मत्ती 10 - ओङ राजपूत

ईशु चे ब़ारहा चैले

¹ बल्ति ईशु ने आपणे ब़ारहा चैला नु गोढु हकारती कर, वानु अशुद्ध आत्मा चे उपर अधिकार ङिला कि वानु काढ़ो ते हर तरह ची बिमारीया ते सब तरह ची कमजोरीया नु दूर करो।

² ते यां ब़ारहा प्रेरितां चे नांवे ये छी, पेहला शमौन, जको पतरस किहवावे, ते ओचा भऊ अन्द्रियास, जबदी चा पूत याकूब, ते ओचा भऊ यूहन्‍ना,

³ फिलिप्पुस, ते बरतुल्मै, थोमा, ते चुंगी गेहणे आला मत्ती, हलफई चा पूत याकूब ते तद्दै,

⁴ शमौन कनानी, ते यहूदा इस्करियोती जेह्णे ओनु पकड़वाती वी ङिले।

ब़ारहा प्रेरितां चे सेवा काम

⁵ यां ब़ारहा नु ईशु ने हा आज्ञा ङिती कर भेज़ले, “नेरीया जातिया सनु ना जजा, ते सामरिया चे कुई शहरा मां ना घिरजा।

⁶ पर इस्राएल चे घराणे ही ची गार हुलीया आलीया भेङा चे गोढु जजा।

⁷ ते टुरते-टुरते हा प्रचार करा, ‘स्वर्ग़ चा राज़ गोढु आती गेला।’

⁸ बिमारा नु ठीक करा, मरला आला नु जीते करा, कोहड़ीया नु शोद्ध करा, दुष्टात्मा नु काढ़ा। तम्ही मुफ्त मां गेला, ते मुफ्त मां ङिया।

⁹ ते आपणे ब़टुवा मां ना तां सोने, ते ना रुपये, ते ना तांबा राखजा,

¹⁰ मार्ग़ा चे वास्ते ना झोली राखजा, ते ना ङोन चोले, ना जुत्तीया ते ना ङांग चवा, कांकि मजदूरा नु ओचे खाणे मिलणे चाही छै।

¹¹ “जिसे कुई शहर जा गांवा मां जावा, तां पता काढ़ा कि ओठे कूण लायक छै, तां जब तक उठु विदा ना हुवा तब तक ओही घरा मां रुकले रिहा।

¹² ते घरा मां घिरते बेले ओनु आशीष ङिजा।

¹³ अगर ओ घरा चे लौक लायक हुवे तां तम्ची शान्ति वांचे उपर पुज़ी, अगर वे लायक नी हुवे तां तम्ची शान्ति तम्चे गोढु वापिस आती जई।

¹⁴ ते जको कुई तम्हानु ग्रहण ना करो ते तम्ची ना सुणो, ओ घरा महु जा शहरा महु निकलते हुले आपणे पग़्ग़ा ची धूड़ झाड़ती नाखा,

¹⁵ मैं तम्हानु सच्‍च किहे पला कि न्यां चे ङिओ, ओ शहरा ची दशा कनु सदोम ते अमोरा चे देशा ची दशा घणी सेहणे चे लायक हुवी।

आणे आली मुसीबत

¹⁶ “ङेखा, मैं तम्हानु भेङा आलीकर भेड़िया चे बीच मां भेज़े पला, ऐवास्ते नाग़ा आलीकर ब़ुध्दिमान ते कबूतरा आलीकर भोले बणा।

¹⁷ पर लौका कनु चौकस रिहा, कांकि वे तम्हानु कई प्राथनाघरा मां सोंपे, ते पंचेता मां तम्हानु कोड़े मारे।

¹⁸ तम्ही माई वजह हाकिमा ते राजा चे सामणे, वांचे उपर, ते नेरीया जातिया चे उपर ग़वाह हुवणे वास्ते पुचाले जावा।

¹⁹ जिसे बेले वे तम्हानु पकड़वावे तां हा चिन्ता ना करजा कि अम्ही केस रीति लारे जा का किहुं। कांकि जको कोच्छ तम्हानु केहणे हुवी, ऊं तम्हानु वेही घड़ी बावड़ले जई।

²⁰ कांकि ब़ोलणे आले तम्ही कोनी, पर तम्चे ब़ा नरीकार चा आत्मा, तम्चे मां ब़ोले।

²¹ “भऊ भावा नु, ते ब़ा पूता नु, मारणे वास्ते सोंपे, ते ब़ाले आई-ब़ा चे विरोध मां खड़े हुती कर वानु मरवाती नाखे।

