ቲ̈ታ̇ 1 - ኦራ ጫ̈ቃ ማጻ̈ፋ1 ዬሱ̈ስ ክርስቶ̈ሳብ ሃዋ̈ራ ማ̈ቂ̇ኖ ጾ̈ሳ̇ ኣይላ፥ ጾ̈ሳ̇̈̇ ማራ̇ጺ̇ኖ ኣሳን ሚ̈ንንዳብኬ ኪን ኣማ̈ና ጎይን ኤርሳምፔ̈ን ሹ̈ሚንቲ̇ኖ ታ ጳ̈ውሎ̈ሳ ጋልዳፖ ጻፊንቲ̇ኖ ኪ̈ታ፦ 2 ዓና̇ ኣማ̇ኒንዲኬ ኤሪንዳ ሜናብ ሼምፓባር ዶኢ ታስፋ ጋልዳ ሚ̈ጛር ኤቂ̇ኖ ባዜ፤ ማቂ̇ባ̈ሶ ጎዳ̈ዲ ዪና̇ ሜናብ ዶኣዝ ሼምፒ̇ን ኢማ̇ንዳቦ ሚን ሲሳፖ ኑ̈ብ ቃ̈ላ ጌሊኔ። 3 ኑ̈ና ፋዝ ጾ̈ሳ̇ ኢ ጌይኖ ኬሊ̇ን ዬሊ̇ን ኢ ኪ̈ታባራ ታ̈ኒ ኢ ቃ̈ላ ሳባ̇ካምፔ̈ን ታ̈ቦ ዓዳራ ኢሚ̇ኖ ጎይባራ ኢ ፌ ቃ̈ሊን ኣሳብ ኤርሲዴ። 4 ኑ ኣማ̇ናዝ ኣማ̇ኒን ፔታ̇ን ማ̈ቂ̇ኖ ጎይባራ ታ̈ብ ኪን ናኢ ማ̈ቂ̇ኖ ቲ̇ቶ̇! ጾ̈ሳ̇ ኑ ባ̈ባ̈ፔኬ ኑ̈ና ፋዛ ዬሱ̈ስ ክርስቶ̈ሳፖ ኢ ኮሺ̇ቲንዲኬ ሳሪቲን ኔ̈ብ ማ̈ቆ̇። ቃርጤ̈ሳ ጋ̈ዝ ዴሴቲን ጋልዳ ቲ̈ቶ̇ ኦ̈ዝ ኦ̈ሳ 5 ቴ ኔ̈ና ቃርጤ̈ሳ ዴሴቲን ጋልዳ ኣሺ̇ኖንዳ፥ ኢና ኣቲ̇ኖ ጌ̈ዛካ̇ዮ ባዛን ኔ ጌ̈ዚንምፔ̈ንኬ ቴ ኔ̈ና ኪ̈ቲ̇ኖንዲፌ̈ኒ ኢና ዎ ካታማን ጋርታ̇ ዎይ ዎ̈ሳ ኬ̈ ጪጛሻን ማራጻ ጋዳ̇ምፔ̈ኒዬ። 6 ዎ̈ሳ ኬ̈ ጪጛ̈ሺ፥ ኢ̈ት ባዝ ኦ̈ሬ ጌዪ ኣሲ ኢጋልዳ ሶ̈ሊባ̈ሶ ኣሲ፥ ማጫ ላጊካ̇ዮ ኣሲ፥ ኢ ናኣን ጾ̈ሳ̇ ኣማ̇ኒዝ ኣሲ ማ̈ቃ̇ንዳብ ኮሺ̇̈ሬ ማ “ኢንቲ ኪ̈ቲንቲባ̈ሴ፣ ዲርጊስ ዲርጊ̈ሬ” ጌዪ ኣሲ ኢንታ̇ ጌስቲ̇ባ̈ሶ ማ̈ቃ̇ንዳብ ኮሺ̇̈ሬ። 7 ዎ̈ሳ ኬ ቲ̈ኒዝ ጪጛሺ ጾ̈ሳ̇ ኦ̈ሲን ኦ̈ንዳቦ ዓዳ̇ራ ኤኪ̇ኖ ኣስ ማ̈ቂ̇ኖኮታ̇ቦ ኣሲ ኢያ ጌስቲ̇ዝ ኣስ ማ̈ቃ̇ንዳቦ ኮሺ̇ባ̈ሴ፤ ማ ኦትርቂ̇ባሶ ኣሲ፥ ኤሊ̇ር ጎይሊባ̈ሶ ኣሲ፥ ማሲቲባ̈ሶ ኣሲ፥ ዋጪባ̈ሶ ኣሲ፥ ቢራብ ጋንዲ̇ባ̈ሶ ማ̈ቃ̇ንዳብ ኮሺ̇̈ሬ። 