प्रेरितां चे काम 14 - ओङ राजपूतइकुनियुम मां पौलुस ते बरनबास चा विरोध 1 इकुनियुम मां इसड़े हुले कि पौलुस ते बरनबास यहूदिया ची प्राथनाघरा मां लारे-लारे गेले, ते इसड़ीया बाता केहलीया कि, यहूदी ते यूनानी ङुंहु महु घणा सारा बन्दा ने विश्वास करला। 2 पर जिसा यहूदी बन्दा ने विश्वास कोनी करला हुता, वाणे नेरीया जातिया आला बन्दा नु भड़काती नाखले ते वांचे मना मां विश्वासी भावां चे विरोध जहर भरती ङिला। 3 पौलुस ते बरनबास ओठे घणे ङिहां तक रेहले, ते प्रभु चे भरोसे उपर हिम्मती चे लारे बाता करते, ते नरीकार वांचे हाथा कनु अचम्भे ची कामे करवाती कर आपणे अनुग्रह चे वचना उपर ग़वाही ङिता। 4 पर शहरा चे लौका मां आपस मां फूट पड़ती गेलती, कोच्छ लौक तां यहूदिया सनु, ते कोच्छ लौक प्रेरितां सनु हुती गेले। 5 पर जिसे बेले नेरीया जातिया ते यहूदी वांचा अपमान ते पत्थर मारणे वास्ते आपणे सरदारा समेत वांचे पतरस ते बरनबास सनु द्रोड़ले। 6 ते वे ये बाते नु जाणती गेले, लुकाउनिया चे लुस्त्रा ते दिरबे शहरा मां, ते आस-पास चे प्रदेसा मां नासती गेले। 7 ते ओठे वी वे सुसमाचार प्रचार करते रेहले। लुस्त्रा मां हेक लंगड़े चे ठीक हुवणे 8 लुस्त्रा शहरा मां हेक शक्स ब़ेहला तां, जको पग़्ग़ा कनु अपंग हुता। ओ जनमा कनु ही लंगड़ा हुता, ते कङी वी कोनी टुरला हुता। 9 ओ पौलुस चा बाता सुणे ला पलता ते पौलुस ने ओचे सनु ध्यानारीत रीत ङेखले कि ऐनू ठीक हुवणे चा पूरा विश्वास छै। 10 ते पौलुस ने ओनु ऊंची अवाजी लारे केहले कि, “आपणे पग़्ग़ा चे साहरे सिधा भिला रेहती जा।” तब ओ फुदकती कर टुरु फिरु लाग़ती गेला। 11 लौका ने पौलुस चे ईं काम ङेखती कर लुकाउनिया ब़ोली मां ऊंची अवाजी मां केहले कि, “देवते इन्साना चे रुप गेहती कर अम्चे इठे आती गेले।” 12 ते वाणे बरनबास नु ज्युस, ते पौलुस नु हिर्मेस केहले कांकि ओ बाता करने मां खास हुता। 13 शहर चे ब़ाहरु ज्युस देवते चा मन्दर हुता, ज्युस चा पुजारी ङान्द गेहली ते फूलां चे हार चले हुले फाटकी पर आती गेला, ते ओ लौका चे लारे पौलुस ते बरनबास वास्ते बलि करने चाहवे ला। 14 पर बरनबास ते पौलुस प्रेरितां ने जिसे बेले सुणले, ते आपणी ओढ़णी फाड़ली ते भीड़ सनु झपटले ते रौल मचाती कर किहुं लाग़ले कि, 15 “हे लौक, तम्ही का करा पले? अम्ही वी तां तम्चे आलीकर ङोख सोख भोग़णे आले इन्साने छिऊं, ते तम्हानु सुसमाचार सुणाऊं पले, कि तम्ही यां बेकार चीजा कनु अलग़ हुती कर जीते नरीकारा सनु फिरा, जेह्णे स्वर्ग़ ते धरती ते समुन्दर ते जको कोच्छ वांचे मां छी बणाले। 16 “नरीकारा ने गुजरले आले समय मां सब सारीया जातिया नु आपणे आपणे मार्ग़ उपर चलु ङिले। 17 तां वी ओणे आपणे आप नु बे ग़वाह कोनी छोड़ले, पर ओ भलाई करता रेहला, ते आसमाना कनु बारश ते मौसमा चे अनुसार अम्हानु पैदावार ङिता रेहला, तम्चे मना नु रोटी ते खुशी लारे भरता रेहला।” 18 ईं केहती कर वाणे लौका नु बङी मुश्किल लारे रोकले कि वांचे वास्ते बलिदान ना करो। 19 पर कोच्छ यहूदी अन्ताकिया ते इकुनियुम शहरा कनु आती कनु लौका नु आपणे पक्ष मां करती गेले, ते पौलुस चे उपर पत्थराव करला, ते मरले आले समझती कर ओनु शहरा ब़ाहरु घींसती कर ब़ाहरु छिकती गेले। 20 पर जिसे बेले चैले पौलुस चे चारो-तरफ आती भिले रेहले, ते ओ खड़ा हुती कर शहरा सनु गेला। ते ङुजे ङिओ बरनबास चे लारे दिरबे शहर सनु चाह्ला गेला। सीरिया प्रदेस चे अन्ताकिया शहर सनु पुठे आवणे 21 ते वे ओ शहरा चे लौका नु सुसमाचार सुणाती ते ब़ोहत सारे चैले बणाती कर। लुस्त्रा ते इकुनियुम शहर हुते हुले पिसिदिया इलाके चे गोढु आले अन्ताकिया पुठे आले। 22 ते वे चैला चे मना नु मजबूत करते रेहले ते हा उपदेश करते कि विश्वासा मां बणले रिहा, ते ईं केहते कि, “अम्हानु बङे क्लेश भोग़णे जरुरी छै नरीकारा चे राज़ मां जाणे वास्ते।” 23 ते वाणे हर हेक कलीसिया मां वांचे वास्ते अग़ुवा नु चुणले, ते उपवास ते प्राथना करती कर वानु प्रभु चे हाथा मां सोंपले जाये उपर वाणे विश्वास करला हुता। 24 ते वे पिसिदिया इलाके कनु हुते हुले पंफूलिया इलाके मां जती कर पुज़ले। 25 ते पिरगा शहर मां वचन सुणाती कर वे अत्तालिया शहरा मां आले। 26 ते उठु कनु पाणीया आले जहाजा मां ब़ेसती कर अन्ताकिया शहरा मां पुज़ले, जिठु कनु वानु नरीकारा चे अनुग्रह मां सोंपती कर ओ कामा वास्ते भेज़ले हुते, जानु वे हमा पुरे करती कर पुठे आती गेले। 27 ओठे पुज़ती कर वाणे कलीसिया नु भेले करले ते वानु बावड़ले कि, “नरीकारा ने अम्चे लारे हुती कर किसड़ी बङी-बङी कामे करली, ते नेरीया जातिया चे वास्ते विश्वास चे दरवाजे खोलती नाखले।” 28 पौलुस ते बरनबास अन्ताकिया आले चैला लारे घणी सारी ङिहें रेहले। |
CC BY-NC-ND 4.0