1 कुरिन्थियां 15 - ओङ राजपूतमसीह चा पुनरुत्थान 1 हे माये भऊ, मैं तम्हानु ओही सुसमाचार बावड़े पला जको पेहले सुणाती चुकला जको तम्ही मनती वी चुकले हुते, ते जाये मां तम्ही मजबूत वी छिवा। 2 अगर तम्ही ओ सुसमाचार नु जको मैं तम्हानु सुणाला हुता ओचे मां बणले रिहा तां तम्चा उद्धार हुवी, ना तां तम्चे विश्वास करने बेकार छै। 3 ऐ वजह कनु मैं सबकनु पेहले तम्हानु वाहो बात पुचाती ङिली जको माये कनु पुज़ली हुती, कि पवित्रशास्त्र चे वचन चे अनुसार ईशु मसीह अम्चे पापा वास्ते मरती गेला, 4 ते दफनाला गेला ते पवित्रशास्त्र चे अनुसार तीजे ङिओ जीता वी हुला। 5 ते पतरस नु ओचे बाद ब़ारहा प्रेरितां महु बचला आला नु वी ङिसला हुता। 6 बल्ति पाँच साओ कनु ज्यादा जणा नु ङिसला हुता, जाये महु ब़ोहत सारे हमा तक जीते छी पर कितने गेले पती। 7 बल्ति याकूब नु ङिसला ओचे बाद सब प्रेरितां नु फेर ङिसला हुता। 8 ओ सबकनु बाद मनु वी ङिसला। मैं अधूरे ङिहां चे जमले आले ब़ाला आलीकर छै। 9 कांकि मैं प्रेरितां महु सबकनु छोटा छै, बल्कि प्रेरित किहवाणे चे वी काबिल कोनी, कांकि मैं नरीकारा ची कलीसिया नु सताले हुते। 10 पर मैं जको कोच्छ वी छै, नरीकारा चे अनुग्रह लारे छै। ते ओचा अनुग्रह जको माये उपर हुला, ओ बेकार कोनी हुला। पर मैं वां सबकनु बधती कर मेहनत वी करली तां वी ईं माये तरफु कोनी हुले पर नरीकारा चे अनुग्रह लारे जको माये उपर हुता। 11 ऐवास्ते चाहे मैं छै, चाहे वे हो, अम्ही हाओ प्रचार करु, ते ऐचे उपर तम्ही विश्वास वी करला। अम्चा पुनरुत्थान 12 हमा अगर मसीह चा हा प्रचार करला जाये, कि ओ मरले आला महु जीता हुती गेला, तां तम्चे महु कितने कां किही, कि मरले आला चा पुनरुत्थान छै ही कोनी? 13 अगर मरले आला चा पुनरुत्थान ही कोनी, तां मसीह वी कोनी जीता करला गेला। 14 ते अगर मसीह ना जीता हुवीया, तां अम्चा प्रचार करने वी बेकार छै, ते तम्चा विश्वास वी बेकार छै। 15 ऐचे लारे-लारे अम्ही नरीकारा चे कूड़े ग़वाह बणु, कांकि अम्ही नरीकारा चे बारे मां हा ग़वाही ङिली कि ओणे मसीह नु मरले आला जिवाले। पर अगर वास्तव मां मरले आले जीते ना हुवीया तां मसीह नु वी कोनी जीते करले। 16 ते अगर मुड़दी ना जीती ऊठीया, तां मसीह वी ना जीता करला जईया। 17 ते अगर मसीह ना जीता ऊठीया, तां तम्चा विश्वास बेकार छै, ते तम्ही हमा तक आपणे पापा मां फसले पले। 18 तब तां जको मसीह मां नूहती रेहले, वे वी नाश हुले। 19 अगर अम्ही हेको सेर्फ ये जीन्दगी मां मसीह कनु आस राखु, तां अम्ही सब इन्साना कनु ब़ोहत बेकिस्मते छिऊं। 