लूका 17 - ओङ राजपूत

पापा ची माफी

¹ बल्ति ईशु ने आपणे चैला नु केहले, “हो ना सग़ी कि ठोकरा ना लाग़ो, पर हाय, ओ इन्साना उपर जाई वजह कनु ठोकरा लाग़ी।

² जको कुई यां छोटा महु कानु ठोकर खुलाओ, ओचे वास्ते ईं भले हुवीया कि घर्टी चा पोड़ ओचे गले मां लटकाला जईया, ते ओ समुन्दरा मां नाखती ङिला जईया।

³ “सचेत रिहा, अगर दुधा भऊ अपराध करे तां ओनु दड़का, ते अगर पछतावे तां ओनु माफ कर।

⁴ अगर ङिओ भर मां ओ सात वारी दुधे बारे मां पाप करे ते सात वारी दुधे गोढु बल्ति आती कर किहे, ‘मैं पछतावे पला,’ तां ओनु माफ कर।”

विश्‍वास

⁵ तब प्रेरितां ने प्रभु नु केहले, “अम्चे विश्‍वासा नु बधा।”

⁶ प्रभु ने केहले, “अगर तम्हानु राई चे ङाणे चे बराबर वी विश्‍वास हो, तां तम्ही ऐ सतूता चे दरख्ता नु किहा, ‘जड़ही कनु उखड़ती कर समुन्दरा मां लाग़ती जा,’ तां ओ तम्ची मनती गिहा।

दास चे काम

⁷ “पर तम्चे महु इसड़े कूण छै, जाया दास हल बाहवीया, जा भेङा चराता हुवीया, ते जब ओ खेता महु आवीया, तां ओनु किहे, ‘तुरन्त आती कर खाणे वास्ते ब़ेस’?

⁸ का ओ ओनु ईं नी किही, ‘माये खाणे तियार कर, ते जब तक मैं खाये पीयें तब तक कमर कसती माई सेवा कर, ऐचे बाद तु वी खाती-पीती गिहो’?

⁹ का मालिक ओ दासा चा ऐहसान मनी कि ओणे ऊंही काम करले जिसे ची आज्ञा ङिली गेलती?

¹⁰ ऐस रीति लारे तम्ही वी जब वां सब कामा नु करती चुका जाई तम्हानु आज्ञा ङिली गेलती, तां किहा, ‘अम्ही साधारण दास छिऊं, कि जको अम्हानु करने चाही हुते ऊंही करले।’ ”

ईशु ने ङस कोहड़ीया नु शोद्ध करले

¹¹ ते इसड़े हुले कि ओ यरुशलेम नु जता हुला सामरिया ते गलील चे बीच हुती जाये पलता।

¹² ते कुई गांवा मां घिरते बेले ईशु नु दूर भिले ङस कोहड़ी मिले।

¹³ तब वाणे साङ मारती केहले, “हे ईशु, हे मालिक, अम्चे उपर दया कर।”

¹⁴ ईशु ने वानु ङेखती कर केहले, “जावा ते आपणे आप नु याजका नु ङिखाणा।” ते जते-जते ही वे शोद्ध हुती गेले।

¹⁵ बल्ति वांचे महु हेके ने ईं ङेखती कर कि मैं ठीक हुती गेला, ऊंची अवाजी मां नरीकारा ची बढ़ाई करता हुला पुठा आला।

¹⁶ ते ईशु चे पग़्ग़ा मां मुँहा भराणे ढेती, ओचा धन्यवाद करु लाग़ला, ते ओ हेक सामरी हुता।

¹⁷ ऐचे पर ईशु ने केहले, “का ङस शोद्ध कोनी हुले तां बल्ति वे नाओ किठे छी?

¹⁸ का ऐ प्रदेसी नु छोड़ती वांचे महु कुई नेरा कोनी निकड़ला, जको नरीकारा ची बढ़ाई करीया?”

¹⁹ जब ईशु ने ओनु केहले, “उठती कर चाह्‍ला जा, कांकि तु माये उपर विश्‍वास करला ते दुधे विश्‍वास ने तनु ठीक करले।”

नरीकारा चा आणे आला राज़

²⁰ जिसे बेले फरीसिया ने ओकनु पूछले कि नरीकारा चा राज़ किसे बेले आवी, तां ओणे वानु उत्तर ङिला, “नरीकारा चा राज़ प्रकट रूपा मां ना आवी।

²¹ ते लौक ईं नी किही, ‘ङेखा, इठे छै!’ जा, ‘उठे छै!’ कांकि नरीकारा चा राज़ तम्चे बीच मां छै।”

²² ते ईशु ने चैला नु केहले, “वे ङिहें आवे, जाये मां तम्ही मैं इन्सान चे पूता चे ङिहां महु हेक ङिओ ङेखणा चाहवा, ते नी ङेख सग़ा।

²³ ते लौक तम्हानु किही, ‘ङेखा, ओठे छै!’ जा, ‘ङेखा, इठे छै!’ पर तम्ही चाह्‍ले ना जजा ते ना वांचे भांसु हुजा।

²⁴ कांकि जिंवे बिजली आसमाना चे हेक कूणे कनु चमकती कर आसमाना चे ङुजे कूणे तक चमकती जाये, यूंही मैं इन्साना चे पूता चे वी आपणे ङिहां मां आणे हुवी।

²⁵ पर पेहले जरुरी छै, कि मैं ब़ोहत ङोख चवे, ते ऐ युगा चे लौक मनु ठुकराती नाखो।

²⁶ जिंवे नूह चे ङिहां मां हुले हुते, यूंही मैं इन्साना चे पूता चे ङिहां मां वी हुवी।

²⁷ जिसे ङिओ तक नूह जहाजा उपर कोनी चढ़ला, ओ ङिओ तक लौक खाते-पीते, ते वांचे मां बीहा शादीया हुतीया, तब जल प्रलय ने आती कर वां सब नु नाश करले।

²⁸ ते जिंवे लूत चे ङिहां मां हुले हुते, लौक खाते-पीते लेन-देन करते, दरख्ते राहते ते घर बणाते।

²⁹ पर जिसे ङिओ लूत सदोम महु निकड़ला, ओ ङिओ जाखते ते गन्धक आसमाना महु बरसली ते सब नु नाश करती नाखले।

³⁰ “मैं इन्सान चे पूता चे प्रकट हुवणे चा ङिओ वी इसड़े हुवी।

³¹ ओ ङिओ जको छत्ते उपर हो, ते ओचा समान घरा मां हो, ओ ओनु चवणे वास्ते ना उतरो, ते यूंही जको खेता मां हो, ओ पुठे ना आओ।

³² लूता ची घराआली नु चैते राखजा।

³³ जको कुई आपणी जीन्दगी बचावणा चाहवे ओ विनु गुंती ब़ेसी, पर जको आपणी जीन्दगी गुंवी ओ विनु जीते राखी।

³⁴ मैं तम्हानु किहे पला, वे राती नु ङोन इन्साने हेकी खाटे उपर हुवे, हेक गेहती गेले जई, ते ङुजे नु छोड़ती ङिले जई।

³⁵ ङोन असतरीया हेके लारे घर्टी पीसतीया हुवे, हेक गेहती गेली जई, ते ङुजी छोड़ती ङिली जई।

³⁶ ङोन जणे खेता मां हुवे हेक गेहला जई ते ङुजे नु छोड़ले जई।”

³⁷ ईं सुणती कर वाणे ओकनु पूछले, “हे प्रभु ईं किठे हुवी?” ओणे वानु केहले, “जिठे लोथ हो, ओठे ग़िझा भेलिया हुवे।”