कुलुस्सियां 4 - ओङ राजपूत1 हे मालकु, आपणे-आपणे दासा लारे न्यां ते ठीक-ठीक व्यवहार करा, हा समझती कि स्वर्ग़ा मां तम्चा वी हेक मालिक छै। कोच्छ व्यवहारीक सलाह 2 प्राथना मां लाग़ले रिहा, ते हमेशा नरीकारा नु धन्यवाद करते रिहा ते ओचे मां जाग़ते रिहा। 3 ऐचे लारे-लारे अम्चे वास्ते प्राथना करते रिहा, कि नरीकार अम्चे वास्ते वचन सुणावणे चा इसड़ा मार्ग़ खोलती ङियो, कि अम्ही मसीह चे ओ भेद चा जिक्र कर सग़ु, जाये वजह मैं कैद मां छै। 4 ते तम्ही प्राथना करते रिहा। मैं ओ सुसमाचार नु इसड़ा प्रकट करे, कि वचन लौका नु इसड़ा साफ-साफ प्रचार करे जिसड़ा मनु करना चाही छै। 5 मौके नु कीमती समझती कर ब़ाहर आला लारे समझदारी लारे बर्ताव करा। 6 तम्चा वचन सदा दया समेत ते आच्छा हो, कि तम्हानु हर बन्दे नु उचित रीति लारे उत्तर ङेणा आती जाओ। आखरी नमस्कार 7 प्यारा भऊ, ते विश्वास चे लायक सेवक, तुखिकुस, जको प्रभु मां माये लारे काम करने आला छै, माया सारीया बाता तम्हानु बावड़ती ङी। 8 ओनु मैं तम्चे गोढु ऐवास्ते भेज़ले कि तम्ही अम्ची दशा जाणा, ते ओ तम्चे दिला नु शान्ति ङियो। 9 ओचे लारे मैं उनेसिमुस नु भेज़ले, जको विश्वास चे लायक ते प्यारा भऊ ते तम्चे महु ही छै, ये ङोनी तम्हानु इठलीया सारीया बाता बावड़ती ङिये। 10 अरिस्तर्खुस जको माये लारे कैदी छै, ते मरकुस जको बरनबास चा भऊ लाग़े वांचा ङुंहु चा तम्हानु नमस्कार। मरकुस जाये बारे मां तम्हानु आज्ञा मिड़ली हुती कि अगर ओ तम्चे गोढु आती जाये, तां ओची आच्छी इज्जत करजा 11 ते ईशु जको यूस्तुस किहवावे, तम्हानु नमस्कार किहे पला। खतना करले आले लौका महु सेर्फ येही नरीकारा चे राज़ चे वास्ते माये लारे काम करने आले ते माई शान्ति ची वजह रेहले। 12 इपफ्रास जको तम्चे महु हेक छै ते मसीह ईशु चा दास छै, तम्हानु नमस्कार किहे पला ते सदा तम्चे वास्ते प्राथना मां यतन करे, ताकि तम्ही सेद्ध हुती पुरे विश्वास चे लारे नरीकारा ची मर्जी उपर बणले रिहा। 13 मैं ओचा ग़वाह छै कि ओ तम्चे वास्ते ते लौदीकिया ते हियरापुलिस शहर आला चे वास्ते बङी मेहनत करता रिहे। 14 प्यारे वैद लूका ते देमास चा तम्हानु नमस्कार। 15 लौदीकिया शहरा चे भावां नु, ते नुमफास ते वांचे घरा ची कलीसिया नु नमस्कार केहजा। 16 जिसे बेले हा चिठ्ठी तम्ही पढ़ती गिहा तां इसड़े करजा कि लौदीकिया ची कलीसिया मां वी पढ़ली जाओ, ते वा चिठ्ठी जको लौदीकिया कनु आवे विनु तम्ही वी पढ़जा। 17 ते अर्खिप्पुस नु केहजा कि जको सेवा प्रभु मां तनु सोंपली गेली, विनु ध्यानारीत पुरी करियो। 18 मैं, पौलुस, खौद्द आपणे हाथा लारे नमस्कार लिखे पला। मनु याद राखजा, मैं कैदखाने मां छै। तम्चे पर अनुग्रह हुता रिहो। आमीन। |
CC BY-NC-ND 4.0