²² माये नांवा ची वजह कनु सारे लौक तम्चे लारे बैर राखे, पर जको अन्त तक सब्र करली रिही ओचा उद्धार हुवी।

²³ जिसे बेले वे तम्हानु हेके शहरा मां सतावी, तां ङुजे शहरा सनु द्रोड़ती जजा। मैं तम्हानु सच्‍च-सच्‍च किहे पला, तम्ही इस्राएल चे सारे शहरा मां ना फिरती चुका कि मैं इन्साना चा पूत आती जई।

²⁴ “चैला आपणे गुरु कनु बङा ना हुवी, ते ना दास आपणे मालिक कनु।

²⁵ चैले, गुरु चे ते दास चे मालिक चे बराबर हुवणे ही ब़ोहत छै। जब वाणे घरा चे मालिक नु शैतान, केहले तां ओचे घरा आला नु का कोच्छ नी किहे।

काये कनु ङरु?

²⁶ “ऐवास्ते इन्साना कनु ना ङरजा, कांकि कहीं ढकले कोनी पले जको खोड़ले ना जाओ, ते ना कहीं लुकले आले छै, जको जाणले नी जई।

²⁷ जको मैं तम्हानु अन्धारे मां किहे, ओनु तम्ही सोज़ले मां किहा, ते जको कानो कान सुणा, ओनु छत्ता उपर कनु प्रचार करा।

²⁸ जको शरीरा नु घात करी, पर आत्मा नु घात ना कर सग़ी, ओकनु ना ङरजा, पर नरीकारा कनु ही ङरा, जको आत्मा ते शरीर ङुंहु नु नर्का मां नाश कर सग़े।

²⁹ का पैसे मां ङोन गैरे ना बिकी? तां वी तम्चे ब़ा ची इच्छा चे बिना वांचे महु हेक वी धरती उपर ना ढे सग़ी।

³⁰ तम्चे ठोङा चे माल वी सब गिणले आले छी।

³¹ ऐवास्ते ङरा ना, तम्ही ब़ोहत गैरा कनु बढ़ती कर छिवा।

ईशु ची वजह कनु शर्माणे कोनी

³² “जको कुई इन्साना चे सामणे मनु मनती गिही, ओनु मैं वी आपणे स्वर्ग़ीय ब़ा चे सामणे मनती गिही।

³³ पर जको कुई इन्साना चे सामणे माया इन्कार करी, ओचा मैं वी आपणे स्वर्ग़ीय ब़ा चे सामणे इन्कार करी।

ईशु चे आणे चा मकसद

³⁴ “ईं ना समझा कि मैं धरती उपर मिलाप कराऊं आला, मैं मिलाप कराणे वास्ते कोनी, पर तलवार चलवाणे वास्ते आला।

³⁵ मैं तां आला कि, ‘छोरा नु ओचे ब़ा कनु, ते धूवे नु विची आई कनु, ते बहुवे नु विची सासवे कनु अलग़ करती ङिये,

³⁶ बन्दा चे दुश्मन ओचे घरा चे लौक ही हुवे।’

³⁷ “जको कुई आई जा ब़ा नु माये कनु ज्यादा प्यारे जाणे, ओ माये लायक कोनी। ते जको पूत जा धूवे नु माये कनु ज्यादा प्यारे जाणे, ओ माये लायक कोनी।

³⁸ ते जको आपणा क्रूस चती कर माये भांसु ना टुरी ओ माये लायक कोनी।

³⁹ जको आपणी जीन्दगी नु बचावणा चाहवे, ओ विनु गुंती ब़ेसी, ते जको माई वजह कनु आपणी जीन्दगी नु गुंवी, ओ विनु बचावी।

प्रतिफल

⁴⁰ “जको तम्हानु स्वीकार करे, ओ मनु स्वीकार करे, ते जको मनु स्वीकार करे, ओ माये भेज़णे आले नु स्वीकार करे।

⁴¹ जको भविष्यवक्‍ता नु भविष्यवक्‍ता जाणती कर स्वीकार करी, ओनु भविष्यवक्‍ता चा फल मिली। ते जको धर्मी नु धर्मी जाणती कर स्वीकार करी, ओनु धर्मी चा फल मिली।

⁴² जको कुई यां छोटा महु हेके नु माया चैला जाणती कर सेर्फ हेक मुंगर ठाडे पाणी पिलावे, मैं तम्हानु सच्‍च किहे पला, ओ किसी रीति लारे आपणा प्रतिफल नी गुंवी।”