मत्ती 20 - ओङ राजपूत

बाड़ी चे मजदूरा ची मिसाल

¹ “स्वर्ग़ा चा राज़ कुई खेता चे मालिका आलीकर छै जको सवेले निकड़ला कि आपणी अंगूरा ची बाड़ी मां मजदूरा नु लावे।

² ओणे मजदूरा लारे हेक चान्दी चा सिक्‍का रोजा चा ठहराला ते वानु आपणी अंगूरा ची बाड़ी मां काम करने चे वास्ते भेज़ले।

³ बल्ति ओणे सवेले करीब नवें बजे जिसे बेले ओ ब़ाहरु आला, ते नेरा लौका नु बजारा मां बेकार भिले आले ङेखले, जको यूंही बेकार भिलते ले।

⁴ ते ओणे वानु केहले, ‘तम्ही वी अंगूरा ची बाड़ी मां जावा, ते जको कोच्छ ठीक छै, ऊं तम्हानु ङिही।’ बल्ति वे वी काम करने चे वास्ते गेले।

⁵ बल्ति ओणे ब़ारहा बजे आला लारे, ते तीन बजे आला लारे लगभग ब़ाहरु निकलती कर इसड़े ही करले।

⁶ लगभग पाँचे बजे वापिस ब़ाहर निकलती कर ओणे ङुजा बन्दा नु ओठे खड़े ङेखले ते वानु केहले, ‘का तम्ही इठे ङिओ भर बेकार मां खड़े रेहले?’

⁷ वाणे ओनु केहले, ‘कांकि अम्हानु मजदूरी उपर कोनी लाले।’ ओणे वानु केहले, ‘तम्ही वी अंगूरा ची बाड़ी मां काम करने चे वास्ते जावा।’

⁸ “आथणा चे अंगूरा ची बाड़ी चे मालिका ने आपणे मुनीम नु केहले, ‘मजदूरा नु हकारती कर पिछला कनु लाती आग़ला तक वानु मजदूरी ङिती ङे।’

⁹ करीब पाँचे बजे आथणा चे समय उपर जको मजदूरी उपर लाले गेलते ले, वे आले ते वानु हेक चान्दी चा सिक्‍का मिड़ला।

¹⁰ जको पेहले आलते ले, वाणे हा समझले कि अम्हानु याकनु ज्यादा मिली, बल्ति वानु वी हेक-हेक चान्दी चा सिक्‍का मिड़ला।

¹¹ जिसे बेले वानु मिड़ला तां वे घरा चे मालिका उपर कुड़कुड़ाती कर किहुं लाग़ले,

¹² ‘यां पिछला ने तां हेक ही घण्टा काम करले, याहनु वी तु अम्चे बराबर करती ङिले, अम्ही जको सारा ङिओ तपते चिटके मां मेहनत करली।’

¹³ “ओणे वांचे महु हेक नु उत्तर ङिला, ‘हे दोस्त, मैं दुधे लारे कुई अन्याय कोनी करला। का तु माये लारे हेक चान्दी चा सिक्‍का कोनी ठहराला हुता ?

¹⁴ जको दुधा छै, चती ते चाह्‍ला जा, माई इच्छा हा छै कि जितना तनु ङिये उतने ही यां भांसला नु ङिये।

¹⁵ का हा ठीक कोनी कि मैं आपणे धन लारे जको चाहवे ऊं करे? का माये भले हुवणे चे वजह तु जलन का राखी?’

