ମାଥିଉ 23 - ପବିତ୍ର ବାଇବଲ (CL) NT (BSI)

ଧର୍ମଗୁରୁ ଓ ଫାରୁଶୀମାନଙ୍କ ବିରୁଦ୍ଧରେ ଯୀଶୁଙ୍କ ସତର୍କ ବାଣୀ

¹ ଯୀଶୁ ଶିଷ୍ୟମାନଙ୍କୁ ଓ ସମବେତ ଜନତାକୁ କହିଲେ,

² “ଧର୍ମଗୁରୁ ଓ ଫାରୁଶୀମାନେ ମୋଶାଙ୍କ ବ୍ୟବସ୍ଥାର କ୍ଷମତାପ୍ରାପ୍ତ ବ୍ୟାଖ୍ୟାକାରୀ,

³ ତେଣୁ ସେମାନେ ଯାହା କରିବାକୁ କହୁଛନ୍ତି, ତାହା କର। କିନ୍ତୁ ସେମାନଙ୍କ କାର୍ଯ୍ୟକଳାପକୁ ଅନୁକରଣ କର ନାହିଁ। କାରଣ ସେମାନେ ନିଜେ ଦେଉଥିବା ଶିକ୍ଷା ଅନୁଯାୟୀ କାର୍ଯ୍ୟ କରନ୍ତି ନାହିଁ।

⁴ ସେମାନେ ଲୋକମାନଙ୍କ ପିଠି ଉପରେ ଦୁର୍ବହ ବୋଝ ଲଦି ଦିଅନ୍ତି, କିନ୍ତୁ ସେସବୁ ବୋଝ ବହନ କରିବା ପାଇଁ ନିଜର ଅଙ୍ଗୁଳି ଦ୍ୱାରା ମଧ୍ୟ ଟିକିଏ ହେଲେ ସାହାଯ୍ୟ କରନ୍ତି ନାହିଁ।

⁵ ସେମାନେ ଲୋକଙ୍କୁ ଦେଖାଇବା ପାଇଁ ସବୁ କାମ କରିଥାନ୍ତି। ଦେଖ, ସେମାନେ ଶାସ୍ତ୍ର ବିନ ଲେଖା ହୋଇଥିବା କେଡ଼େ କେଡ଼େ କବଚ କପାଳ ଓ ବାହୁରେ ବାନ୍ଧିଛନ୍ତି। ପୁଣି ଦେଖ, ସେମାନଙ୍କ ପୋଷାକର ଝାଲର ସବୁ କେଡ଼େ ଲମ୍ବା।

⁶ ସେମାନେ ଭୋଜିମାନଙ୍କରେ ବିଶିଷ୍ଟ ସ୍ଥାନ ଓ ଉପାସନା ଗୃହମାନଙ୍କରେ ସଂରକ୍ଷିତ ଆସନ ଅଧିକାର କରିବାକୁ ଭଲ ପାଆନ୍ତି।

⁷ ବଜାର ଛକମାନଙ୍କରେ ଲୋକମାନେ ସେମାନଙ୍କୁ ସମ୍ମାନ ଦେଖାଇ ଅଭିବାଦନ କରନ୍ତୁ ଓ ‘ଗୁରୁ’ ବୋଲି ସମ୍ବୋଧନ କରନ୍ତୁ, ଏହା ସେମାନେ ଚାହାଁନ୍ତି।

⁸ କିନ୍ତୁ ତୁମକୁ କେହି ଗୁରୁ ବୋଲି ଡ଼ାକିବା ଉଚିତ୍ ନୁହେଁ। କାରଣ ତୁମେ ସମସ୍ତେ ପରସ୍ପରର ଭାଇ ଓ ତୁମର ଗୁରୁ କେବଳ ଜଣେ।

