2 थिस्सलुनीकियां 1 - ओङ राजपूतनमस्कार 1 पौलुस ते सिलवानुस ते तीमुथियुस चे तरफा कनु थिस्सलुनीकियां ची कलीसिया चे नांवे हा चिठ्ठी, जको अम्चे ब़ा नरीकार ते प्रभु ईशु मसीह मां छै। 2 अम्चे ब़ा नरीकार ते प्रभु ईशु मसीह ची ओर कनु तम्हानु अनुग्रह ते शान्ति मिलती रिहो। न्यां चा ङिओ 3 हे माये भऊ, तम्चे बारे मां अम्हानु हर समय नरीकारा चा धन्यवाद करना चाही छै, ते ईं ठीक वी छै, ऐवास्ते कि तम्चा विश्वास घणा बढ़ता जाये पला, ते तम्चा सब प्रेम आपस मां घणा ही बढ़ता जाये पला। 4 इठे तक अम्ही आप नरीकारा ची कलीसिया मां ते तम्चे बारे मां घमण्ड करु, कि जितने ङोख ते क्लेश तम्ही सहन करा, वां सारा मां तम्चा सब्र ते विश्वास प्रकट हुवे। 5 हा नरीकारा चे सच्चे न्यां चा साफ सबूत छै, कि तम्ही नरीकारा चे राज़ चे योग्य ठहरा, जाये वास्ते तम्ही ङोख वी चवा। 6 कांकि नरीकारा चे गोढु हा न्यां छै, कि जको तम्हानु क्लेश ङिये, वानु बदले मां क्लेश ङियो। 7 ते तम्ही जको क्लेश पावा, अम्चे लारे सोख हो, ओ समय उपर जिसे बेले कि प्रभु ईशु आपणे सामर्थी दूता चे लारे, धधकते हुले जाखते महु स्वर्ग़ा कनु प्रकट हुवी। 8 ते जको नरीकारा नु ना पिछाणी, ते अम्चे प्रभु ईशु चे सुसमाचार नु ना मनी वाकनु पलटा हुवी। 9 वे प्रभु चे सामणे कनु, ते ओची शक्ति चे तेज कनु दूर हुती कर अनन्त विनाश चा ङण्ड पावे। 10 हा ओ ङिओ हुवी, जिसे बेले ओ आपणे पवित्र लौका मां महिमा पाणे, ते सारे विश्वास करने आला मां आश्चर्य ची वजह हुवणे चे वास्ते आवी, तम्ही वी वां लौका मां शामिल हुवा, कांकि तम्ही मसीह चे सुसमाचार उपर विश्वास करला। 11 ऐवास्ते अम्ही सदा तम्चे वास्ते हर ङिओ प्राथना करु वी, कि अम्चा नरीकार तम्हानु ऐ ब़ुलाहट चे योग्य समझो, ते भलाई ची हर हेक इच्छा, ते विश्वास चे हर हेक कामा नु सामर्थ लारे पूरा करो। 12 कि अम्चे नरीकार ते प्रभु ईशु मसीही चे अनुग्रह चे अनुसार अम्चे प्रभु ईशु चे नां तम्चे मां महिमा पाओ, ते तम्ही ओचे मां। |
CC BY-NC-ND 4.0