प्रेरितां चे काम 16 - ओङ राजपूततीमुथियुस चे पौलुस ते सीलास चे लारे जाणे 1 बल्ति पौलुस दिरबे कनु हुती लुस्त्रा शहरा मां वी गेला, ते ओठे हेक तीमुथियुस नांवा चा चैला हुता। ओची आई यहूदी हुती ते विश्वास करने आली हुती, पर ओचा ब़ा यूनानी हुता। 2 तीमुथियुस इकुनियुम ते लुस्त्रा शहरा मां विश्वासी भावां मां नामी हुता। 3 पौलुस ची इच्छा हुती कि तीमुथियुस ओचे लारे चालो, ते जको यहूदी लौक ओ इलाके मां रेहते, वांची वजह कनु पौलुस ने तीमुथियुस चा खतना करला, कांकि वे सब जाणते कि ओचा ब़ा यूनानी छै। 4 वे शहर-शहर यात्रा करते हुले विश्वासीया नु वे सारे नियम चे बारे मां बावड़ते, जको यरुशलेम मां प्रेरित ते अग़ुवा ने ठहराले हुते मनणे वास्ते सुणाती ङिते। 5 यूं करती कर कलीसिया विश्वास मां मजबूत हुती गेली ते गिणती मां हर ङिओ बढ़ोतरी हुती गेली। पौलुस चा दर्शन 6 ते वे फ्रूगिया ते गलातिया प्रदेसा महु हुती कर गेले, कांकि पवित्र आत्मा ने वानु एशिया इलाके मां वचन सुणावणे वास्ते मना करले। 7 बल्ति वे मूसिया इलाके ची हद्दी मां पुज़ती कर, बितूनिया शहर मां जाणे चाह्ले, पर ईशु ची आत्मा ने वानु ओठे कोनी जऊं ङिले। 8 ऐवास्ते वे मूसिया महु हुते हुले त्रोआस शहरा मां आले। 9 ओठे राती नु पौलुस ने हेके खाबा मां ङेखले कि हेक मकिदुनिया इलाके चा हेक जवान भिला आला, ओकनु हा विनती करे पला कि, “मकिदुनिया मां आती कर अम्ची सहायता कर।” 10 पौलुस चे दर्शन ङेखते ही अम्ही तुरन्त मकिदुनिया चे इलाके सनु जाणे चाह्ले, ईं समझती कर कि नरीकारा ने वानु सुसमाचार सुणावणे वास्ते अम्हानु हकारले। लीदिया चे मन बदलने 11 ऐवास्ते त्रोआस कनु जहाज खोलती कर अम्ही सिधे सुमात्राके टापू ते ङुजे ङिओ नियापुलिस पुज़ले। 12 ते उठु कनु अम्ही फिलिप्पी शहर पुज़ले, जको मकिदुनिया इलाके चा खास शहर छै, ते जको रोमियां ची बस्ती छै, ते अम्ही ओ शहरा मां कोच्छ ङिहां तक रेहले। 13 सब्त चे ङिओ अम्ही शहर चे फाटक चे ब़ाहरु नदी चे किनारे ईं समझती कर गेले कि, ओठे प्राथना करने ची जग़हा हुवी, ऐवास्ते ओठे ब़ेसती कर, वां असतरीया लारे जको ओठे भेलिया हुतीया बाता करु लाग़ले। यूरोप ची पेहली विश्वासण 14 लुदिया नांवा ची थुआथीरा शहरा ची हेक असतरी प्रभु उपर विश्वास राखणे आली हुती। वा मंहगी बैंजनी रंगा ची ओढ़णी बेचणे आली हुती वा बङे ध्यान लारे अम्चीया बाता सुणे पलती। प्रभु ने विचे मना चे दरवाजे खोलती ङिले ताकि, जको कोच्छ पौलुस किहे पलता, वा बाता नु ध्यानारीत सुणो। 15 विणे आपणे कुणम्बे समेत बपतिस्मा गेहला, ते विणे विनती करली, “अगर तम्ही मनु प्रभु ची विश्वासण समझा तां चालती कर माये घरा मां रिहा।” ते वा अम्हानु राजी करती कर गेहती गेली। दुष्टात्मा कनु छुटकारा 16 जिसे बेले अम्ही प्राथना करने ची जग़हा मां जऊं पलते ले, अम्हानु मार्ग़ मां हेक दासी मिड़ली, विचे मां हेक इसड़ी दुष्टात्मा हुती। वा भविष्य बावड़ती कर आपणे स्वामीया नु घणा सारा धन कमाती कर ङिती। 17 वा दासी पौलुस चे ते अम्चे भांसु-भांसु यूं करती कर रौल मचाऊं लाग़ली कि, “ये इन्साने परमप्रधान नरीकारा चे दास छी, ये तम्हानु उद्धार चे मार्ग़ चा सुसमाचार सुणावी पले।” 18 वा घणा ङिहां तक यूंही करती रेहली आखरी मां पौलुस परेशान हुती गेला ते भांसु मुड़ती कर जको दुष्टात्मा विचे मां समाली हुती विनु केहले, “मैं तनु ईशु मसीह चे नांवा लारे आज्ञा ङिये पला।” कि यिचे महु निकलती जा ते वा दुष्टात्मा ओही बेले विचे महु ब़ाहरु निकलती गेली। 