⁹ ପୁଣି ପୃଥିବୀରେ ତୁମେ କାହାକୁ ପିତା ବୋଲି ସମ୍ବୋଧନ କରିବା ଉଚିତ୍ ନୁହେଁ। କାରଣ ତୁମର ଜଣେ କେବଳ ପିତା - ସେ ସ୍ୱର୍ଗରେ ଅଛନ୍ତି।

¹⁰ ତୁମକୁ ପ୍ରଭୁ ବୋଲି ମଧ୍ୟ କେହି ନ ଡ଼ାକନ୍ତୁ, କାରଣ ଏକମାତ୍ର ପ୍ରଭୁ ହେଉଛନ୍ତି ମସୀହ।

¹¹ ତୁମ ମଧ୍ୟରେ ଯେ ସବୁଠାରୁ ଶ୍ରେଷ୍ଠ, ସେ ତୁମର ସେବା କରୁ।

¹² ଯେ ନିଜକୁ ଉନ୍ନତ କରେ, ତାକୁ ନତ କରାଯିବ ଏବଂ ଯେ ନିଜକୁ ନତ କରେ, ତାକୁ ଉନ୍ନତ କରାଯିବ।

ଛଳ ଧାର୍ମିକମାନଙ୍କୁ ଯୀଶୁ ଭର୍ତ୍ସନା କଲେ

¹³ “ଆହେ ଧର୍ମଗୁରୁ ଓ ଫାରୁଶୀଗଣ, ତୁମର ଶେଷ ଦଶା କେଡ଼େ ଭୟଙ୍କର! ଆରେ ଛଳ ଧାର୍ମିକଦଳ, ସ୍ୱର୍ଗରାଜ୍ୟର ପ୍ରବେଶ ଦ୍ୱାର ବନ୍ଦ କରି ରଖିଛ। ନିଜେ ସେଥିରେ ପ୍ରବେଶ କରୁ ନାହଁ ଏବଂ ଯେଉଁମାନେ ପ୍ରବେଶ କରିବାକୁ ଚେଷ୍ଟା କରୁଛନ୍ତି, ସେମାନଙ୍କୁ ବାଟ ଛାଡ଼ୁ ନାହଁ।”

¹⁵ “ଆରେ ଧର୍ମଗୁରୁ ଓ ଫାରୁଶୀମାନେ, ତୁମ ଦଶା କେଡ଼େ ଶୋଚନୀୟ। ତୁମେ ସମୁଦ୍ର ପାରିହୋଇ ଦେଶାନ୍ତରକୁ ଯାଇ ଜଣକୁ ତୁମ ଧର୍ମରେ ଦୀକ୍ଷିତ କରିବା ପାଇଁ ଖୋଜି ବୁଲୁଛ। କିନ୍ତୁ ସେହି ଭଳି ଜଣକୁ ପାଇଲେ, ତାକୁ ନରକଗାମୀ ହେବା ପାଇଁ ତୁମଠାରୁ ଦୁଇଗୁଣ ଅଧିକ ଉପଯୋଗୀ କରାଉଛ।

¹⁶ “ଆରେ ଅନ୍ଧ ପଥ-ପ୍ରଦର୍ଶକଗଣ, ତୁମର ଦଶା କେଡ଼େ ଭୟାନକ। ତୁମେ ଶିକ୍ଷା ଦେଇଥାଅ, କେହି ମନ୍ଦିର ନାମରେ ଶପଥ କଲେ, ତା’ ସେ ପାଳନ କରିବାକୁ ବାଧ୍ୟ ନୁହେଁ; କିନ୍ତୁ ମନ୍ଦିରରେ ଥିବା ସୁବର୍ଣ୍ଣ ନାମରେ ଯେ ପ୍ରତିଜ୍ଞା କରେ, ତାକୁ ତା’ ପାଳନ କରିବାକୁ ପଡ଼ିବ।

¹⁷ ଆରେ ଅନ୍ଧ ନିର୍ବୋଧମାନେ, ସ୍ୱର୍ଣ୍ଣ ବଡ଼ ନା ସ୍ୱର୍ଣ୍ଣକୁ ପବିତ୍ର କରୁଥିବା ମନ୍ଦିର ବଡ଼?

