1 पतरस 4 - ओङ राजपूतबदड़ला आला जीवन 1 ऐवास्ते जबकि मसीह ने शरीरा मां हुती कर ङोख भोग़ले तां तम्ही वी वेही मनसा नु हथियारा आलीकर धारती गिहा कांकि जेह्णे शरीरा मां ङोख भोग़ले, ऊं पापा कनु छुटती गेले 2 ऐवास्ते कि भविष्य मां आपणे बाकि शरीरिक जीन्दगी बन्दा ची इच्छा चे अनुसार ना बल्कि नरीकारा ची इच्छा चे अनुसार बितावा। 3 कांकि पेहले तम्ही नेरीया जातिया आलीकर जीवन बीताते, जिंवे बुरी इच्छा चे अनुसार काम करने, ते लोचपण, ते मतवालापन, व्यभिचार, ते पियक्कड़पन, ते किज़ड़ी मूर्तिपूजा मां जिठे पेहले समय गुजारला ओही ब़ोहत छै। 4 ऐचे कनु वे हैरान हुवी कि तम्ही इसड़े भारी लोचपण मां वांचा साथ ना ङिया, ते ऐवास्ते वे बुरे-भले किही। 5 पर वे ओनु जको जीता चा ते मरले आला चा न्यां करने वास्ते तियार छै, लेखा ङिये। 6 कांकि मरले आला नु वी सुसमाचार ऐवास्ते सुणाला गेला, कि शरीरा मां तां बन्दा चे अनुसार वांचा न्यां हो, पर आत्मा मां वे नरीकारा चे अनुसार जीते रिहो। नरीकारा चे आच्छे काम करने आले 7 सारीया बाता चा अन्त तुरन्त हुवणे आला छै। ऐवास्ते काबु हुती कर प्राथना वास्ते चौकस रिहा। 8 सबकनु खास बात हा छै कि हेके ङुजे लारे ज्यादा प्रेम राखा कांकि प्रेम ब़ोहत पापा नु ढकती नाखे। 9 बिना बुड़कले हेके ङुजे ची मेहमानी ते कद्दर करा। 10 जानु जको वरदान मिड़ला आला छै, ऊं वानु नरीकारा चे हर-तरहा चे अनुग्रह चे भले भण्डारी आलीकर हेके ङुजे ची सेवा मां लाओ। 11 अगर कुई ब़ोलो, तां इसड़े ब़ोलो मना नरीकारा चा वचन छै, अगर कुई सेवा करे, तां वे ताकती लारे करो जको नरीकार ङिये, जाये मां सारीया बाता ईशु मसीह चे जरिये, नरीकारा ची महिमा प्रकट हो। महिमा ते साम्राज्य युगानयुग ओचा छै। आमीन। मसीह आलीकर ङोख भोग़णे 12 हे प्यारे दोस्त, जको ङोख तम्हानु परखणे चे वास्ते जाखते चे लारे ङिला जई, ओचे कनु हा समझती कर अचम्भा ना करा कि कुई अनोखी बात तम्चे उपर बीते पली। 13 पर जिंवे मसीही चे ङुखा मां शामिल हुवा, ते खुशी मनावा, जाये कनु ओची महिमा उजागर हुते समय उपर वी तम्ही खौश ते मगन हो सग़ा। 14 अगर तम्ची मसीही चे नांवा उपर बेकदरी हुवे, तां वे बेकदरी नु सहन करती गिहा कांकि तम्ही धन्न छिवा। कांकि महिमा ची आत्मा, जको नरीकारा चा आत्मा छै तम्चे मां वास करे। 15 तम्चे महु कुई बन्दे हत्यारे जा चोर, जा ते बल्ति कुकर्मी हुवणे जा ङुजा चे कामा मां नुकसान पुचाणे आला बणती कर ङोख ना भोग़ो। 16 पर मसीही हुवणे चे वजह कनु ङोख भोग़ो, तां शर्मसार ना हो। पर ऐ बाते चे वास्ते नरीकारा ची महिमा करो। 17 कांकि ओ समय आती गेला, कि पेहले नरीकारा चे लौका चा न्यां करला जई, ते जबकि न्यां ची शुरुआत अम्चे ही कनु हुवी। ते वा लौका चा का अन्त हुवी जको नरीकारा चे सुसमाचार नु ना मनी? जिंवे शास्त्र मां लिखले पले, 18 “अगर धर्मी बन्दे नु बङी मुश्किल लारे उद्धार मिली, ते जको अधर्मी ते पापी बन्दी छी वांचे का हुवी?” 19 ऐवास्ते जको नरीकारा ची मर्जी चे अनुसार ङोख भोग़ी, वे भलाई करते हुले, आपणी-आपणी जेन्द नु विश्वासा लारे सरजनहार चे हाथा मां सोंपती ङिया। |
CC BY-NC-ND 4.0