ቲ̈ታ̇ 3 - ኦራ ጫ̈ቃ ማጻ̈ፋኣማ̇ኒኖ ኣሲ ኮሽ ማ̈ቂ̇ኖ ባዝ ኦ̈ንዳብ ኮሺ̇̈ሬ 1 ኣሲ ዎይ ጋዣንቤኬ ሲልጣ̈ና ዎ ኣሳንቦ ዪርክ ጋ̈ር ኪ̈ቲንታ̇ምፔ̈ንኬ ኮሽ̇ ኦ̈ሳ ዎይ ኦ̈ንዳቦ ጊ̈ጊንቲ̇ኖ ኣስ ማ̈ቃ̇ምፔ̈ኒ ኢንታ̇ ዞራቤ። 2 ማ ኦ ጋልዳካሬ ኢ̈ታባዝ ሶ̈ላካ̇ዮ̈ዲፌ̈ኒ፣ ኣሳባር ሳሪቲባርኬ ኣሽኪቲባራ ዶኣምፔ̈ኒ፣ ኣስ ዎይባራ ፌ̈ና ዪርክ ዎታር ዶኣምፔ̈ኒ ኢንታ ዞራቤ። 3 ኑ̈ኒ ኣማ̇ናናፖ̈ ቲ̈ን ኣባክ ቆፒ ኤሪባ̈ሶ ዳሻን፤ ኪቲንቲባሶ ዉ̈ጫን፤ ዎብ̇ ጎይ ሉኪ̇ዛን፥ ዱማ ዱማ ኢ̈ታ ኢና̇ብኬ ኡፋይሳቦ ኣይላ ማ̈ቃ̇ር ኣቲ̇ኖን። ዎልዎልኣ ኢጺንቲሙታ̇ኬ ጎይሊንቲሙታ̇ ኢ̈ቲቲባርኬ ኣሳብ ሚቃ̇ይና ቆፒ̇ሙታ ዎን። 4 ማ̈ቂ̇ናካሬ ኑ̈ና ፋዝ ጾ̈ሳ̇̇ ኮሺቲንዲኬ ኢ ካንን ቤንቲ̇ን፥ 5 ኑ ኦ̈ኖ ጺሊ̇ቲ ኦ̈ሳባር ጊዳካ̇ይዶን ጾ̈ሳ̇ ፌ ማ̈ሪቲንባር ኑ̈ና ፋዴ። ኢ ኑ̈ና ፋኖንዳ ጌ̈ሻ ኣያ̇ናባራ፤ ዪ ጌ̈ሻ ኣያ̇ና̈ዲ ኑ ናጋሪን ሜ̈ጪ ጌ̈ሻ̇ር ኦራ ሼምፓ ኑ̈ብ ኢማ̇ሪ ኦራ ጎይ ዬምፔ̈ን ኑ̈ና ዎቲዴ። 6 ጾ̈ሳ̇̇̈ዲ ሱ̈ቃ̇ ቤዪ ኑ̈ና ፋ̈ዛ ዬሱ̈ስ ክርስቶ̈ሳ ጎይባራ ፌ ኣያ̇ና ኑ ጋልዳ ዎይሊሳር ውልኢሲዴ። 7 ዪኖ̇ ኢ ዎቲኖንዳ ኑ̈ኒ ኢ ካንንባራ ጌሻ̇ ኣስ ማ̈ቃ̇ሪ ኑ ታስፋባር ና̈ጋዚን ሜናብ ዶኣዝ ሼምፒ̇ንዶ ኤካምፔ̈ኔ። 8 ዪና̇ ኣማ̇ኒንቲ̇ኖ ሶ̈ላ። ጾ̈ሳ̇̇̈ ኣማ̇ኒኖ ኣሳን ኮሽ̇ ኦ̈ሳቦ ሚ̈ጛምፔ̈ኒ ዪን ባዛን ጌ̈ዚንር ኔ ኢንታ̇ብ ሶ̈ላምፔ̈ኒ ቴ ኮያ̇̈ሬ፤ ዪና̇ ዎይ ኣሳቦ ማ̈ዲ̇ዝ ኮሽ̇ ባዜ። 9 ማ̈ቂ̇ናካሬ ኔ̈ኒ ዳሻ ኣሳን ዋቺ̇ን ጋልዳፖ፥ ሜላ̇ ኮች ፋይዳዚን ጋልዳፖ፥ ሂጋ̇ ጎይ ዲንዲዝ ጎይላ ጋልዳፖ ጎታ̇ቤ፤ ኣባ ጌይን ዪን ኣባካር ፋባ̈ሶ ባዜ። 10 ኣሳ ጊዳ̇ ፋጊቲ ኤሄይዝ ና̈ሳ ኢያ ፔቲ̇ ቶህ ዎይ ናምኢ ቶህ ዞሪኖፖ ዓኒ ኢ ጋልዳፖ ጎታ̇ቤ። 11 ዪዲፌ̈ኖ ና̈ሳ ዎብ ጎይ ሉ̈ኪዝ ናጋራንቻ ኣሴ፤ ኢ ፌ ጋ̈ልዳ ፊርዲኖ ኣስ ማ̈ቂ̇ኖን ኔ ኤራቤ። ውርሲ ዞራ 12 ታ̈ኒ ኣርጣሞ̈ሳ ዎይ ቲኪቆ̈ሳ ኔ̈ክ ሚሺጌይን ኔ̈ኒ ኒቆጶ̈ሊሳ ካታሚንኮ ታ̈ኮ ኤሊ̇ር ዬ̈ቤ፤ ታ̈ኒ ባርጋ ኬሊንዶ ኢና ኣ̈ንዳብ ኮዪኔ። 13 ሂጋ̇ ኤሪዛ ዜ̈ናሳኬ ኣጵሎ̈ሳክ ኢንቲ ፌ ሉ̈ካዝ ጎይን ሉካ̇ምባራ ኢንታ̇ብ ኮሺ̇ዝ ባዝ ዎይባራ ኢንታ ማ̈ዳ̇ቤ። 14 ኣማ̇ኒኖ ኑ ኣሳንሬ ማ ሜላ̇ ዓሪ ማ̈ዲባ̈ሶ ኣስ ማ̈ቃ̇ር ኣታካ̇ዮዲፌ̈ኒን ኣሳብ ኮሺ̇ዝ ባዝ ዎይ ዲጛንዳቦ ኮሻ̇ ኦ̈ሳ ሚ̈ጛር ኦ̈ዚን ታማ̈ሮጋ̈ቤ። 15 ዓይዲ ታባራ ዎን ዎይ ኔ̈ና ሳሮ ጌይኔ፤ ኑ̈ኒ ጎዳ ኣማ̇ኒኖኮታ̇ቦ ኑ̈ና ካዛን ዎይ ታ̈ብ ሳሮ ጋ̈ቤ። ጾ̈ሳ̇ ኮሺቲ ዪንቲ ዎይንባር ማ̈ቆ̇። |