1 तीमुथियुस 1 - ओङ राजपूतनमस्कार 1 पौलुस ची तरफु जको अम्चे उद्धारकर्ता नरीकार, ते अम्ची आस चा अधार मसीह ईशु ची आज्ञा लारे मसीह ईशु चा प्रेरित छै। 2 तीमुथियुस चे नांवे जको विश्वास मां माया सच्चा पूत छै। ब़ा नरीकार, ते अम्चे प्रभु ईशु मसीह ची ओर कनु, तनु अनुग्रह, ते दया, ते शान्ति मिलती रिहो। कूड़े गुरुवां चे विरोध चितावनी 3 जिंवे मैं तनु मकिदुनिया सनु जते बेले, तनु समझाले हुते, कि इफिसुस मां रेहती कर लौका नु हा आज्ञा ङे कि, कूड़ी शिक्षा ना ङे। 4 ते वे इसड़ीया मनघड़न्त कहाणीया ते बेअन्त पीढ़ीया उपर मन ना लावा, जाये कनु लड़ाई-झगडे़ हुवी, ते नरीकारा ची वा इच्छा चे अनुसार कोनी, जको विश्वास लारे ही पुरी हो सग़े, यूंही ही मैं बल्ति किहे पला। 5 आज्ञा चा निचोड़ हा छै, कि शोद्ध मन ते आच्छा विवेक, ते बिना कप्पट करले विश्वास लारे प्रेम पैदा हुला हो। 6 याहनु छोड़ती कर कितनी बन्दी फिरती कर बेफालतु चा बाता मां फसती गेली। 7 व्यवस्था चे गुरु ते हुवणे चाहवी, पर जको बाता किही ते जानु बङी हिम्मती लारे ब़ोली, वानु समझी तक वी ना। 8 पर अम्ही जाणु, कि अगर कुई व्यवस्था नु व्यवस्था ची रीति उपर कामा मां आणे, ते व्यवस्था आच्छी छै। 9 ईं जाणती कर कि व्यवस्था धर्मी जन वास्ते कोनी, पर अधर्मीया, निरंकुशा, भग़तीहीन, पापीया, अपवित्र, ते अशुद्ध, आई-ब़ा नु मारणे आले, हत्या करने आले। 10 व्यभिचार करने आले, पुरुषगमन करने आले, बन्दा नु बेचणे आले, कूड़ मारणे आले, ते कूड़ी कसम खाणे आले, ते याहनु छोड़ती कर खरे उपदेश चे सारे विरोधीया चे वास्ते ठहराली गेली। 11 हा खरा उपदेश, हाओ परमधन्य नरीकारा ची महिमा चे ओ सुसमाचार चे अनुसार, जको मनु सोंपला गेला। अनुग्रह चे वास्ते धन्यवाद 12 मैं आपणे प्रभु ईशु मसीह चा, जेह्णे मनु सामर्थ ङिली, धन्यवाद करे पला, कि ओणे मनु विश्वास चे लायक समझती कर आपणी सेवा चे वास्ते ठहराले। 13 मैं तां पेहले निन्दा करने आला, ते सतावणे आला, ते अन्धेर करने आला हुता, तां वी माये उपर दया हुली, कांकि मैं अविश्वास ची दशा मां बिना सोचले समझले, ये कामे करली हुती। 14 ते अम्चे प्रभु चा अनुग्रह ओ विश्वास ते प्रेम चे लारे जको ईशु मसीह मां छै, ब़ोहत ज्यादा हुला। 15 हा बात सच्च ते हर तरह मनणे चे लायक छै, कि मसीह ईशु पापीया चा उद्धार करने चे वास्ते संसारा मां आला, जाये महु सबकनु बङा मैं छै। 16 पर माये उपर ऐवास्ते दया हुली, कि मैं सारा महु बङा पापी छै, माये उपर ईशु मसीह आपणी पुरी सहनशीलता ङिखाणो, कि जको लौक ओचे उपर अनन्त जीवन चे वास्ते भरोसा राखे, वांचे मां हेक आदर्श बणे। 17 हमा सनातन राजा यानिकि अविनाशी, अणङेखले, हेको नरीकारा चा आदर ते महिमा युगानयुग हुती रिहो। आमीन। 18 ओ माया पूत तीमुथियुस, वा भविष्यवाणीया चे वचना चे अनुसार जको पेहले दुधे बारे मां करलीया गेलतीया, मैं ये आज्ञा तनु सोंपे पला, कि तु वांचे अनुसार आच्छी लड़ाई नु लड़ता रेह। 19 ते विश्वास ते ओचे आच्छे विवेक नु पकड़ली राख, ते कोच्छ बन्दी इसड़ी छी जाणे आच्छी समझ नु छोड़ती ङिले ते वांचा विश्वास खत्तम हुती गेला। 20 वांचे महु हुमिनयुस ते सिकन्दर छी, मैं वानु शैताना नु सोंपती ङिले। कि वे नरीकारा ची निन्दा करने ना सिखो। |
CC BY-NC-ND 4.0