प्रेरितां चे काम 19 - ओङ राजपूत

इफिसुस शहर मां पौलुस

¹ जिसे बेले अपुल्‍लोस कुरिन्थुस शहर मां हुता, ते पौलुस सारे प्रदेसा महु हुती कर इफिसुस शहर मां आला ते ओठे कोच्छ चैले मिड़ले।

² पौलुस ने वानु केहले, “का जिसे बेले तम्ही विश्‍वास करला हुता ओ बेले पवित्र आत्मा नु ग्रहण करले ते?” वाणे उत्तर ङिला, “कोनी अम्ही ईं तां सुणले वी कोनी कि पवित्र आत्मा वी कोच्छ छै।”

³ पौलुस ने वानु केहले, “ते बल्ति तम्ही काया बपतिस्मा गेहला हुता?” वाणे उत्तर ङिला, “यूहन्‍ना चा बपतिस्मा।”

⁴ बल्ति पौलुस ने केहले, “यूहन्‍ना चा बपतिस्मा तां मन फिराव चा हुता। ओणे केहले हुते कि, ‘जको माये बाद आणे आला छै, ओचे उपर विश्‍वास करा,’ यानिकि ईशु उपर विश्‍वास करा।”

⁵ ईं सुणती कर वाणे प्रभु ईशु मसीह चे नांवा लारे बपतिस्मा गेहला।

⁶ ते जिसे बेले पौलुस ने वांचे उपर हाथ मेहले, ते वांचे उपर पवित्र आत्मा उतरती आला, ते वे अलग़-अलग़ भाषा ब़ोलु लाग़ती गेले ते भविष्यवाणीया करु लाग़ले।

⁷ ये लगभग ब़ारहा जणे हुते।

⁸ पौलुस यहूदी प्राथनाघरा मां गेला। ओठे ओ तीन मेहना तक बेधड़क हुती कर ब़ोलता रेहला। नरीकारा चे राज़ चे बारे मां बहस-बाजी करता ते वानु आच्छी रीति लारे समझाता रेहला।

⁹ पर जिसे बेले कोच्छ बन्दा ने आपणे मना नु कठोर करती गेले ओची कोनी मनली यां बाता नु बुरे-भले किहुं लाग़ले, ऐवास्ते पौलुस आपणे चैला नु लारे गेहती उठु चाह्‍ला गेला, ओ तुरन्‍नुस चे स्कूला मां गेला, जिठे ओ हर ङिओ भीड़ लारे नरीकारा चे वचना लारे बहस-बाजी करता।

¹⁰ ङोन साला तक यूंही हुते रेहले, इठे तक कि एशिया प्रदेस चे रेहणे आले का यहूदी, का यूनानी सारा ने प्रभु चा वचन सुणती गेहला।

स्कीवा चे पूत

¹¹ ते नरीकारा ने पौलुस चे हाथु अचम्भे ची अदभोत कामे ङिखाणली।

¹² इठे तक कि कन्दुरीया ते रुमाले ओचे शरीरा नु लवाती जब बिमारा उपर नाखते, ते वांची बिमारीया ठीक हुती जतीया। ते दुष्टात्मा वी वांचे महु निकलती जतीया।

¹³ पर कोच्छ यहूदी जको दुष्टात्मा नु काढ़ते फिरते, वे ईं करु लाग़ले जिसा बन्दा मां दुष्टात्मा हुतीया, वांचे उपर प्रभु ईशु चे नांवा चा इस्तेमाल करने ची कोशिस करते तां केहते, “मैं तम्हानु ईशु चे नांवा लारे जाया प्रचार पौलुस करे, आज्ञा ङिये पला।”

¹⁴ ते स्क्‍किवा नांवा चा हेक यहूदी प्रधान याजक हुता, ते ओचे सात पूत, जको इसड़े करते।

¹⁵ हेक ङिओ दुष्टात्मा ने वानु केहले, “ईशु नु मैं जाणे, ते पौलुस नु वी पिछाणे, पर तम्ही कूण छिवा?”

¹⁶ ते ओ बन्दे ने जाये मां दुष्टात्मा हुती, वांचे उपर झपटा मारती कर वानु सारा नु आपणे वशा मां करती कर वांची इसड़ी कुटाई करली कि वे ओ घरा कनु उघाड़े ते जखमी हुती कर द्रोड़ले।

¹⁷ ते हा बात इफिसुस शहरा चे रेहणे आले यहूदी ते यूनानी वी सारे जाणती गेले, ते वांचे सारा उपर हा ङर पड़ती गेला, ते प्रभु ईशु चे नांवा ची बढ़ाई हुली।

¹⁸ ते जिसा बन्दा ने विश्‍वास करला हुता, वांचे महु घणा सारा ने आपणे आपणे गन्दा कामा नु मनती गेले ते उजागर करले।

¹⁹ ते जादू-टूणे करने आला महु घणा सारा ने आपणीया-आपणीया पोथीया भेलिया करलीया ते सारा चे सामणे ब़ालती नाखलीया। ते जिसे बेले वांची कीमत जोड़ली गेली तां कम से कम पंजहा हजार चान्दी चे सिक्‍का चे बराबर हुती।

²⁰ यूं करती कर प्रभु चा वचन ताकती लारे फैलता गेला ते मजबूत हुता गेला।

²¹ जिसे बेले ये बाता हुती चुकलीया, ते पौलुस ने आत्मा मां ईं ठानले कि मकिदुनिया ते अखाया कनु हुती कर यरुशलेम सनु जाये, ते केहले, “ओठे जाणे चे बाद मनु रोम नु वी ङेखणे जरुरी छै।”