¹⁸ ତୁମେ ଶିକ୍ଷା ଦେଇଥାଅ ଯେ, ଜଣେ ବ୍ୟକ୍ତି ବେଦୀ ନାମରେ ଶପଥ କଲେ, ସେ ତାହା ପାଳନ କରିବାକୁ ବାଧ୍ୟ ନୁହେଁ। କିନ୍ତୁ ବେଦୀ ଉପରେ ରଖାଯାଇଥିବା ନୈବେଦ୍ୟ ନାମରେ ପ୍ରତିଜ୍ଞା କଲେ, ତାହା ଅଲଙ୍ଘନୀୟ।

¹⁹ କେଡ଼େ ଅନ୍ଧ ତୁମେ। କେଉଁଟି ଶ୍ରେଷ୍ଠ - ନୈବେଦ୍ୟ ନା ନୈବେଦ୍ୟକୁ ପବିତ୍ର କରୁଥିବା ବେଦୀ?

²⁰ ଅତଏବ କେହି ବେଦୀ ନାମରେ ଶପଥ କଲେ, ସେ ବେଦୀ ଓ ତାହା ଉପରେ ଥିବା ସକଳ ନୈବେଦ୍ୟ ସାମଗ୍ରୀ ନାମରେ ଶପଥ କରେ।

²¹ କେହି ମନ୍ଦିର ନାମରେ ଶପଥ କଲେ ସେ ମନ୍ଦିର ଓ ତହିଁରେ ଅଧିଷ୍ଠାନ କରୁଥିବା ଈଶ୍ୱରଙ୍କ ନାମରେ ଶପଥ କରେ।

²² “କେହି ସ୍ୱର୍ଗ ନାମରେ ଶପଥ କଲେ, ସେ ଈଶ୍ୱରଙ୍କ ସିଂହାସନ ଓ ତଦୁପରେ ଉପବିଷ୍ଟ ଈଶ୍ୱରଙ୍କ ନାମରେ ଶପଥ କରେ।

²³ “ଆହେ ଧର୍ମଗୁରୁ ଓ ଫାରୁଶୀଗଣ, ତୁମର ପରିଣତି କେଡ଼େ ଶୋଚନୀୟ! ତୁମେ ଈଶ୍ୱରଙ୍କ ଉଦ୍ଦେଶ୍ୟରେ ପୋଦିନା, ପାନ ମହୁରୀ ଓ ଜିରାର ମଧ୍ୟ ଦଶମାଂଶ ଦାନ କରୁଥାଅ; କିନ୍ତୁ ନ୍ୟାୟ, ଦୟା, ସାଧୁତା ଆଦି ବ୍ୟବସ୍ଥାର ପ୍ରଧାନ ପ୍ରଧାନ ବିଷୟଗୁଡ଼ିକୁ ଅବହେଳା କରୁଛ। ବ୍ୟବସ୍ଥାର ଏ ବିଷୟଗୁଡ଼ିକୁ ଆଗେ ଅଭ୍ୟାସ କରିବା ଉଚିତ୍।

²⁴ “ଆରେ ଅନ୍ଧ ପଥପ୍ରଦର୍ଶକଗଣ, ତୁମେ କିଛି ପାନ କଲାବେଳେ କାଳେ ସେଥିରେ ପୋକଟିଏ ପଡ଼ିଥିବ ବୋଲି ତାକୁ ଛାଣି ଦେଇଥାଅ। କିନ୍ତୁ ତୁମେ ଗୋଟିଏ ଗୋଟିଏ ଓଟକୁ ପୁରା ଗିଳି ଖାଇ ଯାଇଥାଅ।