¹⁶ “यूं करती जको भांसु छी, वे पेहले हुवे, ते जको पेहले छी, वे भांसु हुवे।”

आपणी मौत चे बारे मां ईशु ची तीजी भविष्यवाणी

¹⁷ यरुशलेम नु जते हुले ओणे ब़ारहा चैला नु हेकले मां गेहती गेला, ते मार्ग़ा मां वानु किहुं लाग़ला,

¹⁸ “ङेखा, अम्ही यरुशलेम नु जऊं पले, ते मैं इन्साना चा पूत प्रधान याजका ते शास्त्रीया चे हाथा मां पकड़वाला जई, ते वे ओनु मारणे चे लायक ठहरावे।

¹⁹ ते ओनु नेरीया जातिया चे हाथा मां सोंपे कि वे ओनु ठठा मां उङारो ते कोड़े मारो ते क्रूसा उपर चढ़ाओ, ते ओ तीजे ङिओ जीता करला जई।”

हेकी आई ची बिनती

²⁰ बल्ति जबदी चे सब पूता ची आई ने, आपणे पूता चे लारे ईशु चे गोढु आती कर प्रणाम करला, ते ओकनु कोच्छ मांगु लाग़ली।

²¹ ओणे वानु केहले, “तु का चाहवी?” वा ओचे लारे ब़ोली, “हा वचन ङे कि माये ये ङोन पूत दुधे राज़ मां हेक दुधे सज़्ज़े पासु ते हेक दुधे खब़्ब़े पासु ब़ेसो।”

²² ईशु ने उत्तर ङिला, “तम्ही ना जाणा कि का मांगा पले। जको मुंगर मैं पीणे उपर छै, का तम्ही पी सग़ा?” वाणे ओनु केहले, “पी सग़ु।”

²³ ईशु ने वानु केहले, “तम्ही माया मुंगर तां पीया, पर आपणे सज़्ज़े पासु ते आपणे खब़्ब़े पासु कानु ब़िसाणने माये काम कोनी, पर जाये वास्ते माये ब़ा नरीकारा ची ओर कनु तियार करले गेले, वांचे वास्ते छै।”

²⁴ ईं सुणती कर ङस चैले वां ङुंहु भावां उपर गुस्से हुले।

²⁵ ईशु ने वानु गोढु हकारती कर केहले, “तम्ही जाणा कि नेरीया जातिया चे हाकिम वांचे उपर प्रभुता करी, ते जको बङे छी, वे वांचे उपर अधिकार जतावी।

²⁶ पर तम्चे मां इसड़े नी हुवी। पर जको कुई तम्चे मां बङे हुवणे चाहवे, ओ तम्चा सेवक बणो।

²⁷ ते जको तम्चे मां प्रधान हुवणे चाहवे, ओ तम्चा दास बणो।

²⁸ जिंवे कि मैं इन्साना चा पूत, ऐवास्ते कोनी आला कि ओची सेवा-टहल करली जाओ, पर ऐवास्ते आला कि आप सेवा-टहल करो, ते ब़ोहता नु छुड़ावणे वास्ते आपणे प्राण ङियो।”

ङोन अन्धा नु आंखीया चा दान

²⁹ जिसे बेले वे यरीहो शहरा कनु निकली पलते, तां हेक बङी भीड़ ईशु चे भांसु टुरती पली।

³⁰ ते ङोन अन्धे, जको सड़के चे किनारे ब़ेहले हुते, ईं सुणती कर कि ईशु जाये पला, साङ मारती कर किहुं लाग़ले, “हे प्रभु, दाऊद ची ऊलाद्ध, अम्चे उपर दया कर!”

³¹ लौका ने वानु दड़काले कि चोप रिहो, पर वे होर वी रौल मचाती कर ब़ोले, “हे प्रभु, दाऊद ची ऊलाद्ध, अम्चे उपर दया कर।”

³² तब ईशु ने खड़े हुती कर, वानु हकारले ते केहले, “तम्ही का चाहवा कि मैं तम्चे वास्ते करे?”

³³ वाणे ओनु केहले, “हे प्रभु, ईं कि अम्चीया आंखी खुलती जाओ।”

³⁴ ईशु ने तरस खाती कर वांचीया आंखीया नु छूले, ते वे तुरन्त ङेखु लाग़ती गेले, ते ओचे भांसु टुरती पले।