मत्ती 12 - ओङ राजपूत

सब्त चे बारे मां सवाल

¹ ओ बेले ईशु सब्त चे ङिओ खेता महु हुती कर जाये पलता, ते ओचे चैला नु भोक्‍क लाग़ली तां वे सीटी तरोड़ती-तरोड़ती कर खऊं लाग़ले।

² फरीसिया ने ईं ङेखती कर ओनु केहले, “ङेख, दुधे चैले ऊं काम करी पले, जको सब्त चे ङिओ करने वाजिब कोनी।”

³ ईशु ने वानु केहले, “का तम्ही कोनी पढ़ले, कि दाऊद ने, जब ओ ते ओचे साथी भुक्‍के हुले तां का करले?

⁴ ओ किवें नरीकारा चे घरे गेला, ते भेंट चा पवित्र रोटीया खालीया, जानु खाणे ना तां ओनु ते ना ओचे साथीया नु, पर सेर्फ याजका नु वाजिब हुते।

⁵ का तम्ही मूसा ची व्यवस्था कोनी पढ़ली कि मन्दरा चे याजक सब्त चे ङिओ काम करने चे अनुसार व्यवस्था नु तरोड़ती नाखी बल्ति वी वे बेकसूर रिही?

⁶ पर मैं तम्हानु किहे पला कि इठे मैं छै, जको मन्दरा कनु वी बढ़ती कर छी।

⁷ अगर तम्ही ऐचा मतलब जाणा हा, ‘मैं बलिदान ना, पर दया चाहवें,’ तां तम्ही बेकसूर नु दोषी ना ठहरावा हा।

⁸ मैं इन्साना चा पूत तां सब्त चे ङिओ चा वी प्रभु छै।”

ईशु ने सूखले हाथा आले बन्दे नु ठीक करले

⁹ उठु चलती कर ईशु वांचे प्राथनाघरा मां आला।

¹⁰ ओठे हेक बन्दे हुते, जाया हेक हाथ सूकती गेलता। वाणे ईशु उपर दोष लावणे वास्ते ओकनु पूछले, “का सब्त चे ङिओ ठीक करने वाजिब छै?”

¹¹ ओणे वानु केहले, “तम्चे महु इसड़े कूण छै, जाई हेक भेङ हो, ते वा सब्त चे ङिओ खङे मां ढेती पड़ो, तां ओ विनु पकड़ती कर ना काढ़ो?

¹² भला, बन्दे चा मोल भेङे कनु कितना बढ़ती कर छै! ऐवास्ते सब्त चे ङिओ भले करने वाजिब छै।”

¹³ बल्ति ओणे ओ बन्दे नु केहले, “आपणा हाथ आग़ु बढ़ा।” ओणे बढ़ाला, ते ओ बल्ति ङुजे हाथा आलीकर ठीक हुती गेला।

¹⁴ तब फरीसी ब़ाहर जती कर ओचे विरोध मां सलाह करली कि ओनु किवें करती खत्तम करु।

ईशु ऊंही करता जाये वास्ते नरीकारा ने ओनु चुणले हुते

¹⁵ ईं जाणती कर ईशु उठु चाह्‍ला गेला। ते ब़ोहत लौक ओचे भांसु टुरती पले, ते ओणे सब नु ठीक करले।

¹⁶ ते ईशु ने वानु चिताले कि मनु प्रकट ना करजा,

¹⁷ कांकि जको वचन यशायाह भविष्यवक्‍ता चे जरिये केहला गेलता, ओ पूरा हो।

¹⁸ “ङेखा, हा माया सेवक छै, जानु मैं चुणले। हा माया प्यारा छै, जाये कनु माये मन खौश छै। मैं आपणी आत्मा ओचे मां नाखी, ते ओ सारीया जातिया नु, न्यां चा समाचार ङी।

