यूहन्ना 13 - ओङ राजपूतईशु ने चैला चे पग़्ग़ धोले 1 फसह चे तेंहवार चे पेहले, ईशु नु पता लाग़ला कि ओची वा घड़ी आती गेली कि संसार छोड़ती कर नरीकारा ब़ा चे गोढु जाये। तां आपणे लौका लारे जको संसारा मां हुते, जिंवे प्रेम ओ राखता आखरी तक उसड़ा ही प्रेम करता रेहला। 2 आथणे खाणे बेले, शैतान ने, शमौन चे पूत, यहूदा इस्करियोती चे मना मां ईं नाखती चुकला हुता कि ईशु नु धोक्के लारे पकड़वाओ। 3 ईशु ने ईं जाणती कर कि नरीकारा ब़ा ने सब कोच्छ ओचे हाथा मां करती ङिले, ते ओ नरीकारा कनु आला ते नरीकारा चे गोढु जाये पला, 4 ऐवास्ते ओ खाणे कनु उठती कर, आपणा घग्गा उतारती ङिला, ते रुमाल चती आपणी कमर ब़ांधली। 5 बल्ति ठांवा मां पाणी भरती चैला चे पग़्ग़ धोऊं ते जिसे रुमाला लारे ओणे कमर ब़ांधली हुती ओचे लारे लुंह लाग़ला। 6 जिसे बेले ओ शमौन पतरस चे गोढु आला, बल्ति पतरस ने ओनु केहले, “हे प्रभु, का तु माये पग़्ग़ धोवे?” 7 ईशु ने ओनु केहले, “जको मैं करे तु ओनु हमा ना जाणी, पर ऐचे बाद समझे।” 8 पतरस ने ओनु केहले, “तु माये पग़्ग़ कङी वी नी धो सग़े।” ईं सुणती ईशु ने ओनु केहले, “अगर मैं ना धोवे, तां माये लारे दुधा कुई वी साझा कोनी।” 9 शमौन पतरस ने ओनु केहले, “हे प्रभु, तां माये पग़्ग़ ही ना, बल्कि हाथ ते ठोङ वी धोती ङे!” 10 ईशु ने ओनु केहले, “जको झूलती चुकला ओनु पग़्ग़ा चे अलावा होर कोच्छ धोवणे ची जरुरत कोनी, पर ओह बेलकोल शोद्ध छै। ते तम्ही शोद्ध छिवा, पर सारे चे सारे कोनी।” 11 ओ तां आपणे पकड़ावणे आले नु जाणता, ऐवास्ते ओणे केहले, “तम्ही सारे चे सारे शोद्ध कोनी।” 12 जिसे बेले वांचे पग़्ग़ धोती चुकला, ते आपणा घग्गा घालती कर बल्ति ब़ेसती रेहला। तां वानु किहुं लाग़ला, “का तम्ही समझले कि मैं तम्चे लारे का करले? 13 तम्ही मनु गुरु ते प्रभु किहा, ते ठीक ही किहा, कांकि मैं ओही छै। 14 अगर मैं प्रभु ते गुरु हुती कर, तम्चे पग़्ग़ धोले, तां तम्हानु वी हेके ङुजे चे पग़्ग़ धोवणे चाही छै। 15 कांकि मैं तम्हानु नमुना ङिखाणती ङिला कि जिंवे मैं तम्चे लारे करले तम्ही वी यूंही करले करा। 16 मैं तम्हानु सच्च-सच्च किहे पला, दास आपणे मालिक कनु बङा ना हुवी, ते ना भेज़ला आला, आपणे भेज़णे आले कनु। 17 तम्ही ये बाता जाणा, ते अगर वांचे उपर चला तां धन्न छिवा। 18 “मैं तम्चे सब चे बारे मां ना किही, जानु मैं चुणले वानु मैं जाणे। पर ईं ऐवास्ते छै कि पवित्रशास्त्र चा हा वचन पूरा हो, ‘जको माई रोटी खाये ओणे माये उपर लत चली।’ 