1 पतरस 3 - ओङ राजपूत

मोणस ते घराआली

^1-2 हे घराआलीया तम्ही वी आपणे मुणसा चे वशा मां रिहा। ऐवास्ते कि अगर यांचे महु कुई इसड़े हो जको वचन नु ना मनते हो, तांवी तम्चे भय लारे पवित्र चाल-चलन नु ङेखती कर बिना वचन चे आपणी-आपणी घराआली चे चाल-चलन चे जरिये छिकिती जाओ।

³ ते तम्चा सिंगार ङिखावटी ना हो, यानिकि माल गूंथणे, ते सोने ची ग़ाहणी, जा तरह तरह ची ओढ़णी घालणी।

⁴ बल्कि तम्चा सिंगार तां तम्चे मना चा भीतरी व्यक्‍तित्व हुवणा चाही छै जको मुलायम ते शान्त चे अविनाशी सुन्दरता लारे मिड़ला आला हो। नरीकारा ची नजरी मां जको ब़ोहत ही कीमती हो।

⁵ कांकि बीतले आले युगा चा वे पवित्र असतरीया आपणे आप नु सजाणे संवारने चा हाओ ही ढंग हुता, जाया उम्मीदा नरीकारा उपर टिकलीया आलीया हुतीया। वे आपणे आपणे मुणसा चे वशा मां रेहतीया।

⁶ उदाहरण चे वास्ते, जिंवे सारा अब्राहम ची आज्ञा मां रेहती ते ओनु आपणा मालिक मनती। ऐवास्ते तम्ही वी अगर भलाई करा, ते कुई वी तरह चे ङर कनु ङरती कर ना रिहा तां विचीया धूवा बणा।

⁷ यूंही हे घराआले, तम्ही वी समझदारी लारे घराआलीया लारे जीवन बितावा। ते असतरीया नु निर्बल चीज जाणती कर वांचा कद्दर करा, हा समझती कर कि अम्ही ङोनी जीवन चे वरदान चे वारिस छिऊं, जाये कनु तम्चीया प्राथना रुकती ना जाओ।

सच्‍चे कामा वास्ते ङोख भोग़णे

⁸ ऐचा मतलब हा छै कि तम्ही सारे चे सारे हेक मन हुती कर, दयालु, ते भाईचारे ची प्रीति राखणे आले, ते दयावन्त ते नर्म बणा।

⁹ तम्ही बुराई चे बदले मां बुराई ना करा। ते ना गालीया चे बदले गालीया काढ़ा, पर ऐचे बदले आशीष ही ङिया। कांकि तम्ही आशीष चे वारिस हुवणे चे वास्ते हकारले गेले।

¹⁰ कांकि शास्त्र मां लिखले पले, “जको कुई जीवन ची इच्छा राखे, ते आच्छी ङिहें ङेखणे चाहवे, ऊं आपणी जुबानी नु गन्दिया बाता करने कनु रोकली रिहो। ते आपणे होठा नु छल चा बाता कनु रोकली रिहो।

¹¹ ऊं बुराई चा साथ छोड़ती ङियो, ते भलाई चा ही बाता करो। ऊं मेल-मिलाप नु सोधो, ते ओचा जत्तन करना चाही छै।

¹² कांकि प्रभु चीया आंखीया धर्मीया उपर हमेशा लाग़लीया रिही, ते ओचे कान ओची बिनती चे तरफ लाग़ले रिही। पर प्रभु बुराई करने आला चे विरोध मां रिहे।”

¹³ ते तम्ही अगर भलाई करने मां लाग़ले रिहा तां तम्ची बुराई करने आला बल्ति कूण छै?

¹⁴ ते अगर तम्ही भले कामा चे वजह कनु ङोख भोग़ा, ते तम्ही धन्य छिवा। पर वांचे ङराणे कनु ना ङरा ते ना ही घब़रावा।

¹⁵ पर मसीह नु प्रभु जाणती कर आपणे आपणे मना मां पवित्र समझा, ते जको कुई तम्हा कनु तम्ची आस चे बारे मां कहीं पूछे ते ओनु उत्तर ङेणे चे वास्ते हमेशा तियार रिहा, पर नरमाई ते ङर चे लारे।

¹⁶ ते आपणे विवेक नु वी शोद्ध राखा, ऐवास्ते कि जिसीया बाता चे बारे मां वे जको मसीह मां तम्चे आच्छे चाल-चलन चा अपमान करी, शर्मसार हो।

¹⁷ कांकि अगर नरीकारा ची हाओ इच्छा हो, कि तम्ही भलाई करने वास्ते ङोख भोग़ा, तां हा बुराई करने ची बजाय कनु ङोख भोग़णे आच्छे छै।

¹⁸ कांकि मसीह ने वी अम्चे पापा चे वास्ते ङोख भोग़ले। यानिकि ओ बेकसूर हुता। अम्चे पापा चे वास्ते हेक वारी मरती गेला कि अम्हानु नरीकारा चे गोढु गेहती जाओ। शरीरा चे जरिये तां ओ मारला गेला, पर आत्मा चे जरिये जिवाला गेला।

¹⁹ ओ आत्मा ची स्थिति मां पताल जती कर वा आत्मा नु जको कैद हुतीया वानु मुक्‍ति चा सुसमाचार सुणाला।

²⁰ जेह्णे ओ गुजरले समय मां आज्ञा कोनी मनली, जिसे बेले नरीकार नूह चे ङिहां मां सब्र राखती रुकला रेहला, ते ओ जहाज बणे पलता, जाये मां ब़ेसती कर थोड़े लौक यानि सेर्फ आठ जींये पाणीया कनु बचती गेली।

²¹ ते ओही पाणीया ची मिसाल वी यानिकि बपतिस्मा, ईशु मसीह चे जीते हुवणे चे जरिये, हमा तम्हानु बचावे, ओचे कनु शरीरा चे मैल नु दूर करने चा मतलब कोनी छै, पर शोद्ध विवेक लारे नरीकारा चे हाथा मां हुती जाणे चा मतलब छै।

²² ओ स्वर्ग़ा मां जती कर नरीकारा चे सज़्ज़े पासु जती कर ब़ेसती रेहला, ते स्वर्ग़दूत ते अधिकारी ते सामर्थी ओचे अधीन मां करती ङिले गेले।