लूका 15 - ओङ राजपूत

गार हुली आली भेङे ची मिसाल

¹ सारे चुंगी गेहणे आले ते पापी ईशु चे गोढु आते रेहते ताकि ओचीया सुणो।

² पर फरीसी ते धर्मशास्त्री बुड़कती कर किहुं लाग़ले, “हा तां पापीया लारे मिले ते वांचे लारे खाये वी।”

³ बल्ति ईशु ने वानु हा मिसाल ङिली,

⁴ “तम्चे महु कूण छै जाया साऔ भेङा हो, ते वांचे महु हेक गार हुती जाओ, तां निन्याणवे नु बरब्याना मां छोड़ती कर, वे गार हुली आली नु जब तक लाभती ना जाओ विनु सोता रिही?

⁵ ते जब लाभती जाओ, तब ओ बङी खुशी लारे विनु मुंढे उपर चती गिहे,

⁶ ते घरे आती कर सज़्ज़णा ते पड़ोसीया नु भेले करती कर किहे, ‘माये लारे खुशी मनावा, कांकि माई गार हुली आली भेङ लाभती गेली।’

⁷ “मैं तम्हानु किहे पला कि यूंही करती कर हेक मन फिरावणे आले पापीया चे बारे मां वी स्वर्ग़ा मां इतनी ही खुशी हुवी, जितना कि वां निन्याणवे इसड़े धर्मीया चे बारे मां नी हुवी, जानु मन फिरावणे ची जरुरत कोनी।

गार हुले आले सिक्‍के ची मिसाल

⁸ “जा कूण इसड़ी असतरी हुवी जाये कनु ङस सिक्‍के हो, ते वांचे महु हेक गार हुती जाओ, तां वा ङीवा ब़ालती कर ते घर छंडकती-ब़ुहारती, जब तक मिलती ना जाओ जी लाती सोती ना रिहो?

⁹ ते जिसे बेले लाभती जाये, तां वा आपणीया सेहलीया ते पड़ोसणीया नु भेले करती किहे, ‘माये लारे खुशी मनावा, कांकि माया गार हुला आला सिक्‍का लाभती गेला।’

¹⁰ मैं तम्हानु किहे पला कि यूंही हेक मन फिरावणे आले पापी चे बारे मां नरीकारा चे स्वर्ग़दूता चे सामणे खुशी हुवे।”

उज़ाड़ु पूता ची मिसाल

¹¹ बल्ति ईशु ने केहले, “कुई बन्दे चे ङोन पूत हुते।

¹² वांचे महु छोटे ने ब़ा नु केहले, ‘हे पिताजी, जायजाती महु जको हेंस्सा माया हो ओ मनु ङिती ङे।’ ओणे वानु आपणी जायजात बांटती ङिली।

¹³ घणी ङिहें कोनी हुली हुती कि छोटा पूत सब कोच्छ भेले करती हेक दूर देशा मां चाह्‍ला गेला, ते ओठे उल्टे कर्मा मां आपणी जायजात उज़ाड़ती ङिली।

¹⁴ जिसे बेले ओ सब कोच्छ खर्च करती चुकला, तां ओ देशा मां ब़ोहत बङा अकाल पड़ला, ते ओ परेशानी मां पड़ती गेला, कांकि ओ कंगाल हुती गेला।

¹⁵ ऐवास्ते ओह ओ देशा चे रेहणे आला महु हेक चे इठे जती रिहुं लाग़ला। ओणे ओनु आपणे खेता मां सूअर चराणे वास्ते भेज़ले।

¹⁶ ते ओ चाहता कि वां फलीया महु जानु सूअर खाते, आपणे ढेड्ड भरो, ते ओनु कुई वी कहीं कोच्छ ना ङिते।

¹⁷ “जिसे बेले ओ आपणे आपे मां आला तब किहुं लाग़ला, ‘माये ब़ा चे कितने मजदूरा नु खाणे कनु ज्यादा रोटी मिले, ते मैं इठे भुक्‍के मरे पला।

¹⁸ मैं हमा उठती कर आपणे ब़ा चे गोढु जई ते ओनु किही कि पिताजी, मैं स्वर्ग़ चे विरोध मां ते दुधी नजरी मां ते नरीकार ची नजरी मां पाप करला।

¹⁹ हमा मैं ऐस लायक कोनी रेहला कि दुधा पूत किहवावे, मनु आपणे हेक मजदूरा आलीकर राखती गे।’

²⁰ बल्ति ओह उठती कर, आपणे ब़ा चे गोढु गेला, “ओ हालि दूर ही हुता कि ओचे ब़ा ने ओनु ङेखती कर तरस आती गेला, ते द्रोड़ती कर ओनु गेले लाले, ते घणीया मिठ्ठीया ङिलीया।

²¹ पूता ने ओनु केहले, ‘पिताजी, मैं स्वर्ग़ा चे विरोध मां ते दुधी नजरा मां पाप करला, ते हमा मैं ऐ लायक कोनी रेहला कि दुधा पूत किहवावे।’

²² पर ओचे ब़ा ने आपणे सेवका नु केहले, ‘जल्दी आच्छे कनु आच्छी ओढ़णी चती कर ओनु घलावा, ते ओची आंगली मां मुंदरी ते पग़्ग़ा मां जुत्तीया घलावा।

²³ मंहगा ताजा ते मोटा जानवर आणती कर बाढा ते खावा ते खुशीया मनावा।

²⁴ कांकि माया हा पूत मरती गेलता, हमा जीता हुती गेला, गार हुती गेलता ओ लाभती गेला।’ ते बल्ति वे खुशीया मनाऊं लाग़ले।

²⁵ “पर ओचा बङा पूत खेता मां हुता ते जिसे बेले ओ घरा चे गोढु पुज़ला तां ओनु गाणे बजाणे ते नचणे ची अवाज सुणली,

²⁶ ओणे हेक सेवका कनु पूछले, ‘इठे का हुवे पले?’

²⁷ सेवका ने ओनु केहले, ‘दुधा भऊ आला, ते दुधे ब़ा ने मंहगा ताजा ते मोटा जानवर रुसवाला, ऐवास्ते कि ओनु ठीक-ठाक ङेखले।’

²⁸ “ईं सुणती कर ओ गुस्से लारे भरीती गेला ते भीतर कोनी जाणे चाह्‍ले, पर ओचा ब़ा ब़हार आती कर ओनु मनाऊं लाग़ला।

²⁹ ओणे ब़ा नु केहले, ‘ङेख, मैं इतने साला कनु दुधी सच्‍चे मना लारे सेवा करता आला, ते कङी वी मैं दुधी आज्ञा कोनी टाड़ली, तां वी तु मनु कङी हेक ब़ाकरी चे ब़च्‍चे तक वी कोनी ङिले कि आपणे दोस्ता लारे खुशीया मनावे।

³⁰ जिसे बेले दुधा हा पूत जेह्णे आपणी सारी धन दौलत वेश्या मां उज़ाड़ती ङिली, ते ओचे वास्ते तां ताजा मोटा ते मंहगा जानवर बढवाला।’

³¹ “ब़ा ने ओनु केहले, ‘पूत, तु सदा माये लारे छी, ते जको कोच्छ माये छै, ऊं सब कोच्छ दुधे ही छै।

³² पर हमा खुशीया मना ते मगन हो कांकि दुधा भऊ मरती गेलता बल्ति जीता हुती गेला, गार हुती गेलता हमा लाभती गेला।’ ”