1 कुरिन्थियां 16 - ओङ राजपूतयरुशलेम ची कलीसिया वास्ते दान 1 हमा नरीकारा चे लौक जको यहूदिया प्रदेस मां छी वांची सहायता वास्ते दान चे बारे मां जको आज्ञा मैं गलातिया प्रदेस ची कलीसिया नु ङिली हुती, वे आज्ञा चा पालन तम्ही वी करा। 2 हर हफ्ते चे पेहले ङिओ तम्चे महु हर हेक आपणी आमदनी चे अनुसार कहीं आपणे मेहले जती करो, कि माये आवणे पर दान भेला ना करना पड़ो। 3 ते जिसे बेले मैं आवा, तां जानु तम्ही चाहवा वानु मैं चिठ्ठीया ङिती कर भेज़ती ङी, कि तम्चा दान यरुशलेम शहरा मां पुचाती ङियो। 4 ते अगर माये वी जाणे सही हुले तां वे माये लारे जाये। पौलुस ची योजना 5 ते मैं मकिदुनिया हुती कर तम्चे गोढु आवी, कांकि मनु मकिदुनिया हुती कर जाणे जरुरी छै। 6 पर हो सग़े कि तम्चे इठे ही रुकती जाये ते सर्दी चा मौसम तम्चे इठी कटती गिहे, तब जिठे माये जाणे हो, ऊंगी तम्ही माई सहायता करती ङिजा। 7 मैं ना चाहवी कि तम्हानु सेर्फ चलते-चलते मिले, पर माई आस छै कि अगर प्रभु ने चाह्ले तां कोच्छ समय तक मैं तम्चे लारे रिही। 8 पर मैं पिन्तेकुस्त तेंहवारा तक इठी इफिसुस शहरा मां ही रिही। 9 कांकि माये वास्ते इठे बङी सेवा चा मार्ग़ खुड़ला, ऐचे अलावा इठे माये ब़ोहत सारे विरोधी वी छी। 10 जिसे बेले तीमुथियुस तम्चे गोढु आती जाओ, तां ओचा ध्यान राखजा तम्चे इठे निश्चिन्त रिहो कांकि ओ माये आलीकर प्रभु चे काम करे। 11 ऐवास्ते कुई ओनु तोच्छ ना जाणो, पर ओनु खैरियत लारे इंगे पुचाती ङिजा कि माये गोढु आती जाओ। मैं ङुजे भावां लारे ओचा इन्तजार करे पला। 12 ते भऊ अपुल्लोस कनु मैं ब़ोहत बिनती करली कि तम्चे गोढु भावां लारे चाह्ला जा। पर ओचे ऐ समय जाणे चे मन कोनी करले, जब मौका मिली तब आती जई। आखरी आदेश 13 जाग़ते रिहा, विश्वासा मां मजबूत रिहा, बेधड़क बणा, ताकतवार बणा। 14 तां हर हेक काम प्रेमभाव लारे ही करा। 15 हे माये भऊ, तम्ही स्तिफनास चे घराणे नु जाणा कि ओ अखाया प्रदेस चा पेहला फल छै, ते नरीकारा चे लौका ची सेवा वास्ते तियार रिहे। 16 ऐवास्ते मैं तम्हा कनु बिनती करे पला कि इसड़ा चे अधीन रिहा, बल्कि हर-हेक चे जको ऐ कामा मां मेहनती ते सहायक छी। 17 स्तिफनास ते फुरतूनातुस ते अखईकुस चे आवणे लारे मैं खौश छै, कांकि जको काम तम्हा कनु पुरे कोनी हुले वाणे पुरे करती ङिले। 18 ते वाणे माई ते तम्ची आत्मा नु चैन ङिला, ऐवास्ते इसड़ा नु मना। 19 आसीया ची कलीसिया चे तरफु तम्हानु नमस्कार। अक्विला ते प्रिस्का चा ते वांचे घरा ची कलीसिया चा वी तम्हानु प्रभु मां ब़ोहत-ब़ोहत नमस्कार। 20 इठले सारे भावां चा तम्हानु तेह दिला लारे नमस्कार। हाथ जोड़ती कर आपस मां नमस्कार करा। 21 मैं पौलुस, खौद्द आपणे हाथा लारे नमस्कार लिखे पला। 22 अगर कुई प्रभु लारे प्रेम ना राखो तां ऊं श्रापित हो। अम्चा प्रभु आणे आला छै। 23 प्रभु ईशु चा अनुग्रह तम्चे उपर हुता रिहो। 24 माया प्रेम मसीह ईशु मां तम्चे सब लारे रिहो। आमीन। |
CC BY-NC-ND 4.0