प्रेरितां चे काम 1 - ओङ राजपूत

लूका चे जरिये लिखली गेली ङुजी किताबे ची चर्चा

¹ हे थियुफिलुस, मैं आपणी पेहली किताब वां सारीया बाता चे बारे मां लिखली, जको ईशु ने शुरु मां करले ते करता ते सिखाता रेहला,

² ओ ङिओ तक जिसे बेले ओ वां प्रेरितां नु जानु ओणे चुणले ते, पवित्र आत्मा चे लारे आदेश ङिती स्वर्ग़ मां उपर चवीला ना गेला।

³ ते ओणे ङोख चवणे चे बाद घणे सारे पक्‍के सबूता लारे आपणे आप वानु जीते ङिखाणले ते चालीस ङिहां तक ओ वानु ङिसता रेहला, ते नरीकारा चे राज़ चा बाता करता रेहला।

⁴ ते वांचे लारे मिलती कर वानु आज्ञा ङिली, “यरुशलेम ना छोड़ा, पर जको वायदा माये ब़ा ने करला पूरा हुवणे ची बाट ङेखते रिहा, जाई चर्चा तम्ही माये कनु सुणती चुकले छिवा।

⁵ कांकि यूहन्‍ना ने पाणीया लारे बपतिस्मा ङिला, पर थोड़े ङिहां चे बाद तम्ही पवित्र आत्मा चे लारे बपतिस्मा गिहा।”

ईशु चे स्वर्ग़ा मां चवीले जाणे

⁶ तां वाणे भेले हुती कर ओकनु पूछले, “हे प्रभु, का तु ऐ समय इस्राएल नु राज़ फेरती ङिये?”

⁷ ईशु ने वानु केहले, “ओ समय नु या काल चे जाणने जानु ब़ा नरीकारा ने आपणे ही वशा मां करले आले छै, तम्चे काम कोनी।

⁸ पर जिसे बेले पवित्र आत्मा तम्चे उपर आवी तब तम्हानु सामर्थ मिली ते यरुशलेम ते सारे यहूदिया ते सामरिया मां ते धरती चे सिरे तक माये ग़वाह हुवे।”

⁹ ईं केहती कर ओ वांचे ङेखते ङेखते उपर स्वर्ग़ा सनु चती गेहला गेला, ते बदला ने ओनु वांची आँखीया कनु, लुकाती गेले।

¹⁰ ते ओचे जते बेले वे आसमाना सनु तकी पलते, तां ङेखा ङोन शक्स चिट्टी ओढ़णी घाले आले वांचे गोढु आती भिले रेहले,

¹¹ ते किहुं लाग़ले कि, “हे गलीली मर्द, तम्ही कां भिले रेहती कर स्वर्ग़ा सनु ङेखा पले? हाओ ईशु, जको तम्चे कनु स्वर्ग़ा उपर चवीला गेला, जिंवे तम्ही ओनु स्वर्ग़ा पर जते ङेखले यूंही ओ बल्ति आवी।”

हेक नवें प्रेरित चे चुणले जाणे

¹² बल्ति वे जैतून नांवा चे पहाड़ा कनु जको यरुशलेम कनु कुई हेक किलोमीटर ची दूरी उपर हुता, यरुशलेम सनु पुठे आले।

¹³ ते जिसे बेले ओठे पुज़ले तां वे ओ चौब़ारे उपर गेले, जिठे पतरस ते यूहन्‍ना ते याकूब ते अन्द्रियास ते फिलिप्पुस ते थोमा ते बरतुल्मै ते मत्ती ते हलफई चा पूत याकूब ते शमौन जेलोतेस ते याकूब चा पूत यहूदा रेहते।

¹⁴ ये सारे कई असतरीया ते ईशु ची आई मरियम ते ओचे भावां लारे मन लाती प्राथना मां लाग़ले रेहले।

¹⁵ वा ङिहां मां पतरस भावां चे आधी मां जको करीबन हेक साऔ बीस बन्दी भेली हुती भिले रेहती किहुं लाग़ला।

¹⁶ “हे भऊ, जरुरी हुते कि पवित्रशास्त्र चा ओ लेख पूरा हो जको पवित्र आत्मा ने राजा दाऊद चे जरिये यहूदा चे बारे मां जको ईशु नु पकड़ावणे आले चा अग़ुवा हुता, पेहले कनु ही केहले हुते,

¹⁷ कांकि ओ तां अम्चे मां गिणला गेला ते ये सेवकाई मां सहभागी हुला।”

¹⁸ यहूदा ची अधर्म ची कमाई लारे ओ खेत मोल गेहला जिठे ओणे फांसी खाली हुती, ते ठोङा चे भराणे ढेला ते ओचे ढेड्ड फड़ीले गेले ते ओचीया सारीया आंतरा ब़ाहर आती पलीया।

¹⁹ ते ये बाते नु यरुशलेम चे सारे रेहणे आले जाणती गेले, इठे तक कि ओ खेता चे नां वांची भाषा मां हकलदमा यानि “लुहींया चा खेत” पड़ती गेले।

²⁰ “कांकि भज़न संहिता मां लिखले आले छै कि, “ ‘ओचे घर उज़ड़ती जाओ, ओचे मां रेहणे वास्ते कुई वी ना बचो, ओचा पद्द कुई नेरे गेहती गिहो।’

^21-22 ऐवास्ते जितने ङिहां तक प्रभु ईशु अम्चे लारे आता जता रेहला, यानिकि यूहन्‍ना चे बपतिस्मे कनु गेहती ओचे अम्चे कनु चाह्‍ले जाणे तक, जको बन्दी लगातार अम्चे लारे रेहले, ठीक छै कि वांचे महु हेक जणा अम्चे लारे ओचे जीते हुवणे चा ग़वाह हुती जाओ।”

²³ बल्ति वाणे ङुंहु नु खडे़ करले, हेक जको यूसुफ जको बर-सबा किहवाता, जिसे नेरे नां यूसतुस हुते ङुजा मत्तियाह नु।

²⁴ ते हा केहती कर प्राथना करली, “हे प्रभु, तु जको सारा चे मना नु जाणी, ईं उजागर कर कि जा ङुंहु महु तु कानु चुणले।

²⁵ कि ओ ये सेवकाई ते प्रेरिताई ची पद्दवी गिहो जानु यहूदा छोड़ती कर आपणे कर्मा ची सजा भोग़णे वास्ते चाह्‍ला गेलता।”

²⁶ बल्ति वाणे वांचे बारे मां पर्चीया नाखलीया, तां पर्ची मत्तियाह चे नांवा उपर निकड़ली, तां ओ वां गियारा प्रेरितां लारे गिणला गेला।