1 तीमुथियुस 4 - ओङ राजपूतकूड़े गुरु 1 पर पवित्र आत्मा साफ-साफ किहे पला, कि आणे आले समय मां कितने लौक भरमाणे आली कूड़ी आत्मा, ते दुष्टात्मा ची सीख उपर मन लाती कर विश्वास कनु बहकती जाये। 2 ईं वा कूड़े बन्दा चे कप्पट चे वजह कनु हुवी, जाई समझ सही फैंसला ना गेह सग़ी। 3 जको बीहा करने कनु रोके, ते खाणे ची कोच्छ चीजा कनु दूर रेहणे ची आज्ञा ङिये, जानु नरीकारा ने ऐवास्ते रचले कि विश्वास करने आला, ते सच्च नु पिछाणने आले वानु धन्यवाद चे लारे खाये। 4 कांकि नरीकारा ची रचली आली हर हेक चीज आच्छी छै, ते कुई वी चीज मना करने चे लायक कोनी, पर हा कि धन्यवाद चे लारे खाली जाओ। 5 कांकि नरीकारा चे वचन ते प्राथना लारे शोद्ध हुती जाये। ईशु मसीह चा आच्छा सेवक 6 अगर तु भऊ ते ब़ेहणीया नु यां बाता ची याद ङिवाता रिहे तां, ते ईशु मसीह चा आच्छा सेवक बणे, ते विश्वास ते ओ आच्छे उपदेश चा बाता लारे, जको तु मनता आला, दुधा पालन पोसण हुता रिही। 7 पर अशुद्ध ते ब़ुढीया जिसड़ी कहाणीया कनु अलग़ रेह, ते भग़ती नु साधना कर। 8 कांकि कसरत लारे शरीरा नु थोड़ा फायदा तां हुवे वे, पर नरीकारा ची भग़ती सारीया बाता चे वास्ते लाभदायक छै, कांकि ऐ समय ची ते आणे आले जीवन ची आशीषा ची प्रतिज्ञा ऐचे वास्ते छै। 9 ते हा बात सच्च ते हर-तरीके लारे मनणे चे लायक छै। 10 कांकि अम्ही घणी मेहनत ते जत्तन ऐवास्ते करु कि, अम्ची आस ओ जीते नरीकारा उपर छै, जको सारा बन्दा चा छै, ते खास करती कर विश्वास करने आला चा उद्धारकर्ता छै। 11 जा बाता ची आज्ञा ङे, ते सिखाता रेह। 12 कुई दुधी जवानी नु तोच्छ ना समझ सग़ो पर वचन, ते चाल-चलन, ते प्रेम, ते विश्वास, ते पवित्रता मां विश्वास करने आला चे वास्ते नमुना बणती जा। 13 जब तक मैं ना आवे, तब तक पवित्र वचन पढ़ती कर सुणावणे मां ते उपदेश ते सिखावणे मां लाग़ला रिहो। 14 ओ आत्मिक वरदाना लारे जको दुधे कनु छै, ओनु कामा मां गेहते जको भविष्यवाणी लारे अग़ुवा चे हाथ मेहलणे चे समय उपर तनु मिड़ला हुता। 15 वां बाता नु सोचता रेह, ताकि वा बढ़ोतरी सारा लौका उपर प्रकट हो। 16 आपणी ते आपणे उपदेश ची चौकसी राख। यां बाता उपर टिकला रेह, कांकि अगर इसड़े करता रिहे, तां तु आपणे, ते आपणे सुणने आला चे वास्ते वी उद्धार ची वजह हुवे। |
CC BY-NC-ND 4.0