लूका 14 - ओङ राजपूत

हेक बन्दे नु बिमारी कनु ठीक करले

¹ बल्ति ईशु सब्त चे ङिओ फरीसिया चे सरदारा महु काये घरे रोटी खाणे वास्ते गेला, तां वे ओनु पकड़ने चे मौके मां हुते।

² ईशु चे सामणे हेक बन्दे हुते जाये हाथा पग़्ग़ा मां पाणी भरीजणे ची बिमारी हुती। ते ऊं सूज़ती गेलते।

³ ईशु ने यहूदी धर्मशास्त्रीया ते फरीसिया कनु पूछले, “सब्त चे ङिओ कानु ठीक करने आच्छे छै जा कोनी?”

⁴ पर वे चोप रेहले, ऐवास्ते ईशु ने ओह बन्दे नु हाथ लाती कर ठीक करले ते ओनु जऊं ङिले।

⁵ ते ईशु ने वानु केहले, “तम्चे महु इसड़े कूण छै, जाये गाहड़ो जा ङान्द, खुआ मां ढेती पड़ो ते ओ सब्त चे ङिओ ओनु जल्दी ब़हार ना काढ़ो?”

⁶ वे यां बाता चा कोच्छ उत्तर ना ङे सग़ले।

नरमाई लारे मेहमाना ची कद्दर

⁷ जिसे बेले ईशु ने ङेखले कि छेड़ा ङिले आले लौक किवें खास-खास जग़हा चुणती गिही तां हेक मिसाल ङिती कर वानु केहले,

⁸ “जिसे बेले कुई तनु बीहा मां हकारे, तां खास जग़हा मां ना ब़ेसीयो, कङी इसड़े ना हो कि ओणे दुधे कनु वी कुई बङे खास मेहमाना नु छेड़ा ङिला हो।

⁹ ते जेह्णे तनु ते ओनु ङुंहु नु छेड़ा ङिला हो, आती कर तनु किहो, ‘ऐनू जग़हा ङे,’ ते बल्ति तनु शर्मसार हुती सबकनु तड़ली जग़हा मां ब़ेसणे पड़ी।

¹⁰ पर जिसे बेले तु हकरीला जई, तां सबकनु तड़ली जग़हा मां जती ब़ेस जब ओ जेह्णे तनु छेड़ा ङिला आवी, तां तनु किहो, ‘हे सज़्ज़ण, उग़ते हुती ब़ेस,’ तब दुधे लारे ब़ेसणे आला चे सामणे दुधी बढ़ाई हुवी।

¹¹ कांकि जको कुई आपणे आप नु बङे बणावी, ऊं छोटे करले जई, ते जको कुई आपणे आप नु छोटे बणावी,ऊं बङे करले जई।”

¹² बल्ति ओणे आपणे छेड़ा ङेणे आला नु वी केहले, “जब तु ङिहां चा जा राती चा भोज़ करी, तां आपणे सज़्ज़ण जा भऊ जा कुणम्बा जा अमीर पड़ोसीया नु ना हकार, कहीं इसड़े ना हो कि वे वी तनु छेड़ा ङियो, ते दुधा बदला हुती जाओ।

¹³ पर जब तु भोज़ करी, तां कंगाल, टुन्डे, लंगड़े, ते अन्धा नु हकार।

¹⁴ तब तु धन्‍न हुवे, कांकि वांचे कनु वापिस बदले मां ङेणे वास्ते कहीं कोनी हुवी, पर तनु धर्मीया चे लारे जीते हुवणे चा नरीकार तनु ऐचा फल ङिही।”

बङे भोज़ ची मिसाल

¹⁵ ईशु लारे भोज़न करने आला महु हेके ने ये बाता सुणती कर ईशु नु केहले, “धन्‍न छै ओ जको नरीकारा चे राज़ मां रोटी खई।”

¹⁶ ईशु ने ओनु केहले, “कुई इन्साना ने बङा भोज़ ङिला ते घणा नु हकारले।

¹⁷ जब भोज़न तियार हुती गेला तां ओणे आपणे दासा चे हाथु छेड़ा ङिले आले लौका नु केहती भेज़ले, ‘आवा, हमा खाणे तियार छै।’

