मरकुस 3 - ओङ राजपूत

सूखे हाथा आले बन्दे नु ठीक करले

¹ ईशु बल्ति प्राथनाघरा मां गेला, ओठे हेक बन्दे हुते जाया हेक हाथ सूकती गेलता,

² ते वे ईशु उपर दोष लावणे वास्ते ओची घात मां लाग़ले आले हुते कि ङेखु, ओ सब्त चे ङिओ ओनु ठीक करे के ना।

³ ओणे सूखले हाथा आले बन्दे नु केहले, “आधे मां खड़ा हो।”

⁴ ते ओणे केहले, “का सब्त चे ङिओ भले करने वाजिब छै जा बुरे करने, जीन्दगी नु बचावणे जा मारणे ?” पर वे चोप रेहले।

⁵ ईशु ने वांचे मना ची कठोरता कनु उदास हुती कर, वानु क्रोध लारे चारो-तरफ ङेखले, ते ओ बन्दे नु केहले, “आपणा हाथ आग़ु बढ़ा।” ओणे बढ़ाला, ते ओचा हाथ ठीक हुती गेला।

⁶ तब फरीसी ब़ाहर जती कर तुरन्त हेरोदियां चे लारे ओचे विरोध मां सलाह करली कि ओनु किवें करती खत्तम करु।

घणी भीड़ ईशु चे भांसु हुती

⁷ ईशु आपणे चैला लारे गलील ची झील सनु चाह्‍ला गेला, ते गलील कनु हेक बङी भीड़ ओचे भांसु टुरती पली,

⁸ ते यहूदिया ते यरुशलेम, इदुमिया,ते यरदन चे पार, ते सूर ते सैदा चे आस-पास कनु हेक बङी भीड़ ईं सुणती कर कि ओ किवें अचम्भे चे काम करे, ओचे गोढु आली।

⁹ ओणे आपणा चैला नु केहले, “भीड़ ची वजह हेक छोटी ब़ेड़ी माये वास्ते तियार रिहो कि वे मनु दब़ा ना सग़ो।”

¹⁰ कांकि ईशु ने ब़ोहत बिमारा नु ठीक करले हुते, ऐवास्ते जितने लौक बिमार पले हुते, ओनु हाथ लावणे वास्ते ओचे उपर ढी पलते।

¹¹ जिसे बेले जिसा बन्दा मां अशुद्ध आत्मा हुतीया, ईशु नु ङेखती कर ओचे पग़्ग़ा मां ढेती पड़तीया ते बल्ति चीकती कर केहतीया, “तु नरीकारा चा पूत छी।”

¹² ईशु ने वानु ब़ोहत चिताले कि मनु प्रकट ना करजा।

ईशु ने ब़ारहा नु चुणले

¹³ बल्ति ईशु पहाड़ा उपर चढ़ती गेला, ते जानु ओ चाहता, वानु आपणे गोढु हकारले, ते वे ओचे गोढु आले।

¹⁴ तब ओणे ब़ारहा चैला नु चुणती गेले ते वानु प्रेरित चा पद्द ङिला कि वे ओचे लारे-लारे रिहो, ते ओ वानु भेज़ो कि वे प्रचार करो।

¹⁵ ते दुष्टात्मा नु काढ़णे चा अधिकार राखो।

¹⁶ ते वे ये छी, शमौन, जाये नां ईशु ने पतरस राखले,

¹⁷ ते जबदी चा पूत याकूब ते याकूब चा भऊ यूहन्‍ना, जाये नां ओणे बुअनर्गिस यानि, “गरजण चे पूत।” राखले

¹⁸ ते अन्द्रियास, ते फिलिप्पुस, ते बरतुल्मै, ते मत्ती, ते थोमा, ते हलफई चा पूत याकूब, ते तद्दै, ते शमौन कनानी,

¹⁹ ते यहूदा इस्करियोती जेह्णे ईशु नु पकड़वाती वी ङिले।

ईशु ते शैतान

²⁰ बल्ति औ घरे आला। हेक वारी बल्ति इतनी भीड़ भेली हुली कि ईशु नु ते ओचे चैला नु रोटी खाणे चा समय कोनी मिड़ला।

²¹ जिसे बेले ओचे कुणम्बा चे बन्दा ने सुणले ओनु आपणे लारे गेहणे वास्ते टुरती पली, कांकि बन्दी किही पलती, “ऐचा चैता टिकाणे कोनी।”

²² शास्त्री वी जको यरुशलेम कनु आले हुते, ईं केहते, “ओचे मां शैतान छै, ते ओ दुष्टात्मा चे सरदार ची सहायता लारे दुष्टात्मा नु काढ़े।”

²³ ईशु ने वानु आपणे गोढु हकारले ते वानु मिसाल ङिली, “शैतान, शैताना नु किवें काढ़ सग़े?

²⁴ अगर कुई राज़ मां फूट पड़े, तां ओ राज़ किवें टिकती कर रेह सग़े?।

²⁵ ते अगर कुई घरा मां फूट पड़े, तां ऊं घर किवें टिकती रेह सग़ी?

²⁶ ऐवास्ते अगर शैतान आपणा ही विरोधी हुती कर आपणे मां फूट घाले, तां ओचा राज़ किवें बणला रिही? ओचा तां अन्त ही हुती जाये।

²⁷ पर कुई बन्दे, कुई ताकतवार चे घरा मां घिरती कर ओचा माल ना लूट सग़ी, जब तक कि पेहले ओ ताकतवार नु ना ब़ांथी गिहो, ते तब ओचे घर लूटती गिही।

²⁸ “मैं तम्हानु सच्‍च किहे पला कि, इन्साना ची ऊलाद्धी चे सारे पाप ते निन्दा जको करे, माफ करती ङिले जाये,

²⁹ पर जको कुई पवित्र आत्मा चे विरोध मां निन्दा करे, ऊं कङी वी माफ नी करले जई, बल्कि ओ अनन्त पाप चा अपराधी हुती जई।”

³⁰ ईशु ने हा वानु ऐवास्ते केहले हुते कि शास्त्र नु सिखावणे आली बन्दी किही पलती, “ऐचे मां कुई अशुद्ध आत्मा समाली आली छै।”

ईशु चा परिवार

³¹ तब ओची आई ते भऊ आली, ते ब़ाहरु भिले रेहती कर ओनु हकरवाले।

³² भीड़ ओचे आस-पास ब़ेहली हुती, ते वाणे ओनु केहले, “ङेख, दुधी आई ते दुधे भऊ ब़ाहरु तनु सोधी पली।”

³³ ओणे वानु उत्तर ङिला, “माई आई ते माये भऊ कूण छी?”

³⁴ ते वांचे उपर जको ओचे आस-पास ब़ेहली हुती, नजर ङेखती कर केहले, “ङेखा, माई आई ते माये भऊ ये छी।

³⁵ कांकि जको कुई नरीकारा ची इच्छा उपर चले, वे ही माये भऊ, ते ब़ेहण, ते आई छै।”