे भांसले काम पेहला कनु बधती कर छी। 20 पर मनु दुधे विरोध ईं केहणे कि तु वे असतरी इजेबेल नु रिहुं ङी, जको आपणे आप नु भविष्यवक्तनी किहे, ते माये दासा नु व्यभिचार करने ते मूर्तिया चे आग़ु चढ़ालीया गेलीया चीजा खाणे सिखाती कर भरमाती ङिये। 21 मैं विनु मन फिरावणे वास्ते मौका ङिला, पर वा आपणे व्यभिचार कनु मन फिरावणे ना चाहवी। 22 ङेख मैं विनु बिमारी मां नाखे पला ते जको विचे लारे व्यभिचार करी अगर वे वी विचे सिरखरे कामा कनु मन नी फिरावे तां मैं वानु बङे क्लेशा मां नाखी। 23 मैं विचे ब़ाला नु मारती नाखी। बल्ति सारीया कलीसिया जाणती गिहे कि देल ते मना नु परखणे आला मैं ही छै। ते मैं तम्चे महु हर-हेक नु ओचे कामा चे अनुसार बदला ङी। 24 “पर तम्हानु थुआतीरा चे बाकि लौका नु जितने ये शिक्षा नु ना मनी ते वां बाता नु जानु शैताना चीया गेहरीया बाता किही ना जाणी, ईं किहे पला कि मैं तम्चे उपर नेरा बोझ नी नाखी। 25 पर हव्वे, जको तम्चे गोढु छै विनु माये आणे तक थामली रिहा। 26 जको जीतती जई ते माये कामा चे अनुसार आखरी तक करता रिहे मैं ओनु जाति-जाति चे लौका उपर अधिकार ङी। 27 ते ओ लोहे चा राज़ङण्ड चती कर वांचे उपर राज़ करी जिंवे करती माटी ची ठांवे चकनाचूर हुती जई मैं वी इसड़ा ही अधिकार आपणे ब़ा कनु गेहला छै। 28 ते मैं ओनु सवेले चे तारे आलीकर चमकावी। 29 “जाये कान हो वे सुणती गिहो कि आत्मा कलीसिया नु का किहे पला। |
CC BY-NC-ND 4.0