2 यूहन्ना 1 - ओङ राजपूतनमस्कार 1 मैं यहून्ना, कलीसिया चा अग़ुवा हा चिठ्ठी वांचे नांवे लिखे पला। वा चुणली आली असतरी ते विचे ब़ाला चे नांवे, जाये लारे मैं सच्चा प्रेम राखे, ते सेर्फ मैं ही कोनी बल्कि वे वी सारे प्रेम राखी जको सच्चाई नु जाणी। 2 वा सच्चाई जको अम्चे मां टिकली आली छै, ते सदा अम्चे लारे अटल रिही। 3 नरीकार ब़ा, ते ब़ा चा पूत ईशु मसीह ची ओर कनु अनुग्रह ते दया ते शान्ति, सच्चाई ते प्रेम अम्चे लारे रिहे। सच्चाई ते प्रेम 4 मैं ब़ोहत खौश हुला कि मैं दुधे कोच्छ ब़ाला नु वे आज्ञा चे अनुसार, जको अम्चे ब़ा ची ओर कनु मिड़ली हुती, वे सच्चाई उपर टुरते हुले पाले। 5 हमा हे असतरी, मैं तनु कुई नवीं आज्ञा कोनी, पर वाहो जको शुरु कनु अम्चे गोढु छै, लिखे पला, ते दुधे कनु बिनती करे पला कि अम्ही विश्वास करने आली हेके ङुजे लारे प्रेम राखु। 6 ते प्रेम चा मतलब हा छै कि अम्ही ओची आज्ञा चे अनुसार चलु। हा वा ही आज्ञा छै जको तम्ही शुरु कनु सुणली, ते तम्हानु यिचे उपर प्रेम लारे टुरणे वी चाही छै। 7 कांकि ब़ोहत सारे इसड़े भरमाणे आले संसारा महु निकलती आले, जको ईं ना मनी कि ईशु मसीह शरीरा मां हुती कर आला। भरमाणे आला ते मसीह-विरोधी हाओ छै। 8 आपणे बारे मां चौकस रिहा, कि जको मेहनत अम्ही करली विनु तम्ही गंवाती ना ङिजा, बल्कि ओचा पूरा-पूरा प्रतिफल पावा। 9 जको कुई मसीह ची सच्ची शिक्षा कनु आग़ु बढ़ती जाये ते ओचे मां बणला ना रिही, ओचे गोढु नरीकार कोनी। जको कुई मसीह ची सच्ची शिक्षा उपर टिकला रिहे, ओचे गोढु ब़ा वी छै ते पूत वी। 10 अगर कुई बन्दे तम्चे गोढु आवे ते सच्ची शिक्षा ना ङी, ओनु ना तां घरा मां आऊं ङिया ते ना नमस्कार करा। 11 कांकि जको कुई इसड़े बन्दे नु नमस्कार करे। ऊं ओचे बुरे कामा मां हेंस्सेदार छै। आखरी नमस्कार 12 मनु ब़ोहत सारीया बाता तम्हानु लिखणीया छी, पर काग़स ते स्याही लारे लिखणे ना चाहवी, पर आस छै कि मैं तम्चे गोढु आवी ते आमणे-सामणे बातचीत करी, जाये कनु तम्ची खुशी पुरी हो। 13 दुधी ब़ेहणी ची ब़ाले जानु नरीकारा ने चुणले तनु नमस्कार किही। |
CC BY-NC-ND 4.0