याकूब 1 - ओङ राजपूतनमस्कार 1 नरीकारा चा ते प्रभु ईशु मसीह चा दास याकूब चे तरफु वां ब़ारहा गोत्रा नु जको खिंडती-पुंडती रिही पले वानु नमस्कार पुज़ो। विश्वास ते ब़ुध्दिमानी 2 हे माये भऊ, जिसे बेले तम्ही हर-तरहा ची परीक्षा मां पड़ा तां यिनु पुरी खुशी ची बात समझा, 3 ईं जाणती कर कि तम्चे विश्वासा चे परखणे जाणे लारे सब्र पैदा हुवे। 4 पर सब्रा नु आपणे पुरे काम करु ङिया, कि तम्ही पुरे ते सेद्ध हुती जावा ते तम्चे मां कुई बाते ची घटी ना रिहो। 5 पर तम्चे महु कानु ब़ुध्दि ची घटी हो तां नरीकारा कनु मांगो जको बिना उलाहणा ङिले सारा नु उदारता लारे ङिये, ते ओनु ङिली जई। 6 पर विश्वासा लारे मांगा, ते कहीं शक्क ना करा। कांकि शक्क करने आला समुन्दरा ची लहर आलीकर छै जको हवाई लारे बीहे ते उछलती रिहे। 7 इसड़े बन्दे ईं ना समझो कि, “मनु प्रभु कनु कहीं मिली।” 8 ओ शक्स ङोन दिला छै, ते आपणीया सारीया बाता मां छिमछिरा छै। गरीबी ते अमीरी 9 गरीब भऊ आपणे ऊंचे पद्द चे उपर घमण्ड करो। 10 ते अमीर भऊ आपणी झिकी हालत उपर घमण्ड करो, कांकि ओ खड़ा चे फूलां आलीकर जता रिही। 11 कांकि सूरज उभरते ही तकड़ा चिटका पड़े ते खड़ सुखाती ङिये ते ओचे फूल किर्ती जाये ते ओची शोभा जती रिहे। यूं करती धनवान वी आपणे मार्ग़ा पर टुरते-टुरते धूड़ मां मिलती जाये। नरीकार परीक्षा ना करी 12 धन्न छै ऊं बन्दे जको परीक्षा मां मजबूत रिहे कांकि ऊं खरे निकलती कर जीन्दगी चा ओ मुग़ट गिही जाया वायदा प्रभु ने आपणे प्रेम करने आला वास्ते करला। 13 जिसे बेले काई परीक्षा हो, तां ऊं यूं ना किहो कि, “माई परीक्षा नरीकारा चे तरफु हुवे।” कांकि ना तां बुरीया बाता लारे नरीकारा ची परीक्षा हो सग़े, ते ना ओ काई परीक्षा आप करे। 14 पर हर हेक इन्सान आपणी ही अभिलाषा लारे छिकीती कर ते फसती कर परीक्षा मां पड़ती जाये। 15 बल्ति इच्छा भरले गर्भवती हुती कर पापा नु जणती ङिये ते पाप जिसे बेले बधती जाये तां मौत नु पैदा करे। 16 हे माये प्यारे भऊ धोक्का ना खावा। 17 कांकि हर हेक आच्छा वरदान ते हर हेक आच्छा दान उपर कनु ही छै, ते हा ओ परम ब़ा जेह्णे स्वर्ग़ीय सोज़ले नु पैदा करले जाये मां ना तां कुई बदलाव हो सग़े ते ना अदला बदली ची वजह कनु ओचे उपर छां पड़े। 18 ओणे आपणी ही इच्छा लारे अम्हानु सच्च चे वचना चे जरिये पैदा करले कि अम्ही ओची सृष्टि करली हुली चीजा महु हेक तरह चे पेहला फल छिऊं। सुणने ते ओचे उपर टुरणे 19 हे माये प्यारे भऊ, हा बात तम्ही जाणती गिहा। हर हेक बन्दे सुणने वास्ते तियार, ते ब़ोलणे वास्ते मठे, ते क्रोधा मां मधम हो, 20 कांकि बन्दे चा क्रोध नरीकारा ची धार्मिकता नु निभा ना सग़ी। 21 ऐवास्ते, सारी मलिनता ते बैरभाव ची बढ़ोतरी नु दूर करती कर, ओ वचना नु नरमाई लारे ग्रहण करती गिहा, जको दिला मां राहला गेला ते जको तम्ची जानी चा उद्धार कर सग़े। 22 पर वचना उपर चलणे आले बणा, ते सेर्फ सुणने आले ही ना जको आपणे आप नु धोक्का ङी। 23 कांकि जको वचना नु सुणने आले हो, ते ओचे उपर चलणे आले ना हो, तां ओह ओ बन्दे आलीकर छै जको आपणे सुभाविक मुँह शीशे मां ङेखे। 24 ऐवास्ते कि ओ आपणे आप नु ङेखती कर चाह्ला जाये ते तुरन्त भूलती जाये कि, “मैं किसड़ा हुता?” 25 पर जको बन्दे आजादी ची सेद्ध व्यवस्था उपर ध्यान करता रिहे, ओह आपणे कामा मां ऐवास्ते आशीष गिही कि सुणती कर भुली ना, पर उसड़े ही काम करे। भग़ती चा सच्चा मार्ग़ 26 अगर कुई आपणे आप नु भग़त समझे, ते आपणी जुबानी उपर लगाम ना ङी, तां ओ आपणे आप नु धोक्का ङिये, ओची भग़ती बेकार छै। 27 अम्चे नरीकार ते ब़ा चे गोढु शोद्ध ते सुथरी भग़ती हा छै कि छिन्नेछोरा ते बांढीया चे क्लेशा मां वांची सुधि गिहो, ते आपणे आप नु संसारा कनु बेदाग राखो। |
CC BY-NC-ND 4.0