मत्ती 16 - ओङ राजपूत

स्वर्ग़ीय निशानी ची मांग

¹ फरीसी ते सदूकिया ने गोढु आती कर ईशु नु परखणे वास्ते ओनु केहले, “अम्हानु स्वर्ग़ा चा कुई चैन्ह ङिखाण।”

² ओणे वानु उत्तर ङिला, “आथणे तम्ही किहा, ‘मौसम आच्छा रिही, कांकि आसमान लाल छै,’

³ ते सवेले किहा, ‘आज़ अन्धारी आवी, कांकि आसमान लाल ते धुंधला छै।’ तम्ही आसमाना चे लक्षण ङेखती कर ओचा भेद बावड़ सग़ा, पर समय चे चैन्हा चा भेद कां ना बावड़ सग़ा?

⁴ ऐ युगा चे बुरे ते व्यभिचारी लौक चैन्ह सोधणा चाहवी, पर योना भविष्यवक्‍ता चा चैन्ह छोड़ती कुई नेरा चैन्ह वानु नी ङिला जई।” ते ईशु वानु छोड़ती कर चाह्‍ला गेला।

फरीसिया ते सदूकिया ची शिक्षा चा खमीर

⁵ ईशु चे चैले झील चे ओ पासु पुज़ले, ते वे रोटी आणने भूलती गेलते।

⁶ ईशु ने वानु केहले, “ङेखा, फरीसिया ते सदूकिया चे खमीर कनु चौकस रेहजा।”

⁷ वे आपस मां विचार करु लाग़ले, “अम्ही रोटी कोनी आणली ऐवास्ते ओ इसड़े किहे पला।”

⁸ ईं जाणती कर, ईशु ने वानु केहले, “हे अल्पविश्‍वासी, तम्ही आपस मां कां विचार करा पले कि अम्चे कनु रोटी कोनी?

⁹ का तम्ही हमा तक कोनी समझले? का तम्हानु वां पाँचा हजारा चा पाँच रोटीया याद कोनी, ते ना ईं कि तम्ही कितने टोकरे चले हुते?

¹⁰ ते ना वा चार हजारा चे वास्ते सात रोटीया, ते ना ईं कि तम्ही कितने टोकरे भरती कर चले हुते?

¹¹ तम्ही कां कोनी समझले कि मैं तम्हानु रोटीया चे बारे मां कोनी केहले, पर ईं कि तम्ही फरीसिया ते सदूकिया चे खमीरा कनु चौकस रिहा।”

¹² बल्ति वांची समझी मां आले कि ओणे रोटी चे खमीर कनु कोनी, पर फरीसिया ते सदूकिया ची शिक्षा कनु चौकस रेहणे वास्ते केहले हुते।

पतरस चे ईशु नु मसीह स्वीकार करने

¹³ ईशु कैसरिया फिलिप्पी चे प्रदेसा मां आला, ते आपणे चैला कनु पूछले, “लौक मैं इन्साना चे पूता नु का किही ?”

¹⁴ वाणे केहले, “कुई तां यूहन्‍ना बपतिस्मा ङेणे आला किही। ते कुई एलिय्याह ते कुई यिर्मयाह जा भविष्यवक्‍ता महु कुई हेक किही।”

¹⁵ ईशु ने वानु केहले, “पर तम्ही मनु का किहा ?”

¹⁶ शमौन पतरस ने उत्तर ङिला, “तु जीते नरीकारा चा पूत मसीह छी।”

¹⁷ ईशु ने ओनु उत्तर ङिला, “हे शमौन, योना चा पूत, तु धन्‍न छी, कांकि मांस ते लुहींया ने ना पर माये ब़ा नरीकारा ने जको स्वर्ग़ा मां छै, हा बात दुधे उपर उजागर करली।

¹⁸ ते मैं वी तनु किहे पला कि तु पतरस छी, ते मैं ऐ पत्थरा उपर आपणी कलीसिया बणावी, ते अधोलोक चे फाटक ओचे उपर हावी नी हुवी।

¹⁹ मैं तनु स्वर्ग़ा चे राज़ चीया कुंजीया ङिही, ते जको कोच्छ तु धरती उपर ब़ांधे, ऊं स्वर्ग़ा मां ब़झी, ते जको कोच्छ तु धरती उपर खोले, ऊं स्वर्ग़ा मां खुली।”

²⁰ तब ओणे चैला नु चिताले कि, “कानु ना केहजा कि मैं मसीह छै।”

आपणी मौत चे बारे मां ईशु ची भविष्यवाणी

²¹ ओ समय कनु ईशु आपणे चैला नु बावड़ु लाग़ला, “जरुरी छै कि मैं यरुशलेम नु जाये, ते बङके, ते प्रधान याजका, ते शास्त्री मनु ब़ोहत ङोख ङियो ते मारती नाखो, ते तीजे ङिओ जीता हुती जाये।”

²² ऐचे उपर पतरस ओनु अलग़ गेहती कर झिड़कु लाग़ला, “हे प्रभु, नरीकार ना करो! दुधे लारे इसड़े कङी नी हुवी!”

²³ ईशु ने मुड़ती कर पतरस नु केहले, “हे शैतान, माये सामणे कनु दूर हो! तु माये वास्ते ठोकर ची वजह छी। कांकि तु नरीकारा चीया बाता उपर ना, पर तु इन्साना चीया बाता उपर मन लावी।”

ईशु चे भांसु टुरणे चा मतलब

²⁴ बल्ति ईशु ने आपणे चैला नु केहले, “अगर कुई माये भांसु आणा चाहवे, तां आपणे आप कनु इन्कार करो, ते आपणा क्रूस चती कर माये भांसु हुती पड़ो।

²⁵ कांकि जको कुई आपणी जीन्दगी नु बचावणा चाहवे, ओ विनु गुंती ब़ेसी। पर जको कुई माये वास्ते आपणी जीन्दगी नु गुंवी, ओ विनु बचावी।

²⁶ अगर इन्सान सारे संसारा नु हांसिल करे, तां आपणी जीन्दगी चे नुकसान चवे, तां ओनु का फायदा हुवी? जा इन्सान आपणी जीन्दगी चे बदले का ङी?

²⁷ मैं इन्साना चा पूत, स्वर्ग़दूता लारे आपणे ब़ा नरीकारा ची महिमा मां आवी, ओ समय उपर, हर हेक नु ओचे कामा चे अनुसार प्रतिफल ङिही।

²⁸ मैं तम्हानु सच्‍च किहे पला कि जको भिले, वांचे महु कोच्छ इसड़े छी कि जब तक मैं इन्साना चे पूता नु ओचे राज़ मां आते हुले नी ङेखती गिहे, तब तक मौत चा स्वाद कङी नी चाखे।”