20 पर सच्चमां मसीह मुड़दा महु जीता ऊठला, ते जको नूहती रेहले वांचे महु, ओ पेहला फल हुला। 21 कांकि जब हेके इन्साना चे जरिये मौत आली, तां हेके इन्साना चे जरिये ही मरले आला चा पुनरुत्थान वी आला 22 ते जिंवे आदम मां सब मरी, यूंही मसीह मां सब जिवाले जाये, 23 पर हेक-हेक करती, पेहला फल मसीह, बल्ति मसीह चे आणे उपर ओचे लौक वी जिवाले जाये। 24 ऐचे बाद अन्त हुवी, जब मसीह सारी प्रधानता ते सारा अधिकार ते सामर्थ चा अन्त करती कर राज़ ब़ा नरीकारा नु सोंपती ङी। 25 ईं जरुरी छै कि ओ ओस बेले तक राज़ करो जब तक ओ आपणे सारे दुश्मना नु आपणे अधीन ना करती गिहो। 26 जिसे दुश्मना नु सबकनु अन्त मां नाश करले जई, वा मौत छै। 27 कांकि, “नरीकारा ने सब कोच्छ ओचे पग़्ग़ा तले करती ङिले,” पर जब ओ किहे कि सब कोच्छ ओचे अधीन करती ङिले गेले, तां ईं साफ छै कि जेह्णे सब कोच्छ ओचे अधीन करती ङिले, ओ आप अलग़ रेहला। 28 जब सब कोच्छ पूता चे अधीन करती ङिले गेले, तब पूत खौद्द ब़ा चे अधीन हुती जई, जेह्णे सब कोच्छ पूता चे अधीन करले हुते कि सब मां नरीकार ही सब कोच्छ हो। 29 अगर मरले आले जीते ना हुवीया बल्ति जको लौक मरले आला वास्ते बपतिस्मा गिही, वे का करे? अगर मुड़दी जीती हुवीया ना तां बल्ति वांचे वास्ते लौक कां बपतिस्मा गिहा? 30 ते अम्ही वी कां हर घड़ी मुसीबती मां पले रिहुवां? 31 हे माये भऊ, मनु तम्चे उपर ये गर्व बाते छै, कि जको तम्ही मसीह ईशु मां बणले पले, ये वजह कनु मैं हर ङिओ मौत चा सामना करे। 32 इफिसुस शहरा चे लौक माये लारे जंगली ढौरा आलीकर भिड़ले तां मनु ऐचा का फायदा हुला? अगर मरले आले जीते ना करले जईया, तां जिंवे कोच्छ लौका चे केहणे छै कि, “आवा अम्ही खऊं पीऊं कांकि सुवारे तां अम्हानु मरती ही जाणे।” 33 धोक्के मां ना रिहा। बुरी संगति आच्छे चरित्र नु बिगाड़ती ङिये। 34 खबरदार हुती जावा, पाप करने छोड़ती ङिया। ईं मैं तम्हानु कायल करने वास्ते ही किहे पला कांकि तम्चे महु कोच्छ तां नरीकारा नु जाणी ना। स्वर्ग़ीय शरीर 35 हमा कुई ईं पूछो, “किवें जीते हुती जई मुड़दी? किसड़े रिहे वांचे शरीर?” 36 तम्ही अणसमझ ना बणा! जको कोच्छ राहवा तब तक अंकुरीत ना हुवी, जब तक पेहले ऊं मरती ना जाओ। 37 तम्ही ओ शरीरा नु जको अंकुरीत हुवणे नु छै, ना राहवा, तम्ही तां सेर्फ बीज राहवा चाहे कणकी चे जा कुई नेरे हो। 