¹⁹ हा ना कङी झग़ड़ा करी, ते ना ही धूम मचावी। ते ना कुई ओची अवाज गलीया मां सुणी।

²⁰ ते ओ झुकले आले कान्‍नै नु नी भानी, ओ धूंआ ङिते हुले ङीवे नु नी ब़िझावी, ओ भिला रिही, ओ बेले तक जब तक न्यां ची जीत ना हुती जाओ।

²¹ ते सेर्फ ओचे नांवा लारे ही सारे लौक ओचे उपर आस राखे।”

ईशु ते बालजबुल

²² तब लौक हेक अन्धे-गूंगे नु जाये मां दुष्टात्मा हुती। ईशु चे गोढु गेहती आले, ते ओणे ओनु ठीक करले, ते ओ ब़ोलु ते ङेखु लाग़ला।

²³ ऐचे उपर सब लौका ने ब़ोहत अचम्भा करती कर किहुं लाग़ले, “का ईं इन्सान दाऊद चा पूत हो सग़े?”

²⁴ पर फरीसिया ने ईं सुणती कर केहले, “हा दुष्टात्मा चे सरदार बालजबुल ची सहायता चे बिना दुष्टात्मा नु ना काढ़ी।”

²⁵ ओणे वांचे मना चीया बाता जाणती कर वानु केहले, “जिसे कुई राज़ मां फूट हुवे, ओ उज़ड़ती जाये, ते कुई शहर जा घराणे जाये फूट हुवे, ऊं बणले नी रिही।

²⁶ ते अगर शैतान ही शैताना नु काढ़े, तां ओ आपणा ही विरोधी हुती गेला, बल्ति ओचा राज़ किवें बणला रिही?

²⁷ भला, अगर मैं बालजबुल ची सहायता लारे दुष्टात्मा नु काढ़े, तां तम्चे वंश काई सहायता लारे काढ़ी? ऐवास्ते वे ही तम्चा न्यां करे।

²⁸ पर अगर मैं नरीकारा ची आत्मा ची सहायता लारे दुष्टात्मा नु काढ़े, तां नरीकारा चा राज़ तम्चे गोढु आती पुज़ला।

²⁹ “जा किवें कुई बन्दे, कुई ताकतवार चे घरा मां घिरती कर ओचा माल लूट सग़े जब तक कि पेहले ओह ओ ताकतवार नु ना ब़ांथी गिहो? तब ओ ओचे घर लूटती गिही।

³⁰ “जको माये लारे कोनी ओ माये विरोध मां छै, ते जको माये लारे नरीकारा वास्ते लौका नु भेले ना करी, ओ लौका नु नरीकारा कनु दूर करे।

³¹ ऐवास्ते मैं तम्हानु सच्‍च किहे पला कि बन्दे चे सब तरह चे पाप ते निन्दा माफ करती ङिले जाये, पर पवित्र आत्मा ची निन्दा माफ नी करले जई।

³² ते जको कुई मैं इन्साना चे पूता चे विरोध मां कुई बात किही, ओचा हा अपराध माफ करला जई, पर जको कुई पवित्र आत्मा चे विरोध मां कोच्छ किही, ओचा अपराध ना तां ऐ लौक मां ते ना परलोक मां माफ करला जई।

पेड़ आपणे फला कनु पिछाणले जाये

³³ “अगर पेड़ नु आच्छे किहा, तां ओचे फला नु वी आच्छे किहा, जा तम्ही पेड़ नु निक्‍कमे किहा तां ओचे फला नु वी निक्‍कमे किहा, कांकि पेड़ आपणे फला कनु ही पिछाणले जाये।

³⁴ हे नाग़ा ची ब़ाले! तम्ही बुरे हुती कर किवें आच्छीया बाता केह सग़ा? कांकि जको मना मां भरले पले, ऊंही मुँहा उपर आवे।

³⁵ भले इन्सान आपणे मना चे भले भण्डार कनु भलीया बाता काढ़े। ते बुरे इन्सान आपणे बुरे भण्डार कनु बुरीया बाता काढ़े।

