लूका 20 - ओङ राजपूत

ईशु चे अधिकारा उपर यहूदिया चा सवाल

¹ हेक ङिओ इसड़े हुले कि जब ओ मन्दरा मां लौका नु उपदेश ङिये पलता ते सुसमाचार सुणावे पलता, तां प्रधान याजक ते शास्त्री, बङका चे लारे आती कर खड़े हुले।

² ते किहुं लाग़ले, “अम्हानु बावेड़, तु यां कामा नु किसे अधिकारा लारे करी, ते ओ कूण छै, जेह्णे हा अधिकार तनु ङिला?”

³ ओणे वानु उत्तर ङिला, “मैं वी तम्हा कनु हेक बात पूछे पला, मनु बावड़ा,

⁴ यूहन्‍ना चा बपतिस्मा स्वर्ग़ा ची ओर कनु हुता जा इन्साना ची ओर कनु हुता?”

⁵ बल्ति वे आपस मां किहुं लाग़ले, “अगर अम्ही किहुं, ‘स्वर्ग़ा ची ओर कनु,’ तां ओ किही, ‘बल्ति तम्ही ओचा विश्‍वास कां कोनी करला?’

⁶ ते अगर अम्ही किहुं, ‘इन्साना ची ओर कनु,’ तां सारे लौक पत्थराव करे, कांकि वे सच्‍चमां जाणी कि यूहन्‍ना भविष्यवक्‍ता हुता।”

⁷ तां वाणे उत्तर ङिला, “अम्ही ना जाणु कि ओ काई ओर कनु हुता।”

⁸ ईशु ने वानु केहले, “तां मैं वी तम्हानु ना बावड़ी कि मैं ईं काम किसे अधिकार लारे करे।”

बाड़ी चे ठेकेदार

⁹ तब ओ लौका नु हा मिसाल किहुं लाग़ला, “कुई इन्साना ने अंगूरा ची बाड़ी लाली, ते जमींदारा नु विचा ठेका ङिती ते घणे ङिहां वास्ते प्रदेस चाह्‍ला गेला।

¹⁰ जब समय आला तां ओणे जमींदारा चे गोढु हेक दासा नु भेज़ले कि ओ अंगूरा ची बाड़ी चे कोच्छ फला चा हेंस्सा गिहो, पर जमींदारा ने ओनु कोटले ते खाली हाथ भेज़ती ङिले।

¹¹ बल्ति ओणे हेक नेरे दासा नु भेज़ले, ते वाणे ओनु वी कोटती कर ते ओचा अपमान करती खाली हाथ भेज़ती ङिले।

¹² बल्ति ओणे तीजे नु भेज़ले, ते वाणे ओनु वी अधमरा करती काढ़ती छोड़ले।

¹³ तब अंगूरा ची बाड़ी चे मालका ने केहले, ‘मैं का करे? मैं आपणे प्यारे पूता नु भेज़े, हो सग़े वे ओचा कद्दर करे।’

¹⁴ जिसे बेले जमींदारा ने ओनु ङेखले तां आपस मां विचार करु लाग़ले, ‘हा तां वारिस छै, आवा, अम्ही ऐनू मारती नाखु कि विरासत अम्ची हुती जाओ।’

¹⁵ ते वाणे ओनु अंगूरा ची बाड़ी कनु ब़ाहर काढ़ती कर मारती नाखले, “ऐवास्ते अंगूरा ची बाड़ी चा मालिक वांचे लारे का करी?

¹⁶ ओ आती कर वां जमींदारा नु नाश करी, ते अंगूरा ची बाड़ी नेरा नु सोंपती ङी।” ईं सुणती कर वाणे केहले, “नरीकार करो इसड़े ना हो।”

¹⁷ ईशु ने वांची तरफ ङेखती कर केहले, “बल्ति ईं का लिखले पले, “ ‘जिसे पत्थरा नु राजमिस्त्रीया ने निक्‍कमे ठहराले हुते, ओही कूणे चा सिरा हुती गेला।’

¹⁸ जको कुई ओ पत्थरा उपर ढी ऊं चकनाचूर हुती जई, ते जाये उपर ओ पत्थर ढी, ओनु पीसती नाखी।”

कैसर राज़ नु कर् ङेणा

¹⁹ वेही घड़ी शास्त्रीया ने ते प्रधान याजका ने ओनु पकड़ने चाह्‍ले, कांकि वे समझती गेलते कि ओणे अम्चे उपर हा मिसाल केहली, पर वे लौका कनु ङरले।

²⁰ ते वे ओची ताक मां लाग़ले ते भेती भेज़ले कि धर्मा चा भेष धारतीकर ओची कुई ना कुई बात पकड़ो, ताकि ओनु हाकिम चे हाथे ते अधिकार मां सोंपती ङियो।

²¹ वाणे ओकनु ईं पूछले, “हे गुरु, अम्ही जाणु कि तु ठीक किही ते सिखावी वी, ते काया पक्षपात ना करी, बल्कि नरीकारा चा मार्ग़ सच्‍चाई लारे बावड़ी।

²² का कैसर नु कर् ङेणा वाजिब छै जा कोनी?”

