मत्ती 15 - ओङ राजपूत

परम्परा पालन चा सवाल

¹ बल्ति यरुशलेम कनु कोच्छ फरीसी ते शास्त्री ईशु चे गोढु आती कर किहुं लाग़ले,

² “दुधे चैले पुरखा ची परम्परा नु कां टाली? कि बिना हाथ धोले रोटी खई?”

³ ईशु ने वानु उत्तर ङिला, “तम्ही वी आपणी परम्परा ची वजह कां नरीकारा ची आज्ञा टालती ङिया?

⁴ कांकि नरीकारा ने केहले, ‘आपणे ब़ा ते आपणी आई चा कद्दर करजा,’ ते ‘जको कुई ब़ा जा आई नु बुरे किहो, ऊं मारती नाखले जाओ।’

⁵ पर तम्ही किहा कि अगर कुई आपणे ब़ा जा आई नु किहो, ‘जको कोच्छ तम्हानु माये कनु फायदा हो सग़ेला, ओ नरीकारा नु भेंट चढ़ाती चुकला।’

⁶ तां ओ आपणे ब़ा चा कद्दर ना करो, यूं करती तम्ही आपणी परम्परा ची वजह नरीकारा चा वचन टालती ङिला।

⁷ तम्चे कप्पटीयां चे बारे मां! यशायाह भविष्यवक्‍ता ने हा भविष्यवाणी ठीक करली।

⁸ ‘ईं लौक होठा लारे तां माया कद्दर करी, पर वांचे मन माये कनु दूर रिहे।

⁹ ते ये बेकार मां माई अराधना करी, कांकि इन्साना ची विधिया नु धर्म उपदेश करती कर सिखावी।’ ”

अशुद्ध करने आलीया बाता

¹⁰ बल्ति ईशु ने लौका नु आपणे गोढु हकारती कर वानु केहले, “सुणा, ते समझा।

¹¹ जको मुँहा मां जाये, ऊं इन्साना नु अशुद्ध ना करी, पर जको मुँहा महु निकले, ऊंही इन्साना नु अशुद्ध करे।”

¹² बल्ति चैला ने आती कर ओनु केहले, “का जाणी वी कि फरीसिया ने हा वचन सुणती कर कितनी ठोकर खाली?”

¹³ ईशु ने उत्तर ङिला, “हर दरख्त जको माये स्वर्ग़ीय ब़ा ने कोनी लाले, ऊं उखाड़ले जई।

¹⁴ वानु जऊं ङिया, वे अन्धे मार्ग़दर्शक छी। ते अगर अन्धा, अन्धे नु मार्ग़ ङिखाणे तां ङोनी ही खङे मां ढेती पड़े।”

¹⁵ ईं सुणती कर पतरस ने ओनु केहले “हा मिसाल अम्हानु समझाती ङे।”

¹⁶ ईशु ने केहले, “का तम्ही हमा तक ना समझ छिवा?

¹⁷ का तम्ही ना जाणा कि जको कोच्छ मुँहा मां जाये ऊं ढिड्डा मां जाये, ते संडास चे जरिये निकलती जाये?

¹⁸ पर जको कोच्छ मुँहा कनु निकले, ऊं मना कनु निकले ते ऊंही इन्साना नु अशुद्ध करे।

¹⁹ कांकि बुरे विचार, हत्या, परअसतरी गमन, व्यभिचार, चोरी, कूड़ी ग़वाही ते निन्दा मना कनु ही निकले।

²⁰ येही छी जको इन्साना नु अशुद्ध करी, पर बिना हाथ धोले रोटी खाणे इन्साना नु अशुद्ध ना करी।”

कनानी असतरी चा विश्‍वास

²¹ ईशु उठु निकलती कर, सूर ते सैदा चे प्रदेस सनु चाह्‍ला गेला।

²² ओ प्रदेसा महु हेक कनानी असतरी निकड़ली, ते रौल मचाती कर किहुं लाग़ली, “हे प्रभु! दाऊद ची ऊलाद्ध, माये उपर दया कर! माई छुवेरी नु दुष्टात्मा ब़ोहत सतावे पली।”

