मत्ती 8 - ओङ राजपूत

कोहड़ीया नु ठीक करले

¹ जिसे बेले ईशु पहाड़ा कनु तले उतरला, तां हेक बङी भीड़ ओचे भांसु टुरती पली।

² ते ङेखा, हेक कोहड़ी, गोढु आतीकर ओनु प्रणाम करले ते केहले, “हे प्रभु, अगर तु चाहवी, तां मनु शोद्ध कर सग़ी।”

³ ईशु ने आपणा हाथ बढ़ाती कर ओनु छूले ते केहले, “मैं चाहवे तु शोद्ध हुती जा।” ते ओ तुरन्त कोहड़ कनु शोद्ध हुती गेला।

⁴ ईशु ने ओनु केहले, “ङेख, कानु कहीं ना किहो, पर जती कर आपणे आप नु याजक नु ङिखाण ते जको चढ़ावा मूसा भविष्यवक्‍ता ने ठहराला छै ओ भेंट चढ़ा, ताकि लौका चे वास्ते ग़वाही हो।”

रोमी सूबेदार चा भरोसा

⁵ जिसे बेले ईशु कफरनहूम मां आला, तां हेक रोमी सूबेदार ओचे गोढु आतीकर ओकनु बिनती करली,

⁶ “हे प्रभु, माया हेक दास घरा मां लकवे ची बिमारी लारे ब़ोहत ङुखी पला।”

⁷ बल्ति ईशु ने रोमी सूबेदारा नु केहले, “मैं आती कर ओनु ठीक करी।”

⁸ रोमी सूबेदारा ने उत्तर ङिला, “हे प्रभु, मैं ऐस लायक कोनी कि तु माई छत्ते तले आ, पर सेर्फ मुँहा लारे केहती ङे तां माया दास ठीक हुती जई।

⁹ कांकि मैं वी प्रायधीन इन्सान छै, ते सिपाही माये अधीन छी। जब मैं हेके नु किहे, ‘जा,’ तां ओ चाह्‍ला जाये, ते ङुजे नु किहे, ‘आ,’ तां ओ आती जाये। ते जब आपणे कुई दासा नु किहे, ‘ईं कर,’ तां ओ करे।”

¹⁰ ईं सुणती कर ईशु नु अचम्भा हुला, ते जको ओचे भांसु आवी पलते वानु केहले, “मैं तम्हानु सच्‍च किहे पला कि मैं इस्राएल मां वी इसड़ा विश्‍वास कोनी ङेखला।

¹¹ ते मैं तम्हानु किहे पला कि पूरब ते पक्षिम कनु ब़ोहत से लौक आती कर अब्राहम ते इसहाक ते याकूब चे लारे स्वर्ग़ चे राज़ मां ब़ेसे।

¹² पर इस्राएली लौक जको आपणे आप नु नरीकारा चे पूत समझी, वे ही लौक ब़ाहरु अन्धारे मां नाखती ङिले जाये, जिठे रोवणे ते ङांत पीसणे हुवी।”

¹³ ते ईशु ने रोमी सूबेदारा नु केहले, “जा, जिंवे दुधा विश्‍वास छै, यूंही दुधे वास्ते हो।” ते ओचा सेवक ओही बेले ठीक हुती गेला।

ईशु ने बिमारा नु ठीक करले

¹⁴ ईशु जिसे बेले पतरस चे घरे आला,तां ओणे ओची सासवे नु बुखारा मां पले ङेखले।

¹⁵ ईशु ने विचा हाथ छूला ते विचे बुखार उतरती गेले, ते वा उठती कर ओची सेवा-टहल करु लाग़ली।

¹⁶ जब आथण हुले तब वे ओचे गोढु ब़ोहत से लौका नु आणले जाये मां दुष्टात्मा हुतीया, ते ईशु ने वा दुष्टात्मा नु वचना लारे काढ़ती छोड़ले, ते सब बिमारा नु ठीक करले।

¹⁷ ताकि जको वचन यशायाह भविष्यवक्‍ता चे जरिये लिखला गेलता ला ओ पूरा हो, “कि ओणे अम्चीया कमजोरीया नु आपणे उपर गेहती गेलीया, ते अम्चीया बिमारीया नु चती गेले।”

