इफिसियां 1 - ओङ राजपूत1 पौलुस चे तरफु जको नरीकारा ची इच्छा लारे ईशु मसीह चा प्रेरित छै, वां पवित्र ते मसीह ईशु मां विश्वासी लौका चे नांवे जको इफिसुस शहरा मां छी। 2 अम्चे ब़ा नरीकार ते प्रभु ईशु मसीह ची तरफा कनु तम्हानु अनुग्रह ते शान्ति मिलती रिहो। प्रभु ईशु मसीह मां आत्मिक आशीषा 3 अम्चे प्रभु ईशु मसीह चा नरीकार ते ब़ा चा धन्यवाद हो, ओणे अम्हानु स्वर्ग़ा मां ईशु मसीह चे तरफु हर तरह ची आत्मिक आशीष ङिली। 4 जिंवे नरीकारा ने अम्हानु संसारा ची उत्पत्ति कनु पेहले ओचे महु चुणती गेहले कि अम्ही ओचे गोढु, प्रेम मां पवित्र ते निर्दोष हुं, 5 प्रेम मां नरीकार ची आपणी मर्जी लारे अम्हानु बणाले कि ईशु मसीह मां अम्ही गोद गेहले आले नरीकारा चे पूत रिहुं, ओही ओचा मकसद ते खुशी हुती। 6 नरीकारा ची महिमा कनु भरला आले, ओ अनुग्रह ची स्तुति हो, जो ओणे अम्हानु ओ प्यारे पूता मां मुक्त मे ङिला 7 अम्हानु ओचे मां ओचे लुहींया चे जरिये छुटकारा, यानि पापा ची माफी, ओचे ओ अनुग्रह चे धन चे अनुसार मिड़ला। 8 जिंवे ओणे सारे ज्ञान ते समझी समेत अम्चे उपर ब़ोहत करला, 9 कांकि ओणे आपणी इच्छा चा भेद, ओ बेले कामा चे अनुसार अम्चे उपर उजागर करला, जानु ओणे आपणे आप मां मसीह मां तय करती गेलते। 10 कि समया चे पुरे हुवणे चा इसड़ा प्रबन्ध हो कि जको कोच्छ स्वर्ग़ा मां छै ते जको कोच्छ धरती उपर छै, सब कोच्छ नरीकार मसीह मां भेले करो। 11 मसीह मां बणले आले जको आपणी इच्छा चे भली समझ चे अनुसार सब कोच्छ करी, ओणे आपणी योजना चे अनुसार अम्हानु पेहले कनु ठहराले कि उत्तरा अधिकारी बणने चा अधिकार मिलो। 12 अम्ही जेह्णे पेहले कनु ईशु मसीह उपर उम्मीद राखली, नरीकारा ची महिमा ची स्तुति चे वजह हो सग़ो। 13 ते जिसे बेले तम्ही सच्चाई चा वचन सुणला ओ तम्चे उद्धार चा सुसमाचार हुता, जिसे ईशु मसीह उपर तम्ही विश्वास करला ते वायदा करले आले पवित्र आत्मा ची छाप लाली। 14 पवित्र आत्मा ओचे मोल गेहले आला वास्ते छुटकारे चे वास्ते अम्ची वसीयत ची जमानत छै, कि ओचे लारे नरीकारा ची महिमा ची स्तुति हो। पौलुस ची प्राथना 15 ऐवास्ते, जिसे बेले मैं प्रभु ईशु मां तम्चे विश्वास ते सारे पवित्र लौका वास्ते तम्चे प्रेम चे बारे मां सुणले, 16 तम्चे वास्ते धन्यवाद करने ना छोड़ी, ते आपणी प्राथना मां तम्हानु याद करता रिहे। 17 कि अम्चे प्रभु ईशु मसीह चा नरीकार जको महिमा चा ब़ा छै, तम्हानु आपणी पिछाण मां ज्ञान ते सोज़ले ची आत्मा ङियो, 18 मैं ये बाते वास्ते वी प्राथना करे कि तम्चे मना ची आंख सोज़ले मां हो, तम्ही जाणती गिहा कि ओचे हकारने ची किसड़ी आस रिहे, ते नरीकारा चे पवित्र लौका मां ओची वसीयत ची महिमा ची किसड़ी दौलत छै। 19 ते ओची सामर्थ मां जको अम्ही विश्वास करु, हा कितनी बङी बात छै, हा सारे ओचे महान शक्ति चे काम चे अनुसार छै। 20 जको ओणे मसीह मां करले कि ओनु मरले आला महु जीते करती कर स्वर्ग़ा मां आपणे सज़्ज़े पासु, 21 सब प्रकार ची प्रधानता, ते अधिकार, ते सामर्थ ते प्रभुता चे, ते हर हेक नांवा चे उपर, जो ना केवल ऐ युगा मे, पर आणे आली लौका मां वी गेहले जई। 22 नरीकारा ने सब कोच्छ ओचे वशा मां करती ङिले, ओनु सारा महु बङे बणाती कर कलीसिया नु ङिले जती। 23 कलीसिया मसीह चे शरीर छै ते ओची भरपूरी छै जको सब मां मसीह खौद्द सब कोच्छ पूरा करे। |
CC BY-NC-ND 4.0