1 यूहन्ना 5 - ओङ राजपूतसंसारा चे उपर जय पाणी 1 जाया हा विश्वास छै कि ईशु ही मसीह छै, ओ नरीकारा कनु पैदा हुला, ते जको पैदा करने आले लारे प्रेम राखे, ओ वांचे लारे वी प्रेम राखे, जको ओकनु पैदा हुले। 2 जिसे बेले अम्ही नरीकारा लारे प्रेम राखु, ते ओचीया आज्ञा नु मनु, तां ऐचे कनु अम्ही जाणु कि अम्ही नरीकारा ची ऊलाद्धी लारे प्रेम राखु। 3 ते नरीकारा चा प्रेम हा छै कि, अम्ही ओची आज्ञा नु मनु, ते ओची आज्ञा मुश्किल कोनी। 4 कांकि जको कुई नरीकारा कनु पैदा हुले, वे संसारा उपर जय प्राप्त करे, ते वा जय जाये कनु संसारा उपर जय प्राप्त हुवे अम्चा विश्वास छै। 5 संसारा उपर जय पाणे आले कूण छै? सेर्फ ऊं जाया विश्वास छै, कि ईशु, नरीकारा चा पूत छै। ईशु मसीह चे बारे मां ग़वाही 6 हाओ ईशु मसीह ही छै जको अम्चे गोढु बपतिस्मा गेहणे आला पाणी, ते क्रूसा उपर बेहणे आले लुहींया लारे प्रकट हुला, सेर्फ पाणीया चे लारे ही कोनी, बल्कि पाणी ते लुहींया चे लारे आला। 7 ते वा पवित्र आत्मा जको ओची ग़वाही ङिये कांकि आत्मा ही सच्चा छै। 8 ते ग़वाही ङेणे आले तीन छी। आत्मा, ते पाणी, ते लुहीं, ये तीन ग़वाह आपस मां हेक बाते पे राजी छी। 9 जिसे बेले अम्ही बन्दा ची ग़वाही नु मनती गिहुं, ते नरीकारा ची ग़वाही तां ऐचे कनु ब़ोहत बढ़ती कर छै। ते नरीकारा ची ग़वाही हा छै, कि ओणे पूता चे बारे मां ग़वाही ङिली। 10 जको नरीकारा चे पूता उपर विश्वास करे, ऊं आपणे ही मां ग़वाही राखे। जेह्णे नरीकारा उपर विश्वास कोनी करला, ओणे ओनु कूड़े ठहराले। कांकि ओणे वे ग़वाही उपर विश्वास कोनी करला, जको नरीकारा ने आपणे पूता चे बारे मां ङिली। 11 ते वा ग़वाही हा छै कि, नरीकारा ने अम्हानु अनन्त जीवन ङिला, ते हा जीवन ओचे पूता मां छै। 12 जाये कनु पूत छै, ओचे कनु हमेशा चा जीवन छै, ते जाये कनु नरीकारा चा पूत कोनी, ओचे कनु हमेशा चा जीवन वी कोनी। हमेशा चा जीवन 13 जको नरीकारा चे पूता चे नांवा उपर विश्वास करी, ये बाता मैं तम्हानु ऐवास्ते लिखलीया, कि तम्ही जाणा, कि अनन्त जीवन तम्चा छै। 14 ते अम्हानु ओचे सामणे जको हिम्मत हुवे, वा हा छै कि अगर अम्ही ओची इच्छा लारे कहीं मांगु तां अम्ची सुणे। 15 ते जिसे बेले अम्ही जाणु कि, जको कोच्छ अम्ही मांगु ओ अम्ची सुणे, ते हा वी जाणु कि, जको कोच्छ अम्ही ओकनु मांगले, ऊं अम्ही हांसिल वी करले। 16 अगर कुई आपणे भावां ते ब़ेहणीया नु इसड़ा पाप करते ङेखे, जाया नतीजा हमेशा ची मौत ना हो, ते ओनु आपणे भऊ ते ब़ेहणीया चे वास्ते प्राथना करनी चाही छै, ते नरीकार ओनु जीवन ङिही। मैं वांचे बारे मां बात करे पला जको वे इसड़े पाप करने मां लाग़ले आले छी, मैं वानु हमेशा ची मौत तक नी पुचावी। इसड़े पाप वी रिही, जाया नतीजा मौत छै। मैं तम्हानु इसड़े पापा चे वास्ते प्राथना करने वास्ते कोनी किहे पला। 17 सारे गन्दे काम पाप छी, पर इसड़ा पाप वी छै, जाया नतीजा मौत कोनी। 18 अम्ही जाणु, कि जको कुई नरीकारा कनु पैदा हुला, ऊं पाप ना करी, पर जको नरीकारा कनु पैदा हुले, ओनु नरीकार बचाली राखे, ते शैतान ओनु हाथ तक ना ला सग़ी। 19 अम्ही हा जाणु कि, अम्ही नरीकारा चे छिऊं, ते सारा संसार ओ शैताना चे बसा मां छै। 20 तां हा वी अम्ही जाणु कि, नरीकारा चा पूत आती गेला ते ओणे अम्हानु हा समझ ङिली, कि अम्ही ओ सच्च नु पिछाणु, ते अम्ही ओचे मां जको सच्चाई छै, यानिकि ओचे पूत ईशु मसीह चे लारे रिहुं, सच्चा नरीकार ते अनन्त जीवन हाओ छै। 21 हे माई ब़ाले, आपणे आप नु कूड़े देवता कनु बचाती कर राखा। |
CC BY-NC-ND 4.0