प्रेरितां चे काम 3 - ओङ राजपूतलंगड़े भिखारी चे ठीक हुवणे 1 पतरस ते यूहन्ना तीजे पाहरा मां प्राथना चे समय मन्दरा मां जई पलते। 2 बल्ति हेक इसड़े बन्दे जको कि जनमा ही कनु लंगडा हुता ओनु चली जई पलते। वे रोजाना ओ मन्दरा चे सुन्दर नांवा चे दरवाजे उपर ब़िसाणती ङिते। ताकि ओ मन्दरा मां जाणे आले कनु भीख मांगो। 3 जिसे बेले ओणे पतरस ते यूहन्ना नु मन्दरा मां जते ङेखले ते वाकनु भीख मांगली। 4 पतरस ते यूहन्ना ने ध्यानारीत ङेखती कर केहले, “अम्चे सनु ङेख।” 5 ओ वाकनु कहीं गेहणे ची इच्छा लारे तकु लाग़ला। 6 बल्ति पतरस ने केहले, “चान्दी ते सोने माये कनु छै कोनी, पर जको माये कनु छै ऊं मैं तनु ङिये पला। ईशु मसीह नासरी चे नांवा कनु टोर-फेर।” 7 ओणे ओचा सज़्ज़ा हाथ पकड़ती कर ओनु उठाणले ते तुरन्त ओचे पग़्ग़ा मां ते गोङा मां ताकत आती गेली। 8 ते ओ उछलती कर खड़ा हुती गेला, ते टुरु फिरु लाग़ला ते उछलता कूदता ते नरीकारा ची महिमा करता वांचे लारे मन्दरा चे बेहड़े मां गेला। 9 सारे लौका ने ओनु टुरते फिरते ङेखले ते नरीकारा ची महिमा करते ङेखती कर। 10 ओनु पिछाणती गेले हा ओही छै, जको मन्दरा चे सुन्दर फाटका उपर ब़ेसती कर भीख मांगता, वे घटना लारे जको ओचे लारे हुली हुती वे बन्दी ब़ोहत हैरान ते चकराती गेली। सुलैमान चे उसारे मां पतरस चा भाषण 11 जिसे बेले ओ पतरस ते यूहन्ना लारे भीलता ला, तां सारे लौक ब़ोहत हैरान हुते हुले ओ ओसारे मां जको सुलैमान चा किहवावे ओचे गोढु द्रोड़ती आले। 12 ईं ङेखती कर पतरस ने लौका नु केहले, “हे इस्राएली, तम्ही ऐ बन्दे उपर कां हैरान हुवा पले? ते अम्चे सनु कां यूं करती कर ङेखा पले, कि मना अम्ही आपणी ताकती जा भग़ती लारे ऐनू चलणे फिरणे चे लायक बणाती ङिले? 13 अब्राहम ते इसहाक ते याकूब चा नरीकार, अम्चे ङाङा-ब़ा चे नरीकारा ने आपणे सेवक ईशु ची महिमा करली, जानु तम्ही पकड़वाती ङिले, ते जब पिलातुस ने ओनु छोड़ती ङेणे चा विचार करला, तब तम्ही ओचे सामणे ईशु चा इन्कार करला। 14 तम्ही ओ पवित्र ते धर्मी बन्दे चा इन्कार करला, ते चाह्ले कि हेक हत्यारे नु तम्चे वास्ते छोड़ती ङिले जाओ। 15 ते तम्ही हेक जीवन ङेणे आले नु मारती नाखले, जानु नरीकारा ने मरले आला महु जिवाले, ते ये बाते चे अम्ही ग़वाह छियुं। 16 “ते ईशु नांवा ने ओ विश्वासा चे जरिये जको ओचे नांवा उपर छै, ऐ बन्दे नु जानु तम्ही ङेखा पले, ते जाणा वी छिवा, ताकत ङिली। ओही विश्वासा ने जको ओचे जरिये छै, ऐनू तम्चे सारा सामणे चंगे भले करती ङिले। 17 “हमा हे माये भऊ, मैं जाणे कि ईं काम तम्ही ना समझी लारे करले, ते इसड़े ही तम्चे सरदारा ने वी करले। 18 पर जिसीया बाता नु नरीकारा ने सब भविष्यवक्ता चे जरिये बाता पेहले ही बावड़लीया हुतीया, कि ओचा मसीह ङोख चवी, वानु ओणे यूं करती पुरे करले। 19 ऐवास्ते मन फिरावा ते हटती आवा कि तम्चे पाप मिटाले जाओ, जाये कनु प्रभु चे सामणे सोख भरी ङिहें आओ। 20 ते नरीकार ईशु नु भेज़ो जको तम्चे वास्ते पेहले ही कनु मसीह ठहराला गेला। 21 “जरुरी छै कि ईशु स्वर्ग़ा मां ओ समय तक रिहो जब तक कि सब बाता चा सुधार ना करती गिहो कि जाई चर्चा पुराणे समय कनु नरीकारा ने आपणे पवित्र भविष्यवक्ता चे मुँहा कनु करली हुती। 22 जिंवे कि मूसा ने केहले, ‘प्रभु नरीकार तम्चे भावां महु तम्चे वास्ते माये सिरखरा हेक भविष्यवक्ता खड़ा करी। जको कोच्छ ओ तम्हानु किहे, ओची सुणजा। 23 पर हर हेक बन्दे जको ओ भविष्यवक्ता ची नी सुणी, नरीकारा चे लौका महु अलग़ करती नाश करले जई।’ 24 “ते शमूएल कनु लाती कर ओचे बाद आला तक जितना भविष्यवक्ता ने बात केहली वां सारा ने यां ङिहां चा सनेसा ङिला छै। 25 तम्ही भविष्यवक्ता ची ऊलाद्ध ते वे वाचा चे भईवाल छिवा, जको नरीकारा ने तम्चे ङाङा-ब़ा लारे ब़ांहली, जिसे बेले ओणे अब्राहम नु केहले, ‘दुधे वंश चे जरिये धरती चे सारे घराणे आशीष गिहे।’ 26 नरीकारा ने आपणे पूत ईशु नु मरला आला महु जीते करती कर सारा कनु पेहले तम्चे गोढु भेज़ले, कि तम्चे महु हर हेक नु तम्चे गन्दे कामा कनु हटाती कर आशीष ङियो।” |
CC BY-NC-ND 4.0