इब्रानियां 9 - ओङ राजपूतसंसारिक तम्बू 1 पेहली वाचा मां नरीकारा ची अराधना चे बारे मां नियम हुते, इन्सान चे हाथा ची बणाली हुली हेक अराधना ची जग़हा हुती। 2 वाणे हेक तम्बू बणाला, जाये मां ङोन खाने हुते, ओचे पेहले खाने मां ङीवा, मेज ते भेंट चा रोटीया मेहलीया जतीया। हां तम्बूआ चा हेंस्सा पवित्र स्थान किहवाता। 3 ङुजे पड़दे चे भांसु जको खाने हुते ओ अति पवित्र स्थान किहवाता। 4 ओठे सोने ची धूपदानी, ते सोने चे पत्तर लारे मढ़ली आली वाचा ची सन्दूक, ते विचे मां मना लारे भरले आले सोने चे ठां, ते हारुन ची गेङी जाये मां फूल-फल आती गेलते ते वाचा चीया तख्तीया मेहलीया आलीया हुतीया। 5 ऐचे अलावा सन्दूके चे उपर ङोनी तेजोमय करुब हुते जको प्रायश्चित चे ढकणा चे उपर छां करली भिलते, यांचा हेक-हेक करती विस्तार लारे बावड़ने चा हालि मौका कोनी। संसारिक सेवा चीया हद्दा 6 यां सब चे इसड़े प्रबन्ध चे बाद नरीकारा ची अराधना वास्ते याजक हर समय तम्बूआ चे पेहले खाने, यानि पवित्र स्थान मां घिरती कर सेवा चे काम पुरे करते। 7 पर ङुजे खाने यानि अति पवित्र स्थान मां सेर्फ महायाजक ही जता, ते ओ वी साला मां सेर्फ हेक ही मौके उपर, लुहीं चती कर खौद्द वास्ते ते लौका चे अणजाणे मां करले गेले पापा वास्ते भेंट चढ़ावणे वास्ते जता। 8 पवित्र आत्मा हा बात स्पष्ट करे कि जब तक तम्बूआ चे पेहले खाने छै, तब तक अति पवित्र स्थान मां जाणे चा मार्ग़ खुला कोनी। 9 हा तम्बूआ चे पेहले खाने वर्तमान काल चा चैन्ह छै, सच्च ईं छै कि भेंट ते बलि जको याजका चे जरिये चढ़ाली जती अराधना करने आला चे विवेक सेद्ध ना हो सग़ी। 10 ऐवास्ते कि वे सेर्फ खाणे-पीणे चीया चीजा, तरह तरह चे इश्नान विधि चे अधार उपर शरीरिक नियम छी, जको नरीकारा चे नवें विधान तक नियुक्त करले गेले छी। स्वर्ग़ीय तम्बू 11 पर जब मसीह आणे आलीया आच्छीया चीजा चे महायाजक चे रुप मां प्रकट हुला, ओणे उत्तम ते सेद्ध तम्बूआ महु, जको हाथा चा बणाला आला कोनी यानि संसारिक कोनी हुता। 12 ब़करा ते बछड़ा चे लुहींया चे जरिये ना, पर खौद्द आपणे ही लुहींया चे जरिये अति पवित्र स्थान मां सेर्फ हेक ही बार जाणे लारे अम्चे पापा वास्ते अनन्त छुटकारा पक्का करला। 13 कांकि व्यवस्था चे अनुसार जब ब़करा ते ङान्दा चे लुहीं ते बछड़ी ची कैरी अपवित्र लौका उपर छंडकणे लारे शरीरा ची शुद्धता वास्ते पवित्र करे, 14 तां मसीह चे लुहीं, जेह्णे आपणे आप नु अनन्त आत्मा चे जरिये खौद्द नु नरीकारा चे सामणे निर्दोष बलि चे रूपा मां भेंट करती ङिले, जीते नरीकारा ची सेवा वास्ते तम्चे विवेक नु मरले आले कामा कनु शोद्ध किवें नी करी? 15 ऐवास्ते ओ हेक नवीं वाचा चा बिचोला छै, कि वे मौत चे जरिये जको पेहली वाचा चे समय चे अपराधा कनु छुटकारा गेहणे वास्ते हुली, हकारले आले लौक वायदे चे अनुसार अनन्त विरासत नु गिहो। 16 जिठे तक वसीयत नांवा चा सवाल छै, तां ओचे वास्ते जेह्णे ओनु लिखले, ओची मौत नु प्रमाणित करने जरुरी छै। 17 कांकि कुई वसीयत नांवा तभी ही प्रभावित हुवे, जब ओचे लिखणे आले ची मौत हुती जाये। तब तक विचा लिखणे आला जीता रिहे वा कङी प्रभावित ना रिही। 18 ऐवास्ते पेहली वाचा वी बिना लुहींया चे कोनी ब़ांहली गेली। 19 कांकि जब मूसा सब लौका नु व्यवस्था ची हर हेक आज्ञा सुणाती चुकला, तां ओणे बछड़ा ते ब़करा चे लुहीं चती कर, पाणी ते लाल ऊन ते जूफे चे ग़ुच्छे लारे वे किताबे उपर ते सारे लौका उपर छंडकती ङिले, 20 ते केहले, “ईं वे वाचा चे लुहीं छै जाई आज्ञा नरीकारा ने तम्चे वास्ते ङिली छै।” 21 ते यूं करती ओणे तम्बू ते सेवा चे सारे समाना उपर लुहीं छंडकले। 22 ते व्यवस्था चे अनुसार सब चीजा लुहींया चे जरिये पवित्र करलीया जई, ते बिना लुहीं बाहले पापा ची माफी ना हुवी। मसीह चे बलिदाना लारे पाप माफ 23 ऐवास्ते जरुरी छै कि, स्वर्ग़ीय चीजा चा प्रतिरुप, येही बलिदाना चे जरिये शोद्ध करले जाओ, पर स्वर्ग़ीय चीजा यांची तुलना मां उत्तम बलिदाना चे जरिये शोद्ध करलीया जई। 24 कांकि मसीह ने ओ इन्साना चे हाथा चा बणले आले अति पवित्र स्थान मां जको सच्चे अति पवित्र स्थान चा प्रतिरुप छै, प्रवेश कोनी करला, पर स्वर्ग़ा मां प्रवेश करला कि अम्चे वास्ते, हमा नरीकारा चे सामणे ङिसो। 25 ईं कोनी कि ओ आपणे आप नु बलि वास्ते बार-बार चढ़ाओ, जिंवे कि महायाजक हर साल बलि चे लुहीं नु चती कर अति पवित्र स्थान मां प्रवेश करता रेहता, जको लुहीं ओचे खौद्द चे ना हुते। 26 ना तां जग़त ची उत्पत्ति कनु गेहती कर मसीह नु बार-बार ङोख चवणे पड़ी हा। पर हमा युगा चे अन्त मां ओ सारा वास्ते हेको ही बार खौद्द आपणी ही बलि चे जरिये पाप नु मिटाती ङेणे वास्ते प्रकट हुती गेला। 27 ते जिंवे इन्साना वास्ते हेक वारी मरणे ते ओचे बाद न्यां चे हुवणे तय छै, 28 यूं करती मसीह ब़ोहता चे पाप चवणे वास्ते हेक ही वारी खौद्द नु भेंट करले। ओचे बाद हमा दुबारा प्रकट हुवी, पापा नु चवणे वास्ते ना, पर वांचे उद्धार वास्ते जको ओचे इन्तजार मां छी। |
CC BY-NC-ND 4.0