ईशु चे भांसु टुरणे चा मोल

¹⁸ ईशु ने जब आपणे चारो ओर हेक बङी भीड़ ङेखली तां झील चे ओस पार चैला नु जाणे ची आज्ञा ङिली।

¹⁹ तब हेक शास्त्रीया ने ओचे गोढु आती कर ओनु केहले, “हे गुरु, जिठे-किठी तु जाये, मैं दुधे भांसु टुरती पड़ी।”

²⁰ ईशु ने ओनु केहले, “लोमड़ीया चीया घौरा ते आसमाना चे पखीयां चे बसेरे हुवी, पर मैं इन्सान चे पूता वास्ते ठोङ मेहलणे ची वी जग़हा कोनी छै।”

²¹ हेक नेरे चैले ने ओनु केहले, “हे प्रभु, मनु पेहले जऊं ङे कि आपणे ब़ा नु दफनाती ङिये।”

²² ईशु ने ओनु केहले, “तु माये भांसु टुरती पड़, ते मुड़दा नु आपणी मुड़दी दफनाऊ ङे, कांकि वाकनु हमेशा चा जीवन कोनी।”

लहरा नु ते अन्धारी नु शान्त करने

²³ जिसे बेले ओ ब़ेड़ी उपर चढ़ला, तां ओचे चैले ओचे भांसु टुरती पले।

²⁴ ते ङेखा, झील मां हेक इसड़ा बङा तुफान ऊठला कि ब़ेड़ी लहरा लारे ढिकिजु लाग़ली, ते ईशु नूहला पलता ला।

²⁵ बल्ति चैला ने गोढु आती कर ओनु जग़ाले ते केहले, “हे प्रभु, अम्हानु बचा! अम्ही नाश हुले जऊं।”

²⁶ ईशु ने वानु केहले, “हे अल्पविश्‍वासी लौक, कां ङरा पले?” बल्ति ओ खड़ा हुती कर अन्धारी नु ते पाणीया नु दड़काले, ते सब शान्त हुती गेले।

²⁷ ते वे अचम्भा करती कर किहुं लाग़ले, “ईं किसड़े इन्सान छै कि अन्धारी ते पाणी वी ऐची आज्ञा मनी।”

ईशु गदरेनियो चे देशा मां

²⁸ जिसे बेले ओ नेरे पासु गदरेनियो चे देशा मां पुज़ला, तां ङोन इन्साने जाये मां दुष्टात्मा हुतीया कब्रा महु निकलते हुले ओनु मिड़ले। वे इतने खतरनाक हुते कि कुई ओ मार्ग़ा कनु जा ना सग़ते।

²⁹ वाणे रौल मचाती कर केहले, “हे नरीकारा चा पूत, अम्चे दुधे कनु का काम? का तु समय कनु पेहले अम्हानु ङोख ङिऊं इठे आती गेला?”

³⁰ वाकनु कोच्छ दूर हेक बङा सूअरा चा झोण्ड चरे भीलता।

³¹ दुष्टात्मा ने ओनु ईं केहती कर बिनती करली, “अगर तु अम्हानु काढ़ी, तां सूअरा चे झुन्डा मां भेज़ती ङे।”

³² ईशु ने वानु केहले, “जावा,” वे निकलती कर सूअरा मां रम्मती गेले, ते ङेखा, सारा सूअरा चा झोण्ड कड़ाड़े उपर कनु झटपट पाणीया मां जती पला ते ब़ुङती मरती गेला।

³³ वांचे आजड़ी द्रोड़ती कर गेले वाणे शहर ते गांवा मां जती कर सारीया बाता ते जाये मां दुष्टात्मा हुतीया वांचा सारा हाल केहती सुणाला।

³⁴ तब सारे शहरा चे लौक ईशु नु मिलणे वास्ते निकलती आले, ते ईशु नु ङेखती कर बिनती करली कि, “अम्ची हद्दी कनु ब़ाहर चाह्‍ला जा।”