कुलुस्सियां 3 - ओङ राजपूत1 तां जिसे बेले तम्ही मसीह चे लारे जिवाले गेले, तां स्वर्ग़ीय चीजा ची खोज मां रिहा, जिठे मसीह मोजुद छै, ते नरीकारा चे सज़्ज़े पासु ब़ेहला। 2 धरती चीया चीजा उपर ना पर स्वर्ग़ीय चीजा उपर ध्यान लावा। 3 कांकि तम्चा पुराणा सुभाव तां मरती गेला, ते अम्ची तां जीन्दगी मसीह चे लारे नरीकारा मैं लुकली आली छै। 4 मसीह अम्ची जीन्दगी छै, जिसे बेले प्रकट हुवी, ओह बेले तम्ही वी ओचे लारे महिमा लारे प्रकट करले जावा। पुराणा जीवन ते नवां जीवन 5 ऐवास्ते आपणे-आपणे अंगा नु मारती नाखा, जको धरती उपर छी, यानि गन्दे काम अपवित्र, बुरी इच्छा, गन्दी आदत, लोभ जको मूर्ति चे बराबर छै। 6 यांचे ही वजह नरीकारा चा करोप आज्ञा ना मनले आले उपर पडे़। 7 ते तम्ही वी, जब यां बुराईया मां जीन्दगी गुजारते, ते यांचे अनुसार चलते। 8 पर हमा तम्ही वी यां सब नु, यानि क्रोध, ते रोष, बैरभाव, ते निन्दा, ते मुँहा कनु गालीया बकणीया ये सारीया बाता छोड़ती ङिया। 9 हेके ङुजे नु कूड़ ना मारा, कांकि तम्ही पुराणे सुभाव नु ओचे कर्मा समेत उतारती नाखले। 10 ते नवें सुभाव नु घाले जती, जको आपणे सृजनहार चे सुभाव चे अनुसार ज्ञान प्राप्त करने वास्ते नवें बणते जाये। 11 मतलब हा छै कि मसीह मां हमा ना तां कुई यूनानी रेहला, ना यहूदी, ना खतना, ते ना ही खतनारहित, ना जंगली, ना असभ्य, ना दास ते ना आजादी, मसीह यां सारा मां छै, ये सारी मसीह मां छी। 12 ऐवास्ते नरीकारा ने चुणले आला ची तरह जको पवित्र ते प्यारे छी, बङी दया, ते भलाई, ते दीनता, ते नरमाई, ते सहनशीलता धारण करा, 13 ते अगर कानु काये उपर दोष लावणे ची कुई वजह हो, तां हेक ङुजे ची सेहती गिहा ते हेक ङुजे चे अपराध माफ करा, जिंवे प्रभु ने तम्चे अपराध माफ करले, यूंही ही तम्ही करा। 14 यां सारा चे उपर जको प्रेम नु धारण करती गिहा जको प्रेम सारा नु एकता मां ब़ांधे। 15 ते मसीह ची शान्ति जिसे वास्ते तम्ही हेक शरीर मां हकारले गेले तम्चे दिला मां राज़ करो, ते तम्ही शुक्रगुजारी बणले रिहा। 16 मसीह चे वचन नु आपणे दिला मां गहराई लारे बसु ङिया ते सेद्ध ज्ञान समेत हेके ङुजे नु सिखावा ते चितावा, ते आपणे-आपणे मना मां अनुग्रह चे लारे नरीकारा चे वास्ते भज़न ते स्तुतिगान ते आत्मिक गीत गावा। 17 वचना मां जा कामा मां जको कोच्छ वी करा सब प्रभु ईशु चे नांवा लारे करा, ते ओचे जरिये नरीकार ब़ा चा धन्यवाद करा। नवें जीवन चे परिवारिक नियम 18 हे घराआलीया, जिंवे प्रभु मां वाजिब छै, यूंही आपणे-आपणे मुणसा चे अधीन रिहा। 19 हे घराआले, आपणी-आपणी घराआली लारे प्रेम राखा, ते वांचे लारे कठोरता ना करा। 20 हे ब़ाले, सारीया बाता मां आपणे-आपणे आई-ब़ा चे आज्ञाकारी बणा। कांकि प्रभु ऐचे कनु खौश हुवे। 21 हे ब़ाला-ब़च्चा आले, आपणे ब़ाला नु तंग ना करा, इसड़े ना हो कि वांचा होंसला तरुटती जाओ। 22 हे सेवक, जको शरीरा चे अनुसार तम्चे मालिक छी, सारीया बाता मां वांची आज्ञा चा पालन करा, तम्ही बन्दा नु खौश करने आला चे समान ङिखाणने वास्ते ना, पर मना ची खराई ते नरीकारा चे ङरा कनु। 23 ते जको कहीं तम्ही करा, तन मन लारे करा, ईं समझती कर कि बन्दा वास्ते कोनी पर प्रभु वास्ते करा वी। 24 कांकि तम्हानु पता छै कि ऐ बदले मां तम्हानु प्रतिफल मां इनाम मिली, प्रभु जको मसीह छै तम्ही ओची सेवा करा वी। 25 कांकि जको बुरे करी, ओनु आपणी बुराई ची सजा मिली, उठे काया वी पक्षपात कोनी। |
CC BY-NC-ND 4.0