मरकुस 11 - ओङ राजपूत

यरुशलेम मां जीत चा प्रवेश

¹ जब वे यरुशलेम चे गोढु, जैतून पहाड़ा उपर बैतफगे ते बैतनिय्याह चे लारे आले तां ईशु ने आपणे चैला महु ङुंहु नु ईं केहती कर भेज़ले,

² “सामणे चे गांवा मां जावा, ते ओचे मां पुज़ते ही हेक गाहड़ी चे ब़च्‍चे, जाये उपर कङी कुई कोनी चढ़ले, ब़झले आले तम्हानु मिली। ओनु खोलती कर गेहती आवा।

³ ते अगर कुई तम्हा कनु पूछे, ‘ईं कां करा पले?’ तां केहजा, ‘प्रभु नु ऐची जरुरत छै,’ ते ओ तुरन्त ओनु इठे भेज़ती ङी।”

⁴ वाणे जती कर ओ ब़च्‍चे नु ब़हार दरवाजे चे गोढु चौका मां ब़झले आले ङेखले, ते खोलु लाग़ले।

⁵ वांचे महु जको ओठे भिले हुते, कुई-कुई किहुं लाग़ले, “ईं का करा पले, गाहड़ो चे ब़च्‍चे नु कां खोला पले?”

⁶ जिंवे ईशु ने केहले हुते, यूंही वाणे वानु केहती ङिले, तब लौका ने वानु जऊं ङिले।

⁷ वाणे ब़च्‍चे नु ओचे गोढु आणती कर ते ओचे उपर आपणी ओढ़णी नाखली ते ईशु ओचे उपर ब़ेसती रेहला।

⁸ ते ब़ोहत लौका ने आपणी ओढ़णी मार्ग़ा मां बिछाली ते नेरे लौका ने खेता महु लड़ीया बाढती-बाढती कर बिछाती ङिलीया

⁹ जको भीड़ ओचे आग़ु-आग़ु जती ते भांसु-भांसु आती हुली, ऊंची अवाजी मां किहे पलती, “होशना! धन्‍न छै ओ जको प्रभु चे नांवा लारे आवे पला।

¹⁰ अम्चे ब़ा दाऊद चा राज़ जको आवे पला,धन्‍न छै! आसमाना मां होशना।”

¹¹ ओ यरुशलेम शहरा मां पुज़ती कर ते मन्दरा मां आला, ते ओणे चारो-तरफ सब चीजा नु ङेखती कर ब़ारहा चैला चे लारे बैतनिय्याह गेला, कांकि आथण हुती गेलती।

ईशु चा अंजीर चे पेड़ा नु श्राप

¹² ङुजे ङिओ जब वे बैतनिय्याह कनु निकड़ले तां ईशु नु भोक्‍क लाग़ली।

¹³ ओ दूरी कनु सावे अंजीरा चे दरख्त ङेखती कर गोढु गेला कि का पता ओचे मां कोच्छ मिलो, पर पाना नु छोड़ती कोच्छ कोनी मिड़ले, कांकि फला चा समय कोनी हुता।

¹⁴ ऐचे उपर ओणे ओनु केहले, “हमा कनु कुई दुधा फल कङी नी खई!” ते ओचे चैले सुणी भिलते।

ईशु चे मन्दरा मां जाणे

¹⁵ बल्ति वे यरुशलेम आले, ते ओ मन्दरा मां गेला, ते जको लेन-देन करी पलते वानु ब़ाहर काढ़ु लाग़ला, ते सराफा चे तखत ते कबूतर बेचणे आला चा चौकीया पलटती नाखलीया।

¹⁶ ते ओणे मन्दरा ची चार दिवारी महु हुती कर कानु वी समान कोनी ढोऊं ङिला,

¹⁷ उपदेश करती कर वानु केहले, “का ईं कोनी लिखले आले छै माये घर सारीया जातिया वास्ते प्राथना चे घर किहवावी? पर तम्ही ओनु ङाकुवा ची घौर बणाती नाखली।”