²⁵ “କେଡ଼େ ଭୟଙ୍କର ତୁମ୍ଭମାନଙ୍କର ଶେଷ ଗତି, ଆରେ ଧର୍ମଗୁରୁ ଓ ଫାରୁଶୀଗଣ! ତୁମେ ପିଆଲା ଓ ଥାଳୀର ବାହାର ପଟ ପରିଷ୍କାର କରିଥାଅ, କିନ୍ତୁ ସେଗୁଡ଼ିକର ଭିତରେ ହିଂସା ଓ ସ୍ୱାର୍ଥପରତା ପୂରି ରହିଛି।

²⁶ “ଅନ୍ଧ ଫାରୁଶୀଗଣ! ପାତ୍ରର ଭିତରଟାକୁ ଆଗ ପରିଷ୍କାର କର, ତାହାହେଲେ ବାହାରଟା ମଧ୍ୟ ପରିଷ୍କାର ହୋଇଯିବ।

²⁷ “ଆହେ ଧର୍ମଗୁରୁ ଓ ଫାରୁଶୀଗଣ! ତୁମେ କେଡ଼େ ଭୀଷଣ ଦଶା ଭୋଗିବ। ଆରେ କପଟୀ ଗଣ! ତୁମେ ସବୁ ବାହାର ପଟେ ଚୂନଧଉଳା ହୋଇଥିବା କବର ପରି।

²⁸ “ବାହାରକୁ ଏଗୁଡ଼ିକ ସୁନ୍ଦର ଦିଶେ, କିନ୍ତୁ ଭିତର ଅସ୍ଥି କଙ୍କାଳ ଓ ପଚା ଶବରେ ପୂର୍ଣ୍ଣ। ସେହିପରି ତୁମେ ବାହାରକୁ ସମସ୍ତଙ୍କ ଆଗରେ ଭଲ ଦେଖାଯାଅ, କିନ୍ତୁ ତୁମ ଭିତରଟା କପଟ ଓ ପାପରେ ପରିପୂର୍ଣ୍ଣ।

ଯୀଶୁ ସେମାନଙ୍କ ଦଣ୍ଡ ଭୋଗର ସୂଚନା ଦେଲେ

²⁹ “ଆହେ ଧର୍ମଗୁରୁ ଓ ଫାରୁଶୀଗଣ! ଆରେ ଛଳଧାର୍ମିକ ବୃନ୍ଦ! ତୁମ ପାଇଁ ଏହା କେଡ଼େ ଭୟଙ୍କର। ଭାବବାଦୀମାନଙ୍କ ପାଇଁ ତୁମେ ସୁନ୍ଦର ସମାଧି ନିର୍ମାଣ କରୁଛ ଓ ଧାର୍ମିକମାନଙ୍କର ସ୍ମୃତି ସ୍ତମ୍ଭ ସବୁ ଅଳଙ୍କୃତ କରୁଛ।

³⁰ ପୁଣି ତୁମେ କହୁଛ, ଯଦି ତୁମ ପୂର୍ବ ପୁରୁଷମାନଙ୍କ ସମୟରେ ତୁମେ ଥାଆନ୍ତ, ତେବେ ସେମାନଙ୍କ ପରି ଆଚରଣ କରି ନ ଥାନ୍ତ କିମ୍ବା ଭାବବାଦୀମାନଙ୍କୁ ହତ୍ୟା କରି ନ ଥାଆନ୍ତ।

³¹ ଏକଥା କହିବା ଦ୍ୱାରା ତୁମେ ବାସ୍ତବିକ ସ୍ୱୀକାର କରୁଛ ଯେ ତୁମେ ଭାବବାଦୀମାନଙ୍କ ହତ୍ୟାକାରୀମାନଙ୍କର ବଂଶଧର।

³² "ତେବେ ତୁମ୍ଭେ ଆଗେଇ ଚାଲ, ତୁମ ପୂର୍ବ ପୁରୁଷମାନଙ୍କର ଅସମ୍ପୂର୍ଣ୍ଣ କରିଦିଅ।

³³ “ଆରେ ସର୍ପଗଣ! କାଳସର୍ପର ବଂଶଧର! ନରକ ଦଣ୍ଡରୁ ରକ୍ଷା ପାଇବା ବୋଲି କିପରି ଆଶା କରୁଛ?

