1 यूहन्ना 3 - ओङ राजपूत1 विचार करती कर ङेखा, ब़ा ने अम्चे लारे किसड़ा प्रेम करला कि नरीकारा ची ऊलाद्ध किवाहुं, ते सच्चमां अम्ही छिऊं वी। संसार अम्हानु ना जाणी, कांकि संसारा ने ईशु मसीह नु कोनी जाणले। 2 हे प्यारे, हमा वी अम्ही नरीकारा ची ऊलाद्ध छिऊं, ते हमा तक हा प्रकट कोनी हुले कि आणे आले समय मां अम्ही का कोच्छ हुं! इतने जाणु कि जिसे बेले ईशु मसीह प्रकट हुवी ते अम्ही ओचे समान हुती जऊं, कांकि ओनु उसड़े ही ङेखु जिसड़ा ओ छै। 3 जको कुई ईशु मसीह कनु इसड़ी आस राखे, ओ आपणे आप नु उसड़े ही पवित्र करो जिसड़ा ओ छै। 4 जको कुई पाप करे, ऊं व्यवस्था नु ना मनी ते व्यवस्था नु ना मनणे ही पाप छै। 5 तम्ही जाणा कि ईशु मसीह ऐवास्ते आला कि बन्दा चे पापा नु नाश करती नाखो। ते ओणे कङी पाप कोनी करला। 6 जको कुई मसीह मां बणले रिहे, ऊं पाप मां जीवन ना बितावी, जको कुई पाप मां जीवन बितावे, ओणे ना ते मसीह नु ङेखले ते ना ही ओनु जाणले। 7 हे ब़ाले, काये भरमाणे मां ना आजा। जको धर्म चे काम करे, ऊंही ओचे समान धर्मी छै। बेलकोल इसड़ा ही जिसड़ा ईशु मसीह धर्मी छै। 8 जको कुई पाप करे ऊं शैताना ची ओर कनु छै, कांकि शैतान शुरु कनु पाप करता आला। नरीकारा चा पूत ऐवास्ते प्रकट हुला कि शैताना चे कामा नु नाश करो। 9 जको कुई नरीकारा कनु जमले ऊं पाप ना करी, कांकि ओचे बीज वांचे मां बणले रिहे, ते ऊं पाप कर ही ना सग़ी कांकि नरीकारा कनु जमले। 10 ऐचे कनु नरीकारा ची ऊलाद्ध ते शैताना ची ऊलाद्ध जाणली जाये, जको कुई धर्म चे काम ना करी ऊं नरीकारा कनु कोनी, ते ना ऊं जको आपणे भावां ते ब़ेहणीया लारे प्रेम ना राखी। हेके ङुजे लारे प्रेम राखा 11 कांकि जको समाचार तम्ही शुरु कनु सुणला ओ हा छै, कि अम्ही हेके-ङुजे लारे प्रेम राखु, 12 ते कैन चे समान ना बणा, जाया रिश्ता शैताना लारे हुता, जेह्णे आपणे भावां नु मारती ङिलते। ओनु किसी वजह लारे मारले हुते? ऐवास्ते कि ओचे काम बुरे हुते, ते ओचे भऊ हाबिल चे काम धर्म चे हुते। 13 हे भऊ ते ब़ेहणीया, अगर संसार तम्चे लारे बैर राखे तां अचम्भा ना करजा। 14 अम्ही जाणु कि अम्ही मौत कनु पार हुती कर जीवन मां पुज़ले। कांकि अम्ही भावां ते ब़ेहणीया लारे प्रेम राखु। जको प्रेम ना राखी ओ मौत ची दशा मां रिहे। 15 जको कुई आपणे भावां लारे बैर राखे, ऊं हत्यारे छै, ते तम्ही जाणा कि कुई हत्यारे मां अनन्त जीवन ना रिही। 16 अम्ही प्रेम ऐचे कनु जाणला, कि ईशु मसीह ने अम्चे वास्ते आपणे प्राण ङिती ङिले, ते अम्हानु वी आपणे भावां ते ब़ेहणीया चे वास्ते प्राण ङेणे चाही छै। 17 पर जाये कनु संसारा ची धन दौलत हो ते ऊं आपणा भावां ते ब़ेहणीया ची जरुरत नु ङेखती कर, वांचे उपर तरस खाणे ना चाहो, ते ओचे मां नरीकारा चा प्रेम किवें बणला रेह सग़ी? 18 हे माई प्यारी ब़ाले, अम्ही प्रेम सेर्फ वचन ते जुबानी ही कनु ना करु, पर काम ते सच्चाई चे जरिये वी प्रेम करु। नरीकारा चे सामणे हिम्मत 19 ऐचे कनु अम्ही जाणु कि अम्ही सच्चाई चे छिऊं, ते नरीकारा चे सामणे आपणे मना मां हिम्मत कर सग़ु। 20 पर अगर ऐचे बावजूद वी अम्चे मन, अम्चे बुरे कामा ची वजह कनु अम्हानु दोषी ठहरावे। तां अम्हानु याद राखणे चाही छै कि, नरीकार हमा वी अम्चे मना कनु ब़ोहत बङा छै, ते ओ सारे कोच्छ जाणे। 21 हे प्यारे, अगर अम्चे मन अम्हानु दोष ना ङी, तां अम्हानु नरीकारा चे सामणे हिम्मत हुवे, 22 ते जको कोच्छ अम्ही मांगु, ऊं अम्हानु ओचे कनु मिले, कांकि अम्ही नरीकारा ची आज्ञा नु मनु जको कोच्छ ओनु भावे, अम्ही ऊंही काम करु। 23 नरीकारा ची आज्ञा हा छै कि अम्ही नरीकारा चा पूत ईशु मसीह चे सामर्थी नांवा उपर विश्वास करु, ते जिसड़ा ईशु ने अम्हानु आज्ञा ङिली ओचे अनुसार आपस मां प्रेम राखु। 24 जको नरीकारा चीया आज्ञा नु मने, ऊं नरीकारा मां ते नरीकार वांचे मां बणला रिहे, ते ऐचे कनु, यानिकि वे पवित्र आत्मा लारे जको ओणे अम्हानु ङिला छै, अम्ही जाणु कि नरीकार अम्चे मां बणला रिहे। |
CC BY-NC-ND 4.0