²³ ओणे वांची चलाकी नु परखती कर वानु केहले,

²⁴ “हेक चान्दी चा सिक्‍का मनु ङिखाणा। ऐचे उपर छाप ते नां काये छै?” वाणे केहले, “कैसर चे।”

²⁵ ओणे वानु केहले, “जको कैसर चे छै, ऊं कैसर नु ङिया ते जको नरीकारा चे छै, ऊं नरीकारा नु ङिया।”

²⁶ वे लौका चे सामणे ये बाते मां ओनु पकड़ ना सग़ले, बल्कि ओचे उत्तर लारे अचम्भित हुती कर चोप रेहले।

जीते हुवणे ते बीहा

²⁷ बल्ति कोच्छ सदूकी जको किही कि मरले आला चे जीते हुवणे छै ही कोनी, वांचे महु कोच्छ ने ओचे गोढु आती कर पूछले,

²⁸ “हे गुरु, मूसा ने अम्चे वास्ते ईं लिखले कि अगर काया भऊ आपणी घराआली चे हुते हुले बिना ऊलाद्धी चे मरती जायो, तां ओचा भऊ ओची घराआली लारे बीहा करती गिहो, ते आपणे भावां वास्ते ऊलाद्ध पैदा करो।

²⁹ सात भऊ हुते, पेहला भऊ बीहा करवाती बिना ऊलाद्धी चे मरती गेला।

³⁰ बल्ति ङुजे,

³¹ ते तीजे ने वी वे असतरी लारे बीहा करवाती गेला। यूं करती साती बिना ऊलाद्धी चे मरती गेले।

³² अन्त मां वा असतरी वी मरती गेली।

³³ ऐवास्ते जीते हुवणे उपर वा वांचे महु काई घराआली हुवी, कांकि वा साता ची घराआली हुती चुकली हुती?”

³⁴ ईशु ने वानु केहले, “ऐ युगा ची बन्दी बीहा करी ते करवावी।

³⁵ पर जको लौक ऐचे लायक हुवे कि ओ युगा मां ते मरले आला महु जीते हुवणे नु हांसिल करे, वे ना बीहा करवावे ते ना बीहा मां ङिले जाये।

³⁶ वे बल्ति मरणे चे वी कोनी, कांकि वे स्वर्ग़दूता चे समान हुवे, ते पुनरुत्थान ची ऊलाद्ध हुवणे लारे नरीकारा ची वी ऊलाद्ध हुवे।

³⁷ पर ये बाते नु कि मरले आले जीते हुती जई, मूसा ने वी झाड़ी ची कथा मां प्रकट करली, ओ प्रभु नु ‘अब्राहम चा नरीकार, ते इसहाक चा नरीकार, ते याकूब चा नरीकार’ किहे।

³⁸ नरीकार तां मुड़दा चा कोनी, पर जीता चा नरीकार छै, कांकि ओचे गोढु सब जीते छी।”

³⁹ कोच्छ धर्मशास्त्रीया ने केहले, “हे गुरु, तु आच्छे केहले।”

⁴⁰ ते वानु बल्ति ओकनु कोच्छ नेरे पूछणे ची हिम्मत कोनी हुली।

मसीह काया पूत छै?

⁴¹ बल्ति ओणे वाकनु पूछले, “मसीह नु दाऊद ची ऊलाद्ध किवें किही?

⁴² दाऊद आप भज़न संहिता ची किताबे मां किहे, “ ‘प्रभु ने माये प्रभु नु केहले, “माये सज़्ज़े पासु ब़ेस,

⁴³ जब तक कि मैं दुधे बैरीया नु दुधे पग़्ग़ा तले ना करती ङिये।” ’

⁴⁴ दाऊद ओनु प्रभु किहे, तां ओ ओचा पूत किवें ठहरला?”

ईशु ची धर्मशास्त्रीया नु चितावनी

⁴⁵ जिसे बेले सारी बन्दी सुणी पलती ली, तां ईशु ने आपणे चैला नु केहले,

⁴⁶ “शास्त्रीया कनु चौकस रिहा, जको लम्बे-लम्बे चोले घाले हुले फिरने ते जानु बजारा मां नमस्कार, ते प्राथनाघरा मां खास-खास आसण ते मेहमान खाने मां खास-खास जग़ह आच्छी लाग़े।

⁴⁷ वे बांढीया चे घर खाती जई, ते ङिखाणने वास्ते बङी देर तक प्राथना करते रिही, ये ब़ोहत ङण्ड भोग़े।”