¹⁸ ईं सुणती कर प्रधान याजक ते शास्त्री ओनु खत्तम करने चा मौका सोधी पलते, कांकि वे ओचे कनु ङरते, ऐवास्ते कि सारे लौक ओचे उपदेश कनु अचम्भे मां हुती जते।

¹⁹ बल्ति आथण हुवणे आले हुते, वे शहरा कनु ब़ाहरु निकलती गेले।

सूखले आले अंजीरा चे पेड़ा ची मिसाल

²⁰ आग़ले ङिओ सवेले जिसे बेले ईशु आपणे चैला लारे जाये पलता ते वाणे ओ अंजीर चे पेड़ा नु ज़हड़े तक सूखले आले ङेखले।

²¹ पतरस नु हा बात याद आली, ते ओणे ओनु केहले, “हे रब्बी, ङेख! ईं अंजीरा चे दरख्त जानु तु श्राप ङिला हुता, सूखती गेले।”

²² ईशु ने ओनु उत्तर ङिला, “नरीकारा उपर, विश्‍वास राखा।

²³ मैं तम्हानु सच्‍च किहे पला कि जको कुई ऐ पहाड़ा नु किहे, ‘तु उखड़ती जा, ते समुन्दरा मां जती पड़,’ ते आपणे मना मां शक्‍क ना करा, बल्कि विश्‍वास करा कि जको किहे पला ऊं हुती जई, तां ओचे वास्ते ऊंही हुवी।

²⁴ ऐवास्ते मैं तम्हानु किहे पला कि जको कोच्छ तम्ही प्राथना करती मांगा, तां विश्‍वास करती गिहा कि तम्हानु मिलती गेले, ते तम्चे वास्ते हुती जई।

²⁵ ते जिसे बेले तम्ही प्राथना करने वास्ते खड़े हुवा, तां अगर तम्चे मना मां काये दारक कोच्छ विरोध हो, तां माफ करा, ऐवास्ते कि तम्चा स्वर्ग़ीय ब़ा वी तम्चे अपराधा नु माफ करो।

²⁶ ते अगर तम्ही माफ ना करा तां तम्चा ब़ा वी जको स्वर्ग़ा मां छै, तम्चे अपराधा नु माफ नी करी।”

ईशु चे अधिकारा उपर यहूदी नेता चा शक्‍क

²⁷ वे बल्ति यरुशलेम मां आले ते जब ओ मन्दरा मां घूमता फिरेला, तां प्रधान याजक ते शास्त्री ते बङका ने ओचे गोढु आती कर पूछले,

²⁸ “तु ईं काम काये अधिकारा लारे करी ? ते हा अधिकार तनु केहणे ङिला कि तु ईं काम करी?”

²⁹ ईशु ने वानु केहले, “मैं वी तम्हा कनु हेक बात पूछे पला, मनु उत्तर ङिया तां मैं तम्हानु बावड़ी कि ईं काम किसे अधिकारा लारे करे।

³⁰ यूहन्‍ना चा बपतिस्मा स्वर्ग़ा ची ओर कनु हुता जा इन्साना ची ओर हुता। मनु उत्तर ङिया।”

³¹ वे आपस मां तर्क करु लाग़ले, “अगर अम्ही किहुं, ‘स्वर्ग़ा ची ओर कनु,’ तां ओ किही, ‘बल्ति तम्ही ओचा विश्‍वास कां कोनी करला?’

³² ते अगर अम्ही किहुं, ‘इन्साना ची ओर कनु,’ ” लौका चा ङर छै, कांकि वे सच्‍चमां जाणी कि यूहन्‍ना भविष्यवक्‍ता हुता।

³³ तां वाणे ईशु नु उत्तर ङिला, “अम्ही ना जाणु।” ईशु ने वानु केहले, “मैं वी तम्हानु ना बावड़ी कि ईं काम किसे अधिकारा लारे करे।”