प्रेरितां चे काम 22 - ओङ राजपूत

पौलुस चा भाषण

¹ “हे माये भऊ, ते ङाङे-ब़ा, माया उत्तर सुणा, जको मैं हमा तम्चे सामणे किहे पला।”

² जिसे बेले वाणे पौलुस नु इब्रानी भाषा मां ब़ोलते सुणले वे होर वी चोप हुती गेले, बल्ति ओणे वानु केहणे शुरु करती ङिले,

³ “मैं तां यहूदी छै, किलिकिया प्रदेस चे तरसुस शहर मां माया जनम हुला, पर ऐह शहरा मां गमलीएल चे चरणा मां ब़ेसती कर पढ़ाला गेला, ते ङाङा-ब़ा ची व्यवस्था ची ठीक रीति लारे सिखाला गेला। ते नरीकारा चे वास्ते इसड़ी धोन्‍न लाली भीलता ला, जिंवे कि तम्ही सारे आज़ लाली भिले।

⁴ मैं मर्द ते असतरीया ङुंहु नु ब़ांथी ब़ांथी कर ते कैदखाने मां नाखती नाखती कर, ऐ पंथ नु इठे तक सताले कि वानु मरवाती वी नाखले।

⁵ “ये बाते चे वास्ते महायाजक ते सारे बङके ग़वाह छी, कि वांचे कनु, मैं भावां चे नांवा उपर चिठ्ठीया गेहती कर दमिश्क नु जाये पलता, कि जको ओठे हो वानु वी ङण्ड ङिवाणे चे वास्ते ब़ांथी कर यरुशलेम गेहती आवे।

पौलुस चे मन किवें बदड़ले

⁶ “जिसे बेले मैं चलते-चलते दमिश्क चे गोढु पुज़ला, तां इसड़े हुले कि, ङुपाहरा चे लगभग अचानक आसमाना कनु माये चारो-तरफ सोज़ले चमकले।

⁷ ते मैं भोंये उपर ढेती पला, ते हा अवाज सुणली, ‘हे शाऊल, हे शाऊल, तु मनु कां सतावी पला?’

⁸ “मैं उत्तर ङिला, ‘हे प्रभु, तु कूण छी?’ “ओणे केहले, ‘मैं ईशु नासरी छै, जानु तु सतावी पला।’

⁹ ते माये साथीया ने सोज़ले तां ङेखले, पर जको मनु किहे पलता, ओची अवाज कोनी सुणली।

¹⁰ “तब मैं केहले, ‘हे प्रभु, मैं का करे?’ “प्रभु ने मनु केहले, ‘ऊठती कर दमिश्क नु जा, ते जको कोच्छ दुधे करने वास्ते ठहराले गेले ओठे तनु सारे कोच्छ बावड़ती ङिले जई।’

¹¹ तेज सोज़ले ची वजह मैं कहीं ङेख ना सग़ेला, ऐवास्ते माये साथीया ने माया हाथ पकड़ती कर दमिश्क मां मनु गेहती गेले।

¹² “तब हनन्याह नांवा चा व्यवस्था चे अनुसार हेक भग़त इन्सान, जको ओठे रेहणे आले सारे यहूदिया मां सरनाम हुता, माये गोढु आला।

¹³ ते भिले रेहती कर मनु केहले, ‘हे भऊ शाऊल, बल्ति कनु ङेखु लाग़।’ ओही बेले माया आँख खुलती गेलीया ते मैं ओनु ङेखले।

¹⁴ “तब ओणे मनु केहले, ‘अम्चे ङाङा-ब़ा चे नरीकारा ने तनु ऐवास्ते ठहराले कि तु ओची इच्छा नु जाण, ते ओ धर्मी नु ङेखे, ओचे मुँहा कनु बाता सुणे।

¹⁵ कांकि तु ओची ओर कनु सारा बन्दा चे सामणे वा बाता चा ग़वाह हुवे, जको तु ङेखलीया ते सुणलीया।