19 “हमा मैं ऊं हुवणे कनु पेहले तम्हानु चितावें पला, कि जिसे बेले हुती जाये तां तम्ही विश्वास करा कि मैं ओही छै 20 मैं तम्हानु सच्च-सच्च किहे पला कि जको माये भेज़ले आले नु स्वीकार करे, ओ मनु स्वीकार करे, ते जको मनु स्वीकार करे, ओ माये भेज़णे आले नु स्वीकार करे।” धोक्के बाजा सनु इशारा ( मत्ती 26:20–25 ; मरकुस 14:17–21 ; लूका 22:21–23 ) 21 ये बाता केहती कर ईशु आत्मा मां उदास हुला ते हा ग़वाही ङिली, “मैं तम्हानु सच्च-सच्च किहे पला कि तम्चे महु हेक मनु धोक्के लारे पकड़वावी।” 22 चैले हा शक्क करते हुले कि ओ काये बारे मां किहे पला हेके-ङुजे सनु ङेखु लाग़ले। 23 ओचे चैला महु हेक, जको लाङका किहवाता, ओ ईशु ची छात्ती सनु झुकला आला ब़ेहला हुता। 24 शमौन पतरस ने ओची तरफ इशारा करती कर ओकनु पूछले, “बावेड़ तां, ओ काये बारे मां किहे पला।” 25 तब ओणे वेही तरह ईशु ची छात्ती ची तरफ झुकती कर ओकनु पूछले, “हे प्रभु, ओ कूण छै?” 26 ईशु ने उत्तर ङिला, “जानु मैं ईं रोटी चे टुकड़े ब़ोड़ती कर ङिही ओही छै।” ते ओणे टुकड़े ब़ोड़ती कर, शमौन इस्करियोती चे पूत यहूदा नु ङिले। 27 ते टुकड़े गेहते ही शैतान ओचे मां समाती गेला। बल्ति ईशु ने ओनु केहले, “जको तु करी, तुरन्त कर।” 28 पर खाणे उपर ब़ेसणे आला महु किह्णी कोनी जाणले कि ओणे हा बात ओचे लारे के वास्ते केहली 29 यहूदा चे गोढु ग़ुथली रेहती, ऐवास्ते कईयां ने समझले कि ईशु ओनु किहे पला कि जको कोच्छ अम्हानु तेंहवारा वास्ते चाही छै ऊं मोल गेहती गे, यां ईं कि गरीबा नु कोच्छ ङे जती। 30 तां ओ रोटी चे टुकड़े चती कर ब़ाहर चाह्ला गेला। ते हा राती चा ब़ेहला हुता। नवीं आज्ञा 31 जिसे बेले यहूदा इस्करियोती ब़ाहर चाह्ला गेला, ईशु ने केहले, “हमा मैं इन्साना चे पूता ची महिमा हुली ते नरीकारा ची महिमा माये मां हुली। 32 अगर माये मां नरीकारा ची महिमा हुली, तां नरीकार वी मैं पूत छै ची महिमा करी, ते तुरन्त करी। 33 हे ब़ाले, मैं थोड़ी देर तम्चे गोढु छै। बल्ति तम्ही मनु सोधा, ते जिंवे मैं यहूदिया नु केहले कि, ‘जिठे मैं जाये पला, ओठे तम्ही ना आ सग़ा।’ यूंही मैं हमा तम्हानु वी किहे पला, 34 मैं तम्हानु हेक नवीं आज्ञा ङिये पला कि हेके ङुजे लारे प्रेम करा। जिंवे मैं तम्चे लारे प्रेम करला, तम्ही वी हेके ङुजे लारे प्रेम राखा। 35 अगर आपस मां प्रेम राखा, तां ऐचे कनु सब जाणे कि तम्ही माये चैले छिवा।” पतरस चे मुकरने चा इशारा ( मत्ती 26:31–35 ; मरकुस 14:27–31 ; लूका 22:31–34 ) 36 शमौन पतरस ने ओनु केहले, “हे प्रभु, तु किठे जई पला?” ईशु ने केहले, “जिठे मैं जाये पला, उठे तु हालि माये भांसु आ ना सग़ी, पर ऐचे बाद माये भांसु आवे।” 37 पतरस ने ओनु केहले, “हे प्रभु, हमा मैं दुधे भांसु कां ना आ सग़ी? मैं तां दुधे वास्ते आपणी जान वी ङिती ङिही।” 38 ईशु ने उत्तर ङिला, “का तु माये वास्ते आपणी जान ङिये? मैं तनु सच्च-सच्च किहे पला कि कूकड़ा बांग ङिही जब तक तु तीन वारी माया इन्कार नी करती गिहे।” |
CC BY-NC-ND 4.0