19 जिसे बेले विचे स्वामीया नु हा पता लाग़ला कि अम्ची कमाई ची आस जती रेहली, तां पौलुस ते सीलास नु पकड़ती कर बजारा चे बीच चौका उपर प्रधाना चे गोढु गेहती गेले। 20 वानु सजा ङेणे आले हाकिमा चे गोढु गेहती गेले ते केहले, “ये लौक जको यहूदी छी अम्चे शहरा मां गड़बड़ी मचावी पले। 21 ते इसड़ा रिति-रिवाज बावड़ी पले, जानु मनणे जा ओचे उपर टुरणे अम्ही रोमियां चे वास्ते ठीक कोनी।” पौलुस ते सीलास कैदखाने मां 22 तब सारी भीड़ वांचे विरोध मां हुती गेली, ते प्रधान हाकिमा ने वांची ओढ़णी फाड़ती कर उतारती नाखली ते आज्ञा ङिली कि याहनु कोड़े मारले जाओ। 23 ते घणे कोड़े मरवाणे चे बाद वाणे वानु कैदखाने मां नाखती ङिले ते कैदखाने चे अधिकारीया नु हा आज्ञा ङिली कि यांचे उपर सख्त पाहरा लाला जाओ। 24 हा आज्ञा पाती कर कैदखाने चे अधिकारीया ने वानु भितरली कोठड़ी मां नाखती ङिले ते वांचे पग़्ग़ा नु लाकड़ी मां कसती ङिले। पौलुस ते सीलास चे कैदखाने कनु छुटणे 25 आधी राती चे लगभग पौलुस ते सीलास प्राथना करते हुले नरीकारा चे भज़न गावी पलते, ते नेरे जको कैदी हुते वे वानु सुणी पलते। 26 इतने मां अचानक हेक बङा भूकम्प आला, इठे तक कि कैदखाने चा कन्धा हलु लाग़ती गेलीया, ते तुरन्त सारी दरवाजी खुलती गेली, ते सारा कैदीया चा ब़ेड़ीया खुलती गेलीया। 27 ते जिसे बेले कैदखाने चा अधिकारी नीङे कनु सुज़ाक हुला ते ङेखले कि कैदखाने ची सारी दरवाजी खुड़ले ङेखती कर समझले कि कैदी नासती गेले, ते आपणी तलवार छिकती कर आपणे आप नु मारती नाखणे सोचले। 28 पौलुस ने ऊंची अवाजी लारे केहले कि, “आपणे आप नु नुकसान ना पुज़ा, कांकि अम्ही सारे इठी छियुं।” 29 तब कैदखाने चे अधिकारीया ने मशाल मंगवाली ते जल्दी भीतर गेला। ते ङरा कनु कांपता हुला पौलुस ते सीलास चे पग़्ग़ा मां ढेती पला। कैदखाने चे अधिकारीया चे मन बदलने 30 ऐचे बाद ओ वानु ब़ाहरु गेहती कर ब़ोला, “श्रीमान, उद्धार गेहणे वास्ते मैं का करे?” 31 वाणे ओनु केहले, “प्रभु ईशु मसीह उपर विश्वास कर, तां तु, ते दुधा कुणम्बा उद्धार गे सग़ा।” 32 ते वाणे कैदखाने चे अधिकारीया नु ते ओचे सारे कुणम्बे नु प्रभु चा वचन सुणाला। 33 ते राती नु ओही बेले कैदखाने चा अधिकारी वानु गेहती गेला ते वांचे जखमा नु धोले, ते ओणे तुरन्त आपणे कुणम्बे समेत बपतिस्मा गेहला। 34 ऐचे बाद कैदखाने चा अधिकारी पौलुस ते सीलास नु आपणे घरे गेहती गेला, ते वानु खाणे खुलाले ते आपणे सारे कुणम्बे समेत नरीकारा उपर विश्वास करती कर बङी खुशी मनाली। 35 आग़ले ङिओ हाकिमा ने सिपाहीया चे हाथु ईं केहती कर भेज़ले कि, “वा बन्दा नु छोड़ती ङियो।” 36 कैदखाने चे अधिकारीया ने ये बाता पौलुस नु केहलीया, “हाकिमा ने तम्हानु छोड़ने ची आज्ञा ङिली, ऐवास्ते हमा तम्ही निकलती शान्तिपूर्वक चाह्ले जावा।” 37 पर पौलुस ने वा सिपाहीया नु केहले, “जबकि अम्ही रोमी नागरिक छिऊं, पर वाणे अम्हानु सारा चे सामणे मारले कोटले ते अम्चा कुई अपराध वी कोनी हुता, कैदखाने मां नाखती ङिले, हमा वे अम्हानु चोप-चाप करती कर ब़ाहरु भेज़णे चाहवी। इसड़े कङी वी ना हो सग़ी। वे आप खौद्द आती कर अम्हानु ब़ाहरु काढ़ो।” 38 सिपाहीया ने जती कर हाकिमा नु सारीया बाता बावड़ती ङिलीया, ईं सुणती कर वे हाकिम ङरती गेले कि पौलुस ते सीलास रोमी छी। 39 ते वे आप खौद्द आती कर पौलुस ते सीलास नु माफी मांगली, ते कैदखाने कनु ब़ाहरु काढ़ती कर वांचे कनु विनती करली कि, शहरा कनु चाह्ले जावा। 40 पौलुस ते सीलास कैदखाने महु निकलती कर लीदिया चे घरे गेले। ते विश्वासी भावां लारे मिलती कर वांची हिम्मत ब़न्धवाली ते वानु तसल्ली ङिली, ते उठु वे टुरती पले। |
CC BY-NC-ND 4.0