8 ዪ̈ኒ̇ፖ̇ ኢ ዛቃ̇ ሞኪ̇ዝ ኣሲ፣ ኮሽ ማ̈ቂ̇ኖ ባዝ ካዝ ኣሲ፣ ኢ̈ታ ባዝ ኦ̈ዚን ጋልዳፖ ፌ̈ና ና̈ጊዝ ኣሲ፣ ጌ̈ሽ ኣስ ማ̈ቃ̇ንዳብ ኮሺ̇̈ሬ ማ ፌ ኢኒ̇ን ዎይ ኩምንዳ̇ብ ዎጺ̇ዝ ኣስ ማ̈ቃ̇ንዳብ ኮሺ̇ባ̈ሴ። 9 ኢ ኪን ቲምርቲ̇ን ታማ̈ርሲሙታ ዞራንዳብኬ ኪን ቲምሪቲ̇ን ኢጺ̇ዝ ኣሳን ዞራር ማሃንዳ̇ቦ ፌ ታማ̈ሪኖንዲፌ̈ኒ ኣማ̇ኒንቲ̇ኖ ቃ̈ሊን ጋልዳ ሚ̈ጛር ኤቃ̇ንዳቦ ኮሺ̇̈ሬ። 10 ኣኮታ̇ቦ ጌይን ዉጫ ኣሳን፥ ሜላ̇ ዓሪ ሶ̈ላ ዎይሊሲዛንኬ ኣስ ታ̈ላ̇ሊዛን ዎይሊን ዎ፤ ዪን ጋርታ̇ፖ̇ ሺን ኣይሁድ ዜርን። 11 ኢንቲ ማቃባር ኣባክ ዲጛንዳብ ኮያሪ ታማ̈ርሳንዳቦ ኮሺባ̈ሶ ቲሚርታ ታማ̈ርሲሙታ̇ ፌ ኣ̈ላባር ኮሽ̇ ዎ ኣሳን ኢ̈ሲ̇ዛኮታ̇ቦ ዪንፌ̈ኖ ኣሳን ዪ̈ዲፌ̈ኖ ባዝ ሶ̈ላካ̇ይፌ̈ኒ ኢንታ̇ ካያንዳ̇ብ ኮሺ̈̇ሬ። 12 ሜላ ኣቲ̇ን ኢንታ ናባ̈ ጌ̈ታ ኢንታ̇ባዝ ሶ̈ሊ̈ርዶሪ “ቃርጤ̈ሳ ኣሳን ዎይ ጋ̈ላስ ማቃ ማቂ̇ዛን፥ ኢ̈ታ ማ̈ታባዝፌ̈ኖ ኣሴ ማ ኦ̈ሳ ኦ̈ባሶን ሙ̈ያር ሚሽኪ̇ባ̈ሶን” ጌይኔ። 13-14 ዪ̈ ና̈ሳ̈ዲ ኢንታ ባዝ ማርኪቲኖንዳ ኪን፤ ዪ̈ኮታ̇ቦ ኢንታ ኣማ̇ኒንዳ ኪን ጎይም ጋልዳ ኤቃ̇ምፔ̈ንኬ፤ ኣይሁዳን ሶ̈ላ ፋባ̈ሶ ጋልዳፖ̇ ኢንቲ̇ ጎታ̇ምፔ̈ኒ ማ ኪንን ኢጺ̇ዝ ኣሳን ኪ̈ታ̇ዝ ኪ̈ቲን ሲስካካ̇ዮ̈ድፌ̈ኒ ኢንታ̇ ሚ̈ንር ጎይላቤ። 15 ጌ̈ሽ ኣሳንቦ ዎይ ባዚ ጌ̈ሼ̇፤ ናጋራንቻንብኬ ኣማ̇ኒባ̈ሶ ኣሳንቦ ኢንታ̇ ቆፊንዳር ኢንታ̇ ቡ̈ዲንዳ̇ሬ ጌ̈ሽ ጊዳካ̇ዮኮታ̇ቦ ኢንታ̇ቦ ዎይ ባዚ ጌ̈ሽ ጊዳካ̇ዬ። 16 “ኑ̈ኒ ጾ̈ሳ̇ ኤሪ̈ሬ” ጋ̈ሪ ኢንቲ̇ ሶ̈ሊ̈ርዶኬ ፌ ኦ̈ሲንባር ኢያ ኢጺ̇̈ሬ፤ ኢንቲ̇ ፌ ኦ̈ሲንባራ ጾ̈ሲ ኢንታ̇ ሺሪንቲ̇ኖን፥ ማ ኪ̈ቲንቲባ̈ሶንኬ ኮሻ̇ ኦ̈ሳ ኦ̈ንዳብ ዳንዳኢባ̈ሶ ኣሴ። |