1 यूहन्ना 4 - ओङ राजपूतसच्ची आत्मा ते कूड़ी आत्मा 1 हे प्यारे, हर हेक आत्मा चा विश्वास ना करा, बल्कि आत्मा नु परखा कि वे नरीकारा ची ओर कनु छी जा कोनी। कांकि ब़ोहत सारे कूड़े भविष्यवक्ता संसारा महु निकलती खड़े हुले। 2 नरीकारा ची आत्मा लारे ब़ोलणे आले नु तम्ही यूं पिछाण सग़ा, हर हेक आत्मा जको मनती गिहे कि, “ईशु मसीह बन्दे चे रूपा मां हुती कर धरती उपर आला।” ओ नरीकारा ची आत्मा कनु ब़ोलणे आला छै। 3 ते जको कुई आत्मा ईशु चे बारे मां ऐ बाते नु ना मनी कि, वा नरीकारा ची ओर कनु कोनी। वाहो तां मसीह चे विरोधी ची आत्मा छै। जाई चर्चा तम्ही सुणती चुकले, कि ओ आणे आला छै, ते हमा वी संसारा मां छै। 4 हे ब़ाले, तम्ही नरीकारा ची छिवा, ते तम्ही मसीह चे दुश्मना उपर जय पाली, कांकि जको तम्चे मां रेहणे आला नरीकार, ते संसारा मां रेहणे आले शैताना कनु, बङा छै। 5 वे मसीह-विरोधी बन्दी संसारा ची छी, ऐह वजह कनु वे संसारा चीया बाता करी, ते संसार वांची सुणे। 6 अम्ही नरीकारा चे छिऊं। जको नरीकारा नु जाणे, ओ अम्ची सुणे, जको नरीकारा नु ना जाणी, ओ अम्ची ना सुणी। यूंही अम्ही सच्चाई ची आत्मा ते भ्रम ची आत्मा नु पिछाणती गिहुं। नरीकार प्रेम छै 7 हे प्यारे, अम्ही आपस मां प्रेम राखु, कांकि प्रेम नरीकारा कनु छै। ते जको कुई प्रेम करे, ऊं नरीकारा कनु जमले, ते नरीकारा नु जाणे। 8 जको प्रेम ना राखी, ऊं नरीकारा नु ना जाणी, कांकि नरीकार प्रेम छै। 9 जको प्रेम नरीकार अम्चे लारे राखे, ओ ऐकनु प्रकट हुला कि, नरीकारा ने आपणे हिकड़ाता चे पूता नु ऐ संसारा मां भेज़ले, कि अम्ही ओचे जरिये जीवन पा सग़ु। 10 सच्चा प्रेम ऐचे मां कोनी कि अम्ही नरीकारा लारे प्रेम करला, पर ऐचे मां छै, कि ओणे अम्चे लारे प्रेम करला, ते अम्चे पापा चे प्रायश्चित चे वास्ते आपणे पूता नु भेज़ले। 11 हे प्यारे, जिसे बेले नरीकारा ने अम्चे लारे इसड़ा प्रेम करला, ते अम्हानु वी आपस मां इसड़ा प्रेम राखणा चाही छै। 12 नरीकारा नु कङी किह्णी कोनी ङेखले, अगर अम्ही आपस मां प्रेम राखु, ते नरीकार अम्चे मां बणला रिहे, ते ओचा प्रेम अम्चे मां सेद्ध हुती गेला। 13 ऐचे कनु अम्ही जाणु कि अम्ही ओचे मां बणले रिहुं, ते ओ अम्चे मां, कांकि नरीकारा ने आपणी पवित्र आत्मा महु अम्हानु ङिला। 14 ते अम्ही ङेखती वी गेले ते ग़वाही वी ङियु, कि ब़ा नरीकारा ने आपणे पूता नु संसारा चा उद्धारकर्ता चे रूपा मां भेज़ले। 15 जको कुई हा मनती गिहे, “कि ईशु नरीकारा चा पूत छै,” ते नरीकार ओचे मां बणला रिहे, ते ऊं नरीकारा मां। 16 जको प्रेम नरीकार अम्चे लारे राखे, ओनु अम्ही जाणती गेले, ते अम्हानु ओचा विश्वास छै। नरीकार प्रेम छै, ते जको प्रेम मां बणले रिहे, ऊं नरीकारा मां बणले रिहे, ते नरीकार ओचे मां बणला रिहे। 17 ऐचे कनु प्रेम अम्चे मां सेद्ध हुला, कि अम्हानु न्यां चे ङिओ हिम्मत हो, कांकि जिसड़ा ईशु मसीह छै, यूंही संसारा मां अम्ही वी जिऊं पले। 18 प्रेम मां ङर ना रिही, बल्कि सेद्ध प्रेम ङरा नु दूर करती नाखे, कांकि ङरा चा नाता तां सजा लारे छै, ते जाये मां ङर रिहे, ओचे मां प्रेम सेद्ध कोनी। 19 अम्ही ऐवास्ते प्रेम करु, कि पेहले नरीकारा ने अम्चे लारे प्रेम करला। 20 अगर कुई किहे, “मैं नरीकारा लारे प्रेम राखे,” ते आपणे ब़ेहण भावां लारे बैर राखे, तां ऊं कूड़े छै। कांकि जको आपणे ब़ेहण भावां लारे, जानु ओणे ङेखले, प्रेम ना राखी, तां ऊं नरीकारा लारे वी जानु ओणे कोनी ङेखले, प्रेम ना राख सग़ी। 21 ते अम्हानु ईशु कनु हा आज्ञा मिड़ली, कि जको कुई आपणे नरीकारा लारे प्रेम राखे, ऊं आपणे भावां ते ब़ेहणीया लारे वी प्रेम राखे। |
CC BY-NC-ND 4.0