³⁴ ତେଣୁ ମୁଁ କହୁଛି; ତୁମ୍ଭମାନଙ୍କ ନିକଟକୁ ଭାବବାଦୀ, ଶିକ୍ଷାଗୁରୁ ଓ ବିଜ୍ଞ ଲୋକମାନଙ୍କୁ ପଠାଇବି। ସେମାନଙ୍କ ମଧ୍ୟରୁ କେତେକଙ୍କୁ ତୁମେ ହତ୍ୟା କରିବ, କେତେକଙ୍କୁ କ୍ରୁଶରେ ଚାବୁକ ମାରି ଗୋଟିଏ ସହରରୁ ଆଉ ଗୋଟିଏ ସହରକୁ ତଡ଼ିଦେବ।

³⁵ ପରିଣାମରେ ହେବଲଠାରୁ ଆରମ୍ଭ କରି ମନ୍ଦିର ଓ ବେଦୀ ମଧ୍ୟସ୍ଥଳରେ ନିହତ ହୋଇଥିବା ଜିଖରିୟ (ବରଖିଆଙ୍କ ପୁତ୍ର) ପର୍ଯ୍ୟନ୍ତ ସମସ୍ତ ନିର୍ଦ୍ଦୋଷ ବ୍ୟକ୍ତିମାନଙ୍କ ହତ୍ୟା ପାଇଁ ତୁମ୍ଭେମାନେ ଦଣ୍ଡିତ ହେବ।

³⁶ ମୁଁ ନିଶ୍ଚିତ ଭାବରେ କହୁଛି, ଏ ସମସ୍ତଙ୍କ ହତ୍ୟା ପାଇଁ ଏ ଯୁଗର ଲୋକମାନେ ଦଣ୍ଡ ଭୋଗ କରିବେ।

ଯିରୂଶାଲମ ପ୍ରତି ଯୀଶୁଙ୍କର ମମତା

³⁷ “ହେ ଯିରୂଶାଲମ, ହେ ଯିରୂଶାଲମ। ତୁମେ ଭାବବାଦୀମାନଙ୍କୁ ହତ୍ୟା କରୁଛ ଓ ଈଶ୍ୱରପ୍ରେରିତ ବାର୍ତ୍ତାବହମାନଙ୍କୁ ପଥର ଫୋପାଡ଼ି ମାରୁଛ। କୁକୁଡ଼ା ତା’ ଡ଼େଣା ତଳେ ଛୁଆମାନଙ୍କୁ ଧରି ରଖିବା ପରି, ତୁମ ଲୋକମାନଙ୍କୁ ମୋ’ ବାହୁ ଛାୟାତଳେ ରକ୍ଷା କରିବା ପାଇଁ ମୁଁ କେତେଥର ଚେଷ୍ଟା କରିଛି। କିନ୍ତୁ ତୁମେ ମୋତେ ତାହା କରିବାକୁ ଦେଇ ନାହଁ।

³⁸ ତେଣୁ ତୁମ ମନ୍ଦିର ପରିତ୍ୟକ୍ତ ଓ ଶୂନ୍ୟ ହେବ।

³⁹ ମୁଁ କହି ରଖୁଛି, ‘ପ୍ରଭୁଙ୍କ ନାମରେ ଯେ ଆସୁଛନ୍ତି, ସେ ଧନ୍ୟ’ - ଏହା ଯେ ପର୍ଯ୍ୟନ୍ତ କହି ନାହଁ, ବର୍ତ୍ତମାନଠାରୁ ତୁମେ ମୋତେ ଆଉ ଦେଖି ପାରିବ ନାହିଁ।”