इब्रानियां 2 - ओङ राजपूत

महान उद्धार

¹ ऐवास्ते जरुरी छै कि अम्ही जको सुणले, ओचे उपर खास ध्यान ङिऊं, इसड़े ना हो कि बहकती कर वांचे कनु दूर चाह्‍ले जऊं।

² कांकि जको वचन स्वर्ग़दूता चे जरिये केहला गेला हुता, जिसे बेले ओ स्थिर रेहला ते हर हेक अपराध ते आज्ञा ना मनणे आला नु ठीक-ठीक बदला मिड़ला,

³ तां अम्ही लौक इसड़े महान उद्धार ची बेपरवाही करती कर आणे आले ङण्ड कनु किवें बच सग़ु? जाई चर्चा सबकनु पेहले खौद्द प्रभु चे जरिये करली गेली, ते प्रभु नु सुणने आला चे जरिये अम्हानु विश्‍वास हुला।

⁴ ओचे अलावा नरीकारा ने वी चैन्ह, चमत्कार ते अलग़-अलग़ अदभोत कामा चे जरिये ते पवित्र आत्मा चे वरदाना चे जरिये जको ओची इच्छा चे अनुसार अम्हानु ङिले गेले हुते, ऐची ग़वाही ङिता रेहला।

अम्चा उद्धारकर्ता

⁵ नरीकारा ने आणे आली जग़त नु जाई चर्चा अम्ही करु पले, स्वर्ग़दूता चे अधीन कोनी करले।

⁶ पर पवित्रशास्त्र मां किह्णी हा ग़वाही ङिली, “इन्सान का छै, कि तु ओची सुधि गिही? जा इन्साना चा पूत का छै, कि तु ओचा आप ध्यान राखी?

⁷ तु ओनु सेर्फ थोड़े समय वास्ते स्वर्ग़दूता कनु थोड़े ही तले राखले, तु ओचे उपर महिमा ते आदर चा मुग़ट मेहला

⁸ तु सब कोच्छ ओचे पग़्ग़ा तले करती ङिले।” ऐवास्ते जबकि ओणे सब कोच्छ ओचे अधीन करती ङिले, तां ओणे कोच्छ वी कोनी राखले जको ओचे अधीन ना हो। पर अम्ही हमा तक सब कोच्छ ओचे अधीन ना ङेखु।

⁹ पर अम्ही ईशु नु जको स्वर्ग़दूता कनु कोच्छ थोड़े ही समय वास्ते तले राखला गेला हुता मौत चे ङोख चवणे ची वजह महिमा ते आदर चा मुग़ट घाले आले ङेखु, कि नरीकारा चे अनुग्रह लारे ओ हर हेक इन्साना वास्ते मौत चा स्वाद चाखो।

¹⁰ कांकि जाये वास्ते सब कोच्छ छै, ते जाये जरिये सब कोच्छ छै, नरीकारा नु ईं आच्छे लाग़ले कि जिसे बेले ओ ब़ोहत सारे पूता नु महिमा मां पुचाओ, तां वांचे उद्धारकर्ता ईशु नु ङोख चवणे चे जरिये सेद्ध करो।

¹¹ कांकि पवित्र करने आला ते जको पवित्र करले जई, सब हेक ही ब़ा कनु छी, यानि नरीकार कनु। येही वजह कनु ईशु वानु भऊ केहणे कनु ना लज़ावी।

¹² पर ओ किहे, “मैं दुधे नां आपणे भावां नु सुणावी, सभा चे बीच मां मैं दुधा भज़न गांवी।”

¹³ ते बल्ति ईं, “मैं वांचे उपर भरोसा राखी।” ते बल्ति ईं, “मैं ते वे, जेह्णे ऊलाद्ध चे रुप मां नरीकारा ने मनु सोंपले छै, इठे छिऊं।”

¹⁴ ऐवास्ते कि ऊलाद्ध लुहींया ची ते मांस ची हुवे, मसीह ईशु वी लुहीं ते मांस चे हुती गेले कि मौत चे जरिये ओ ओनु यानि शैताना नु, जाये मां मौत ची ताकत हुती, कमजोर करती ङियो

¹⁵ ते ओ वां सारा नु आजाद करती ङियो, जको मौत चे ङर ची वजह जीवन भर दासत्व चे अधीन हुती कर रेहती गेलते।

¹⁶ कांकि ओ तां स्वर्ग़दूता नु ना, बल्कि अब्राहम चे वंश नु सम्भाले।

¹⁷ ऐवास्ते ओनु जरुरी हुते, कि सब बाता मां आपणे भावां आलीकर बणो, जाये कनु ओ वां बाता मां जको नरीकारा लारे मेल खई, हेक दया करने आला ते भरोसेमन्द महायाजक बणो, कि लौका चे पापा वास्ते प्रायश्‍चित करो।

¹⁸ कांकि जब ओणे परीक्षा ची दशा मां ङोख चले, तां ओ वांची वी सहायता कर सग़े, जाई परीक्षा हुवे।