कुलुस्सियां 2 - ओङ राजपूत1 मैं चाहवे कि तम्ही जाणती गिहा, कि तम्चे ते वा जको लौदीकिया मां छै, ते वा सारा वास्ते, जेह्णे माये शरीरिक मुँह वी कोनी ङेखले कि मैं किसड़ी मेहनत करे। 2 ईं मैं ऐवास्ते किहे ताकि वांचे मना मां बढावा मिलो ते वे प्रेम मां आपस मां ग़ठले रिहो, ते वे पुरी समझ चा सारे धन नु प्राप्त करो, जाये कनु वे नरीकारा चे भेद नु यानि मसीह नु पिछाणती गिहो। 3 जाये मां दिमाक ते समझ चे सारे भण्डार लुकले आले छी। 4 ईं मैं ऐवास्ते किहे, कि कुई बन्दे तम्हानु लुभावणे आलीया बाता कनु धोक्का ना ङियो। 5 कांकि मैं अगर शरीर चे भाव लारे तम्हा कनु दूर छै, तां वी आत्मिक रीति लारे तम्चे लारे छै, ते तम्चे विधि चे अनुसार आचरण ते तम्चा विश्वास जको मसीह मां छै मजबूत ङेखती कर खौश हुवे। मसीह मां जीवन ची भरपूरी 6 तां जिंवे तम्ही ईशु मसीह नु प्रभु करती कर मनती गेहले, यूंही ओचे मां चलते रिहा। 7 ते ओचे मां ज़हड़ पकड़ती कर बढ़ते जावा जिंवे तम्ही सिखाले गेले यूंही विश्वास मां मजबूत हुते जावा, ते घणा धन्यवाद करते रिहा। 8 चौकस रिहा कि कुई तम्हानु ओह भौतिक ज्ञान ते बेकार धोक्के लारे शिकार ना करती गिहो, जको बन्दा ची परम्परा ची मत्त ते संसारा ची बुरी आत्मा ची शिक्षा चे अनुसार छै, पर मसीह चे अनुसार कोनी। 9 कांकि नरीकार आपणी परिपूर्णता चे लारे हमेशा मसीह ची देह मां रिहे। 10 ते तम्ही ओचे मां भरपूर हुती गेले छिवा जको सारी प्रधानता ते अधिकारा चा शिरोमणी छै। 11 ओचे मां तम्चा इसड़ा खतना हुला आला छै, जको हाथा लारे ना हुवी, यानि मसीह चा खतना, जाये लारे शरीरा ची बुरी इच्छा उतारती ङिली जाये। 12 ते ओचे लारे बपतिस्मा मां पूरले गेले, ते ओचे मां नरीकारा ची शक्ति उपर विश्वास करती, जेह्णे ओनु मरले आला महु जिवाले, ओचे लारे जीते वी हुले। 13 नरीकारा ने तम्हानु वी, जको आपणे अपराधा ते आपणे शरीरा ची खतनारहित दशा मां मुड़दी हुती, ओचे लारे जिवाले, ते अम्चे सारे अपराधा नु माफ करले। 14 ते विधिया चा ओ लेख जको अम्चे नांवा उपर ते अम्चे विरोध मां हुता मिटाती नाखला, ते ओनु क्रूसा उपर कीला लारे जड़ती कर सामणे कनु हटाती ङिले। 15 ते ओणे आत्मिक प्रधानता ते बुराई चा आत्मिक शक्तिया नु आपणे उपरु उतारती कर वांचा खुल्लम-खुल्ला तमाशा बणाला ते क्रूसा ची वजह वांचे उपर जय-जयकार ची अवाज सुणाली। 16 ऐवास्ते खाणे-पीणे जा तेंहवार जा नवां चाँद, जा सब्त चे ङिओ तम्चा कुई फैंसला करने आले ना हो। 17 कांकि ये सारीया आणे आलीया बाता ची छां छै, पर मूल चीजा मसीह चा छी। 18 कुई बन्दे दीनता चा ङिखावा करती स्वर्ग़दूता ची पुज़ा करती तम्हानु बेवकूफ ना बणाओ, तम्ची द्रोड़ने चे प्रतिफल कनु दूर ना करो। इसड़े बन्दे ङेखली आलीया बाता मां लाग़ले रिहे ते आपणे शरीरिक समझ उपर बेकार मां फुंडे। 19 ते वे शिरोमणी नु पकड़ती ना रिही जाये लारे सारी देह जोड़ ते मांसपेसिया चे लारे हेक लारे ग़ठती, नरीकारा ची तरफा कनु बढ़ती जाये। मसीह चे लारे जीणे ते मरणे 20 जबकि तम्ही मसीह चे लारे संसारा ची शिक्षा ची तरफा कनु मरती गेले, तां बल्ति वांचे समान जको संसारा मां जीन्दगी बितावी ते बन्दा ची आज्ञा ते शिक्षा चे अनुसार। 21 ते इसड़ी रितिया चे वशा मां कां रिहा? कि ऐनू ना छिऊं, ओनु ना चाख, ते ओनु हाथ तक ना ला। 22 ये सारीया चीजा कामा मां गेहती-गेहती नाश हुती जाये कांकि ये बन्दा चे बणाले आले नियम छी। 23 ये सारीया बाता तां आपणी मर्जी चे अनुसार घड़ली आली भग़ती ची रीति, ते आपणे शरीरा नु ङोख ङेणा ते कूड़ी दीनता कनु शरीरा चा फायदा तां छै, पर शरीरा ची लालसा नु रोकणे मां याकनु कोच्छ वी फायदा कोनी हुला। |
CC BY-NC-ND 4.0