यूहन्ना 21 - ओङ राजपूततिबिरियास झील चे किनारे चैला चे सामणे प्रकट हुवणे 1 यां बाता चे बाद ईशु ने आपणे आप नु तिबिरियास झील चे किनारे चैला चे सामणे प्रकट हुला। ते ये रीत लारे प्रकट हुला। 2 शमौन पतरस, ते थोमा जको दिदुमुस किहवावे, ते गलील चे काना शहरा चा नतनएल, ते जबदी चे पूत, ते ओचे चैला महु ङोन नेरे जणे भेले हुते। 3 शमौन पतरस ने वानु केहले, “मैं माछलीया पकड़ु जाये पला।” वाणे ओनु केहले, “अम्ही वी दुधे लारे चालु पले” तां वे निकलती कर ब़ेड़ी उपर चढ़ले, पर वे राती नु कहीं ना पकड़ले। 4 पुरा फुटते ही ईशु किनारे उपर आती भिला रेहला, तां वी चैला ने ना पिछाणले कि हा ईशु छै। 5 तब ईशु ने वानु केहले, “हे माये मित्र, तम्चे कनु कोच्छ माछलीया छी का?” वाणे उत्तर ङिला कि, “कोनी।” 6 ओणे वानु केहले, “ब़ेड़ी चे सज़्ज़े पासु जाल नाखा तां मिलती जाये।” तब वाणे जाल नाखला, ते हमा माछलीया ची बढोतरी कनु ओनु छेक ना सग़ले। 7 ऐवास्ते ओ चैला जको लाङका किहवाता पतरस नु केहले, “हा तां प्रभु छै!” ईं सुणते ही कर पतरस उघाड़ा हुता उब़ाहली कनु चादर बलेठती कर ओनु मिलणे वास्ते पाणीया मां टप्पा मारती ङिला। 8 पर नेरे चैले ब़ेड़ी उपर माछलीया लारे भरला आला जाल छिकते हुले आले, कांकि वे किनारे कनु ज्यादा दूर कोनी, कुई ङोन साओ हाथा उपर हुते। 9 जिसे बेले किनारे उपर उतरले, तां वाणे कौले चे जाखते उपर माछली मेहली हुली, ते रोटी ङेखली। 10 ईशु ने वानु केहले, “जको माछलीया तम्ही हमा पकड़लीया, वांचे महु कहीं आणा।” 11 शमौन पतरस ने ब़ेड़ी उपर चढ़ती कर हेक साओ तरेपन बङीया माछलीया लारे भरला आला जाल किनारे उपर छिकला, ते इतनीया माछलीया हुवणे उपर वी जाल कोनी फड़ीला। 12 ईशु ने वानु केहले, “कि आवा खाणे खावा।” ते चैला महु कानु वी हिम्मत ना हुली कि ओकनु पूछु कि, “तु कूण छी?” कांकि वे जाणती गेलते कि ओ प्रभु ही छै। 13 ईशु आला, ते रोटी चती कर वानु ङिली, ते यूं माछली वी। 14 हा तीजी वारी छै कि ईशु मरले आला महु जीते हुवणे चे बाद चैला नु दर्शन ङिले। ईशु ते पतरस 15 खाणा खाणे बाद, ईशु ने शमौन पतरस नु केहले, “हे शमौन यूहन्ना चा पूत, का तु यांचे कनु बधती कर माये लारे प्रेम राखी?” ओणे ओनु केहले, “हव्वे प्रभु, तु तां जाणी कि मैं दुधे लारे प्रीत राखे।” ईशु ने ओनु केहले, “माये मेमणा नु चर्रा।” 16 ओणे बल्ति ङुजी वारी ओनु केहले, “हे शमौन यूहन्ना चा पूत, का तु माये लारे प्रेम राखी?” ओणे ओनु केहले, “हव्वे प्रभु, तु जाणी कि मैं दुधे लारे प्रीत राखे।” ईशु ने ओनु केहले, “माये भेङा ची रखवाली कर।” 17 ओणे तीजी वारी ओनु केहले, “हे शमौन यूहन्ना चा पूत, का तु माये लारे प्रीत राखी?” पतरस उदास हुला कि ओणे तीजी वारी इसड़े केहले कि, “का तु माये लारे प्रीत राखी?” तां पतरस ने केहले, “हे प्रभु, तु तां सब कोच्छ जाणी, तु ईं जाणी कि मैं दुधे लारे प्रीत राखे।” ईशु ने ओनु केहले, “माया भेङा नु चर्रा। 18 मैं तनु सच्च-सच्च किहे पला, जब तु जवान हुता तां आपणी कमर कसती जिठे चाहता उठे फिरता रेहता, पर जब तु ब़ुढा हुवे तां आपणे हाथ पसारे, ते ङुजे तनु ब़ांहती कर जिठे तु नी चाहवे ओठे तनु गेहती जई।” 19 ओणे यां बाता लारे बावड़ती ङिले कि पतरस किसड़ी मौत लारे नरीकारा ची महिमा करी। बल्ति ओनु केहले, “माये भांसु आ!” ईशु ते लाङका किहवावणे आला चैला 20 पतरस ने मुड़ती कर ओ चैले नु भांसु आते ङेखले, जको लाङका किहवाता, ते जेह्णे खाणे चे बेले ओची छात्ती ची तरफ झुकती कर पूछले हुते, “हे प्रभु, तनु पकड़ावणे आला कूण छै?” 21 ओनु ङेखती कर पतरस ने ईशु नु केहले, “हे प्रभु, ऐचा का हाल हुवी?” 22 ईशु ने ओनु केहले, “अगर मैं चाहवें कि ओ माये आणे तक रुकला रिहो, तां तनु का? तु माये भांसु हुती पड़।” 23 ऐवास्ते भावां मां हा बात खिंडती गेली कि ओ चैला नी मरी। ईशु ने ओनु ईं कोनी केहले कि हा नी मरी, पर ईं कि, “अगर मैं चाहवें कि ओ माये आणे तक रुकला रिहो, तां तनु का?” निचोड़ 24 हा ओही चैला छै, जको यां बाता ची ग़वाही ङिये ते यां बाता नु लिखलीया। अम्ही सब जाणु, कि ओची ग़वाही सच्ची छै। 25 नेरे वी ब़ोहत सारे काम छै जको ईशु ने करले। अगर वे हेक-हेक करती लिखले जईया, तां मैं समझे कि किताबा जको लिखलीया जईया वे संसारा मां वी ना समावीया। |
CC BY-NC-ND 4.0