²³ पर ईशु ने विनु कहीं वी उत्तर कोनी ङिला। बल्ति ओचे चैला ने आती कर ओकनु बिनती करली, “विनु विदा कर, कांकि वा आपणे भांसु रौल मचाती आवे पली।”

²⁴ ईशु ने उत्तर ङिला, “इस्राएल चे घराणे चीया गार हुलीया आलीया भेङा नु छोड़ती कर मैं काये कनु वी कोनी भेज़ला गेला।”

²⁵ पर वा आली, ते ईशु नु प्रणाम करती कर किहुं लाग़ली, “हे प्रभु, माई सहायता कर।”

²⁶ ईशु ने उत्तर ङिला, “ब़ाला ची रोटी चती कर कुत्ता चे आग़ु नाखणी ठीक कोनी।”

²⁷ विणे केहले, “सच्‍च छै प्रभु, पर कुत्ते वी ओ चूरा-चारा खाती गिही, जको वांचे स्वामीया चे मेजा तले ढेती पड़ी।”

²⁸ ऐचे उपर ईशु ने विनु उत्तर ङिला, “हे असतरी, दुधा विश्‍वास बङा छै, जिसड़े तु चाहवी, दुधे वास्ते उसड़े ही हो।” ते विची छुवेर वेही घड़ी कनु ठीक हुती गेली।

घणा रोग़ीया नु चंगे करने

²⁹ ईशु उठु कनु गलील ची झील चे गोढु आला, ते पहाड़ा उपर चढ़ती कर ब़ेसती रेहला।

³⁰ बल्ति हेक बङी भीड़ पे भीड़ ओचे गोढु आली, वे आपणे लारे, लंगड़ा नु, अन्धा नु, गूंगा नु, टुन्डा नु ते नेरे ब़ोहता नु ओचे गोढु आणले, ते वानु ओचे पग़्ग़ा उपर नाखती ङिले, ते ओणे वानु ठीक करले।

³¹ जिसे बेले लौका ने ङेखले कि गूंगे ब़ोली, ते टुन्डे ठीक हुवी, ते लंगड़े टुरु पड़ती जई, ते अन्धे ङेख सग़ी तां अचम्भा करती कर इस्राएल चे नरीकारा ची बढ़ाई करली।

चार हजार लौका नु खुलावणे

³² ईशु ने आपणे चैला नु हकारती कर केहले, “मनु ये भीड़ी उपर तरस आवे पला, कांकि वे तीन ङिहां कनु माये लारे छी ते यांचे कनु कोच्छ खाणे वास्ते कोनी, वानु भुक्‍के भेज़ती ङिये मैं ईं ना चाहवी, कङी इसड़े ना हो कि मार्ग़ा मां थाकती कर रेहती जाओ।”

³³ चैला ने ओनु केहले, “अम्हानु ऐ बरब्यान जग़हा मां इतनीया रोटीया किठु मिले कि अम्ही इतनी बङी भीड़ी नु रज़ा सग़ु?”

³⁴ ईशु ने वाकनु पूछले, “तम्चे कनु कितनीया रोटीया छी?” वाणे केहले, “सात, ते थोड़ीया जा छोटीया माछलीया।”

³⁵ बल्ति ईशु ने लौका नु भोंये उपर ब़ेसणे ची आज्ञा ङिली।

³⁶ ते वे सात रोटीया ते माछलीया नु चले, ते नरीकारा चा धन्यवाद करती कर भांलीया, ते आपणे चैला नु ङिता गेला, ते चैले लौका नु

³⁷ यूं करती सब खाती कर रज़ती गेले, ते चैला ने बचलीया आलीया रोटीया चे सात टोकरे भरले आले चले।

³⁸ खाणे आलीया असतरीया ते ब़ाला नु छोड़ती चार हजार मर्द हुते।

³⁹ बल्ति ओ भीड़ी नु विदा करती कर ब़ेड़ी उपर चढ़ती कर, ते मगदन देशा ची हद्दी मां चाह्‍ला गेला।