¹⁸ पर वे सारे चे सारे माफी मांगु लाग़ती गेले। पेहले ने ओनु केहले, ‘मैं खेत मोल गेहला, ते जरुरी छै कि ओनु ङेखे, मैं दुधे कनु बिनती करे पला कि मनु माफ करती ङे।’

¹⁹ ङुजे ने केहले, ‘मैं पाँच जोड़ी ङान्द मोल गेहले, ते परखु जाये पला, मैं दुधे कनु बिनती करे पला, मनु माफ करती ङे।’

²⁰ हेक नेरे ने केहले, ‘मैं बीहा करवाला, ऐवास्ते मैं ना आ सग़ी।’

²¹ “ओ दासा ने आती कर आपणे मालका नु ये बाता केहती सुणालीया। बल्ति घरा चे मालका नु गुस्सा आला ते आपणे दासा नु केहले, ‘शहरा चे बजारा ते गलीया मां तुरन्त जती कर कंगाल, टुन्डे, लंगड़े, ते अन्धा नु इठे गेहती आवा।’

²² “दासा ने बल्ति केहले, ‘हे मालिक, जिंवे तु केहले हुते, यूंही करले गेले, ते बल्ति वी जग़ह छै।’

²³ “मालिका ने दासा नु केहले, ‘सड़का उपर ते बाड़ा ची तरफ जा ते लौका नु मजबूर करती गेहती आ कि माये घर भरीती जाओ।

²⁴ कांकि मैं तम्हानु किहे पला कि छेड़ा ङिले लौका महु कुई माये भोज़ नु नी चाखी।’ ”

चैला बणने चा मोल

²⁵ जिसे बेले बङी भीड़ ईशु चे लारे जाये पलती, तां ओणे भांसु घूमती कर लौका नु केहले,

²⁶ “अगर कुई माये गोढु आवे, ते आपणे आई-ब़ा ते घराआली ते ब़ाले ते भावां ते ब़ेहणीया बल्कि आपणी जान कनु वी ज्यादा मनु प्रेम करे, तां ही ओ माया चैला हो सग़े।

²⁷ ते जको कुई आपणा क्रूस ना चवी, ते माये भांसु ना आओ, ओ वी माया चैला ना हो सग़ी।

²⁸ “तम्हा महु कूण छै जको किला बणावणे चाहते हो, ते पेहले ब़ेसती कर खर्चा ना जोड़ो कि पुरे करने ची ताकत माये कनु छै के कोनी?

²⁹ कङी इसड़े ना हो कि जिसे बेले ओ नीम भरती गिहो पर तियार ना कर सग़ो, तां सारे ङेखणे आले ईं केहती कर ओनु मजाकी मां उङारु लाग़ो।

³⁰ ते किहे, ‘ईं बन्दे बणाऊ लाग़ले, पर तियार ना कर सग़ले।’

³¹ “जा कूण इसड़ा राजा छै जको ङुजे राजे लारे योद्ध करु जता हो, ओ पेहले ब़ेसती कर विचार ना करती गिहो कि जको बीस हजार योद्धे गेहती कर माये उपर चढ़ाई करली आवे, का मैं ङस हजार योद्धे गेहती कर ओचा सामना कर सग़े जा कोनी?

³² ना तां ओ राजे कनु दूर रेहती ही ओ दूता नु भेज़ती कर मेल-मिलाप ची शर्त चे बारे मां पूछी।

³³ यूं करती तम्चे महु जको कुई आपणे सारे कोच्छ छोड़ती ना ङियो, तां ओह माया चैला ना हो सग़ी।

बे स्वाद लूण

³⁴ “लूण आच्छे छै, पर अगर लूणा चा स्वाद बिगड़ती जाये, तां बल्ति किसी चीजे लारे नमकीन करले जई?

³⁵ ऊं ना तां भोंये चे ते ना खाद चे वास्ते कामा मां आवे, ओनु तां लौक ब़ाहर भुकाती नाखी। जाये सुणने चे कान हो ऊं सुणती गिहो।”