²² ऐवास्ते आपणी सेवा करने आला महु तीमुथियुस ते इरास्तुस नु मकिदुनिया मां भेज़ती कर आप कोच्छ ङिहें एशिया मां रेहती गेला।

इफिसुस मां बङा हुल्‍लड़

²³ ओ समय मां ईशु चे पन्थ चे बारे मां बङा हुल्‍लड़ मचती गेला।

²⁴ कांकि देमेत्रियुस नांवा चा हेक सुनारा अरतिमिस चे चान्दी चे छोटे-छोटे मन्दर बणवाणे वास्ते, कारीगरा नु ब़ोहत काम ङिवाती ङिता।

²⁵ ओणे वानु ते नेरे इसड़े काम करने आले कारीगरा नु भेले करती कर केहले, “हे माये भऊ, तम्ही जाणा कि ऐ कामा कनु अम्हानु कितना धन मिले।

²⁶ ते तम्ही ङेखा ते सुणा वी हुवा कि सेर्फ इफिसुस मां ही कोनी बल्कि सारे एशिया प्रदेसा मां वी हा केहती कर पौलुस ने घणा लौका नु समझाले ते भरमाले वी छै, ते जको हाथा चा बणलीया आलीया मूर्तिया छी, वे ईश्‍वर कोनी।

²⁷ ते सेर्फ येही बाते चा ही ङर कोनी कि, अम्चा काम धन्धा बन्द हुती जई, बल्कि बङी देवी अरतिमिस चा मन्दर तोच्छ समझला जई ते बल्ति जको सारा एशिया ते पूरा संसार विची पूजा करे ऐचा महत्व वी जता रिही।”

²⁸ ईं सुणते ही वे सारे गुस्से लारे भरीती गेले ते जोरा-जोरा आलीकर रौल मचाऊं लाग़ले ते किहुं लाग़ले, “इफिसिया ची अरतिमिस, देवी बङी छै।”

²⁹ ते सारे शहरा मां बङी हलचल मचती गेली ते लौका ने गयुस ते अरिस्तर्खुस, मकिदुनिया कनु आले जको पौलुस चे लारे रेहणे आला बन्दा नु पकड़ती गेले, ते सारा नु हेक रंगशाला मां गेहती गेले।

³⁰ जिसे बेले पौलुस ने लौका चे गोढु भीतर जाणे चाह्‍ले ते चैला नु ओनु जऊं कोनी ङिले।

³¹ एशिया चे हाकिमा महु वी ओचे कई दोस्ता ने ओचे कनु ईं किहवाती भेज़ले ते विनती वी करली कि, रंगशाला मां जती कर जोखिम मां जान ना नाखजा।

³² ओठे कुई कोच्छ रौल मचाते ते कुई कोच्छ। कांकि सभा मां बङी गड़बड़ी हुवे पलती, ते ब़ोहत से लौक तां ईं जाणते वी ना कि अम्ही के वास्ते भेले हुले।

³³ बल्ति वाणे सिकन्दर नु, जानु यहूदिया ने खड़े करले हुते, भीड़ महु आग़ु बढ़ाले, ते सिकन्दर हाथा चे इशारे लारे बन्दा चे सामणे हा उत्तर ङेणे चाहवे ला।

³⁴ पर जिसे बेले वाणे जाणती गेले कि वे यहूदी छी, ते सारे चे सारे लौक हेक अवाज मां कुई ङोन घण्टा तक रौल मचाते रेहले, “इफिसिया ची अरतिमिस, देवी बङी छै।”

³⁵ बल्ति शहर चे मंत्रीया ने बन्दा नु शान्त करती कर केहले, “इफिसुस शहरा मां रेहणे आली बन्दी, कूण ना जाणी कि इफिसुस वासीया चा शहर बङी देवी अरमितिस चे मन्दर, ते आसमाना कनु ढेली आली मूर्ति चा रखवाला छै?

³⁶ कांकि जिसे बेले यां बाता चा कुई मतलब ही ना निकली, ते ठीक ईं छै कि, तम्ही चोप-चाप रिहा ते बिना सोचले समझले कोच्छ वी ना करा।

³⁷ “कांकि तम्ही इसड़ा बन्दा नु गेहती आले, जको ना तां मन्दरा नु लूटले, ते ना ही अम्ची देवी अरमितिस ची निन्दा करली।

³⁸ अगर देमेत्रियुस ते ओचे साथी कारीगरा नु काये लारे बहस-बाजी करनी तां अदालत खुली छै, ते ओचे मां हाकिम वी छै। वे हेके ङुजे उपर अरोप ला सग़ी।

³⁹ पर अगर तम्ही कुई नेरी बाते चे बारे मां पूछणे चाहवा तां, अदालती मां फैंसला करला जई।

⁴⁰ कांकि आज़ चे दंगे चे वजह अम्चे उपर दोष लाग़णे चा ङर छै। ऐवास्ते कि ऐचा कुई ठोस वजह ना ङिसी ऐ मामले मां अम्ही ये भीड़ चे भेले हुवणे चा कुई वी उत्तर ना ङे सग़ु।”

⁴¹ ते ओणे ईं केहती कर सभा नु विदा करती ङिले।