³⁶ “कांकि मैं तम्हानु बावड़े पला, कि न्यां चे ङिओ हर हेक बन्दे नु जको ओणे आपणे मुँहा लारे बुराई चा बाता केहलीया, वांचीया सारीया चा हिसाब ङेणा पड़ी।

³⁷ कांकि तु आपणीया बाता चे लारे ही बेकसूर, ते आपणीया बाता चे लारे ही कसूरवार ठहराला जाये।”

स्वर्ग़ीय निशानी

³⁸ ऐचे उपर कोच्छ शास्त्रीया ते फरीसिया ने ईशु नु केहले, “हे गुरु, अम्ही दुधे कनु हेक चैन्ह ङेखणा चाहु।”

³⁹ ओणे वानु उत्तर ङिला, “ऐ युगा चे बुरे ते व्यभिचारी लौक चैन्ह सोधणा चाहवी, पर योना भविष्यवक्‍ता चा चैन्ह छोड़ती कुई नेरा चैन्ह वानु नी ङिला जई।

⁴⁰ योना तीन रात-ङिओ बङी माछली चे ढिड्डा मां रेहला, यूंही मैं इन्साना चा पूत तीन रात-ङिओ धरती चे भीतर रिही।

⁴¹ नीनवे शहरा चे लौक न्यां चे ङिओ ऐ समय चे लौका चे लारे खड़े हुती कर वानु दोषी ठहरावे, कांकि वाणे योना चा प्रचार सुणती कर मन फिराले, ते ङेखा, इठे ओह छै जको योना कनु वी बङा छै।

⁴² दक्षिण ची राणी न्यां चे ङिओ ऐ समय चे लौका चे लारे खड़ी हुती कर वानु दोषी ठहरावी, कांकि वा सुलैमान चा ज्ञान सुणने वास्ते धरती चे कूणे कनु आली, ते ङेखा, इठे ओ छै जको सुलैमान कनु वी बङा छै।

बन्दा मां शैतान

⁴³ “जब अशुद्ध आत्मा बन्दे महु निकलती जाये, तां सूखी जग़हा मां आराम सोती फिरती रिहे, ते जब ना मिली।

⁴⁴ तां किहे, ‘मैं आपणे ओही घरा मां जिठु निकड़ली हुती, पुठी चाह्‍ली जई।’ ते आती कर ओनु सूने, झाड़ले ब़ुहारले ते सजले सजाले लाभे।

⁴⁵ तब वा जती कर आपणे कनु नेरीया बुरीया सात दुष्टात्मा नु आपणे लारे गेहली आवे, ते वे ओचे मां रम्मती कर ओठे वास करे, ते ओ बन्दे ची भांसली दशा पेहले कनु वी बुरी हुती जाये। ऐ समय चे लौका ची दशा वी इसड़ी ही हुवी।”

ईशु चा ब़ेहणी ते भऊ ते ओची आई

⁴⁶ जब ओ भीड़ चे लौका लारे बाता करे ही पलता, तब ओची आई ते भऊ ब़ाहरु भिली हुती। वे ईशु लारे बाता करना चाहवी ली।

⁴⁷ किह्णी ईशु नु केहले, “ङेख, दुधी आई ते दुधे भऊ ब़ाहरु भिली ली, ते दुधे लारे बाता करना चाहवी।”

⁴⁸ ईं सुणती कर ओणे केहणे आले नु उत्तर ङिला, “कूण छै माई आई ? ते कूण छी माये भऊ?”

⁴⁹ ते ओणे आपणे चैला ची तरफ आपणा हाथ बढ़ाती केहले, “ङेखा, माई आई ते माये भऊ ये छी।

⁵⁰ कांकि जको कुई माये ब़ा ची जको स्वर्ग़ा मां छै, ओची इच्छा उपर चले, वे ही माये भऊ, ते ब़ेहण, ते माई आई छै।”