38 पर नरीकार आपणी इच्छा चे अनुसार ओनु शरीर ङिये हर-हेक बीजा नु ओचे आपणे खास शरीर, 39 सब शरीर हेक जिसड़े कोनी। इन्साना चे शरीर होर छै, ढौरा चे शरीर होर छै, पखीयां चे शरीर होर छै, माछलीया चे शरीर होर छै। 40 देह स्वर्ग़ीय वी हुवे ते शरीरिक वी, स्वर्ग़ीय देह चा तेज अलग़ हुवे ते शरीरिक देह चा अलग़। 41 सूरजा चा तेज होर छै, ते चाँदा चा तेज होर छै, तारागण चा तेज होर छै, कांकि हेक तारे कनु ङुजे तारे चे तेज मां फर्क छै। 42 मुड़दा चे जीते उठणे वी इसड़े ही छै। शरीर नाशवान दशा मां राहले जाये ते अविनाशी रूपा मां जीते उठे। 43 ऊं बेकदरी लारे राहले जाये, ते तेज लारे जीते उठती जाये। कमजोरी लारे राहले जाये ते सामर्थ लारे जीते हुती जाये। 44 शरीरिक देह राहली जाये ते आत्मिक देह जीती उठती जाये। अगर शरीरिक देह छै तां आत्मिक देह वी छै। 45 जिंवे कि पवित्रशास्त्रा मां लिखले आले छै, “पेहले इन्सान यानि आदम, जीते-जी बणले” ते आखरी आदम, जीवनदायी आत्मा हुला। 46 पेहले आत्मिक जीवन ना मिली, पर शरीरिक जीवन मिले, ऐचे बाद आत्मिक जीवन मिले। 47 पेहले इन्सान शरीरिक हुते यानि माटी चे बणले आले हुते, ङुजे इन्सान स्वर्ग़ीय छै। 48 शरीरिक उसड़े ही छै जिसड़े माटी लारे बणले इन्सान हुते। ते स्वर्ग़ीय उसड़े ही छी जिंवे ओ जको इन्सान स्वर्ग़ीय छै 49 ते जिंवे अम्ही इन्साना चा शरीरिक रुप धारण करला जको माटी चे हुते, ते यूंही ओ स्वर्ग़ीय इन्साना चा रुप वी धारण करु। 50 हे माये भऊ, मैं ईं किहे पला कि मांस ते लुहीं नरीकारा चे राज़ चे अधिकारी ना हो सग़ी। ते ना नाशवान अविनाशी चा अधिकारी हो सग़े। 51 ङेखा, मैं तम्हानु भेद ची बात किहे पला, कि अम्ही सारे तां नी मरु, पर अम्चा सारा चा रुप बदलती जई। 52 ते ईं पल भर मां, पलक झपकते ही आखरी तुरही बजी। जिंवे ही आखरी तुरही ची अवाज हुवी मरले आले अविनाशी दशा मां जीते करले जाये ते अम्चा रुप बदलती जई। 53 कांकि जरुरी छै, वा नाशवान देह अविनाशी नु धारण करो ते हा मरणहार देह अमरता नु धारण करती गिही। 54 ते जब हा नाशवान अविनाशी नु ते मरणहार अमरता नु धारण करती गिही, तब पवित्रशास्त्र चा हा वचन पूरा हुती जई, “जय ने मौत नु निग़लती गेहले। 55 हे मौत दुधी जय किठे रेहली? हे मौत दुधा ङंग किठे रेहला?” 56 मौत चा ङंग पाप छै, ते पाप ची ताकत व्यवस्था छै। 57 पर नरीकारा चा धन्यवाद हो, जको अम्चे प्रभु ईशु मसीह चे जरिये अम्हानु जयवन्त करे। 58 ऐवास्ते हे प्यारे भऊ, मजबूत ते अटल रिहा, ते प्रभु चे कामा मां सदा बधते जावा, तम्ही ईं जाणा, तम्ची मेहनत प्रभु मां बेकार कोनी। |
CC BY-NC-ND 4.0