¹⁶ हमा कां देर करी पला? खड़ा हो, बपतिस्मा गे, ते ओचा नाम गेहती कर आपणे पापा नु धोती नाख।’

¹⁷ “जिसे बेले मैं बल्ति कनु यरुशलेम मां आती कर मन्दरा मां प्राथना करे पलता, तां मैं आत्मा मां दर्शन ङेखला।

¹⁸ मैं प्रभु नु खौद्द मनु ईं केहते सुणले कि, ‘जल्दी कर यरुशलेम नु छोड़ती कर तुरन्त निकलती जा, कांकि वे माये बारे मां दुधी ग़वाही नी मने।’

¹⁹ “मैं केहले, ‘हे प्रभु, वे तां आप जाणी कि मैं दुधे उपर विश्‍वास करने आला नु कैदखाने मां नाखता ते जग़ह-जग़ह प्राथनाघरा मां कुटवाता।

²⁰ जब दुधे ग़वाह स्तिफनुस चे लुहीं बाहले जाये पलते तब मैं वी ओठे भिला हुता, ते ये बाते मां सहमत हुता, ते ओचे मारणे आला चे खेस चादरा ची रखवाली करे भीलता।’

²¹ “ते प्रभु ने मनु केहले कि, ‘चाह्‍ला जा, कांकि मैं तनु नेरीया जातिया मां दूर-दूर तक भेज़ी।’ ”

²² इठे तक कि वे लौक जको पौलुस चा बाता सुणी पलते तब ऊंची अवाजी लारे रौल मचाती कर केहले कि, “इसड़े इन्साना नु मारती नाखा, ऐचे जीते रेहणे ठीक कोनी।”

²³ जिसे बेले वे रौल मचावी भिलते ले ते आपणी ओढ़णी उतारती कर भुकाऊं लाग़ले ते आसमाना मां धूड़ उङारु लाग़ले,

²⁴ ते सैनापति ने केहले कि, “ऐनू किले मां गेहती जावा ते कोड़े मारती कर हा पता काढ़ा, कि मैं जाण सग़े कि के वास्ते लौक ऐचे विरोध मां रौल मचावी पले।”

²⁵ जिसे बेले पौलुस नु कोड़े मारणे ची तियारी मां ओचे हाथ-पग खिंडाती कर ब़ांधी पलते, पौलुस ने जको सूबेदार ओचे लारे भीलता ओनु केहले, “कां ईं ठीक छै, कि तम्ही हेक रोमी बन्दे नु, बिना दोष साबित करले ओनु कोड़े मारणे ठीक छै?”

²⁶ ईं सुणती कर तुरन्त सूबेदार आपणे सैनापति चे गोढु गेला ते केहले कि, “तु ईं का करी पला? ईं बन्दे तां रोमी छै।”

²⁷ बल्ति सैनापति ने पौलुस चे गोढु आती कर पूछले कि, “मनु बावड़, का तु रोमी बन्दे छी?” पौलुस ने केहले, “हव्वे मैं छै।”

²⁸ ईं सुणती कर सैनापति ने केहले कि, “मैं तां रोमी हुवणे ची नागरिकता चा पद्द घणे रुपये ङिती कर हांसिल करला।” पौलुस ने ओनु केहले कि, “मैं तां जनम कनु ही रोमी छै।”

²⁹ वे लौक जको ओकनु पूछताछ करु आले हुते वे तुरन्त उठु खिसकती गेले, ते सैनापति वी ईं जाणती कर कि हा रोमी छै, घणा ङरती गेला कि मैं ऐनू संगला लारे ब़न्धवाले।

महासभा चे सामणे पौलुस

³⁰ ङुजे ङिओ ओणे ठीक-ठीक जाणने ची इच्छा लारे कि यहूदी ओचे उपर कां दोष लावी पलते, ओचे बन्धन खोलती ङिले, ते प्रधान याजका ते सारी महासभा नु भेले हुवणे ची आज्ञा ङिली, ते पौलुस नु तले गेहती गेले वांचे सामणे खड़े करले।